搿能介个老街各地侪有。有种干脆就直接叫某某老街。比方黄山市个“屯溪老街”，上海个“七宝老街”……滑稽个是我屋里附近个“江桥老街”，伊面原来是个邪气普通个小乡镇，没啥像样个街面，伊拉干脆重新开了条小路出来，勒两旁边造几幢街面房子，招得来一眼饮食搭仔时尚类个商户，又立了块高高大大个碑牌，取名“江桥老街”。
啥叫啥老街？顾名思义，老街就是从前城镇里向主要个街道。老街个商业地位搭仔繁荣景象，有个已经拨新发展个商业街取代了，有个呢，仍旧是乡镇里向成群结队、人来人往个热闹地方。老街，应该有得岁月积淀个底蕴；老街，也应该是有真实个人文历史，看得见祖先个背影、可以承受得起当代人留恋个一条路。
勒上海，名气碰碰响个么当然是要算“上海老街”了。
“上海老街”，勒海上海老城厢个方浜中路浪。老街楼牌气派邪气大，立勒河南南路个东面，搿个是老街个起始入口，从河南南路进入到方浜中路，再兜到豫园商城边浪个旧校场路口，就算走完了，老街勿长个。
我是勒临近方浜中路个果育堂街浪出生、长大个。从河南南路到小东门搿一段方浜中路，我勿要忒熟悉噢！特别是从河南南路到豫园商城西面个安仁街一带，伊面以前个店铺分布状况，我手节头也覅扳就好侪讲出来个。
勒旧校场路朝西个方浜中路浪，拨我印象最深个是爿葆春中药店搭仔对面个废品回收站，还有勒河南南路口个两爿挨一挨二连勒一道个小点心铺搭仔小饮食店。伊面店勿多，主要是百姓个居住区。勒清贫年代里，我勿大会到伊面去荡马路个，倒是会得去废品回收站卖废品，或者是穿过方浜路到侯家路菜场去买菜。
其实，可以名副其实、配得上“上海老街”迭个响当当名字个，是从旧校场路开始朝东、一直到安仁街附近一带个方浜中路。记忆里向搿段路从当中开始，朝北有大胜馆（无锡饭店）、四明西药房、五金店搭一家专营南北货还连带卖食品、水果个泰丰（兆丰）商店；朝南呢，有王三和酒店、周虎臣毛笔店、酱油店，隔了一条馆驿街还有爿大饼油条点心店搭一爿银行储蓄所；西段起始个北面，有邪气有名气个百年老店“陆稿荐”熟食店、华成兴食品店，南面有永盛杂货铺（后来改水果铺）、顺昌杂品店；再朝东南方向走过去么，依次有香烛铺、刀剪铺搭仔脚踏车修理行；城隍庙牌楼以东，有粮米店、竹器店、派出所，还有主营肉类、水产生意个合作社、烟纸店、内衣织补坊、算盘修理铺咾啥。哦，对了，勒搿段方浜中路浪还有著名个石筱山----石氏伤科诊所。路勿长，大概只有200公尺，却有得介许多各到各处来个各种店铺。而且，搿眼商家、店铺个种类侪是搭百姓个日常生活休戚相关个。
假使还要向上去追溯伊辉煌岁月个闲话么，搿就继续朝东，一直走到人民路1号个童涵春堂为止，搿一段方浜中路以前叫做宝带路，是上海更加老个老街。勒城隍庙前头曾经有条叫方浜个河浜，1914年填脱河浜筑路，就是现在搿条弯弯曲曲个方浜路。民国时期，光启路朝东叫宝带路，朝西叫庙前街，后首来合并成为了方浜路。方浜路浪曾经是商铺林立，凤祥裕记、杨庆和、裘天宝、方九霞、宝成、庆云、景福、费文元、庆福星等九大银楼也云集勒此地块，方浜路老早是有名个银楼街。现在走到方浜中路人民路口，我仍旧可以感受到一种厚重恢弘个建筑气势，北面是1783年创建个童涵春堂，南面从前是有名个“裘天宝”银楼。方浜中路个东段是以前上海老城厢里顶顶繁华个马路，是真正个“上海老街”。
（作者近照）
（朗读者近照）
来源：“吳越小豬”公众号
联系客服
