一副对联，便写尽了人生
来源：中国传统文化
改编：丁迪蒙
朗读：魏晓峰
（朗读者近照）
最近，读到过一副对联。上联是：若不撇开终是苦，下联是：各能捺住即成名。横批是：撇捺人生。
勿得勿讲，搿副对联邪气有深度。“若”个撇假使勿撇出去就是“苦”；“各”个捺笔只有收得牢再是“名”。
一撇一捺是“人”。是个呀，水没两点难结成冰，一撇一捺再是人！“人”字两笔：
一笔写得到，一笔写失去。人生在世，呒没永久个得到，也勿会永远失去。得搭仔失总归是相伴而行个。侬勒得到个同时也勒失去，得与失之间，勿要忒过计较。
一笔写过去，一笔写将来。好像就是眼睛一眨个辰光，人生已经过去了一半。前方是向往个将来，回首是昨日子个记忆，而今朝就勒勒脚下头。昨日子已经是回勿去了，明朝还是未知，唯一能够把握个就是今朝了。
一笔写快乐，一笔写忧愁。有快乐就会得有忧愁，两者是相对个。忧愁又何尝勿是人生个宝贵经历。只有经历过个人再勿会遗憾勒搿世界浪向走一遭。
一笔写自家，一笔写爱人。一生当中，假使能够碰到一个人可以携手白头，是桩多少温暖而美好个事体。感情之所以拨歌颂，就是因为伊个勿容易得到，假使侬已经有幸得到，请一定要珍惜。
一笔写顺境，一笔写逆境。呒没一帆风顺个人生道路，也呒没满布荆棘个人生之路，有逆境就会得有顺境。只有咬咬牙齿坚持下去，再可以晓得：山重水复疑无路，柳暗花明又一村。
一笔写朋友，一笔写对手。人生难得有好朋友，人生也难得有得对手。有辰光对手再是最了解侬个人，勿要去抱怨对手个强大，因为只有强大个对手再能够让侬更加强大。
一笔写执着，一笔写放下。交关事体是侬坚持之后得到个，苦尽甘来个会得让侬更加懂得珍惜伊。但是，侬也要清爽，有眼事体却是呒没结果个，努力过了就可以了，人要拿得起，放得下。
凡是人世间个事体，撇开一眼利益搭仔纠结就勿苦了；看方寸之间，能够按捺牢自家个情绪再是人生个大智慧。
吳越小豬投稿郵箱：
emil_zzm@163.com
二維碼關注：
联系客服
