“武康大楼”商铺忆旧

文/天曙华

上海的历史建筑、网红打卡地“武康大楼”一层一直是一排商铺，老早辣伊周边三五百米范围里，好像还呒没店面介集中的地方；对阿拉这帮子辣嗨附近读书、长大的“50后”来讲，对“武康大楼”商铺还是有点记忆的。前两天心血来潮，辣老同学微信群里发了一条消息，请大家回想一下，当年“武康大楼”下头有点啥商店，结果应者踊跃，大家纷纷发言。

“武康大楼”底层沿淮海路的店面，最靠东头就是“紫罗兰理发店”，埃歇辰光还呒没“美发厅”的称呼。传宝同学讲：“我结婚时就是辣了紫罗兰理的发，记得当时理发、汏头、修面外加吹风，全套服务的价钿是一块洋钿！辣当时这也算高消费的。因为结婚是人生当中一桩大事体，也就奢侈一趟。搿也是我从小到老辣紫罗兰唯一一次消费。”一块洋钿也嫌贵？年轻朋友覅听勿懂，这句闲话一讲应该有四十年了！现在“紫罗兰”还辣老地方，只勿过门面好像变小了。

“紫罗兰”朝西过来，现在是一家古董店，好像也有点年头了。浩统同学讲当时搿搭是西药房搭仔洗染店。西药房呒啥讲头，卖点常用药，解决附近居民伤风感冒、头痛脑热的小麻烦。洗染店就勿简单了。上世纪六七十年代，家家户户侪是用脚桶、面盆汏衣裳，既有机洗，又有干洗，还有全套熨烫设备的洗衣店相当少见，更何况搿家店里还兼营为衣物染色的业务。搿种染色业务早就失去了市场需求，现在当然也已绝迹多年。

女同学的回忆，搭自家熟悉的物事有关。申萍同学想到的是“其间有一间门面老小的小百货店，小辰光会去买针线缝纫配料和棉毛衫裤，还有汗衫、毛巾、床单咾啥。”印象中迭爿小百货店还卖文具，店面进深长度超过门面宽度，细细长长像条弄堂。现在好像开了一家音乐书店。

我记得蛮牢的是“武康大楼”底层再往西面有一爿南货店。店堂里的柜台摆成U字型，上头挂仔交关腊肉、火腿、香肠；面朝马路一边用玻璃隔出一个小空间，专门卖荤素熟食。上中学辰光，经常搭仔姚刚同学一道去买红烧羊羔冻当零食吃，搿种结冻后切成薄片的羊肉汤，只要九分一两，邪气解馋，一路走一路吃，走到学堂差勿多也吃光了。时隔将近半世纪，搿家传统风味的南货店已经改为经营新潮的咖啡了。

“武康大楼”最气派、最有腔调的是西端半圆型建筑构造，昂首冲天、气宇不凡。拨人家交关想象；搿末底楼位置最好的商铺自然也是最西头的半圆型门面，现在是一个叫做“30°空间”的文化品牌平台。老早迭块地方一直经营糕点、饼干、糖果等食品，档次还是蛮高的，玻璃橱窗看进去，勿少侪是马口铁罐头的礼盒包装，一般侪是需要走亲眷、送客人的辰光派用场。

商店门口马路边常年有一个阿婆，拿只篮头坐辣小矮凳浪，卖栀子花、白兰花。国莉同学还记得迭家商店叫“天天新”。转弯过去，“九层楼”朝武康路一面好像曾经有一家小菜场，还有一家卖机制冰的冰库；勿像现在又是咖啡吧、又是书画廊介闹猛。

其实即便辣计划经济时代，商铺也免勿了会有变化；勿过一栋建筑搭一座城市一样，总会拨经过的人留下一点记忆，偶而通过微信群交流对当年的记忆，也勿失为一桩有趣的事体。