沪语朗读:黄燕琼
黄燕琼(左)与丁迪蒙(右)
微信群和咖啡馆
作者:孔 曦
来源:夜光杯
沪语改写:丁迪蒙
朗读:黄燕琼
身为当代人,凡是会得摆弄摆弄智能手机个,啥人呒没几只微信群呢?只不过要看是大个小个,是亲密个疏远个,还有是自家加个,还是拨人家死拖活拉弄进去个。
我翻了翻自家个微信群,有同学群、同事群、业主群、猫友群、文友群搭仔团购群咾啥,大大小小加起来差勿多有20只枉里。一个上半日,信息几百几千条,哪能看得过来?除了其中一两只群,别个群侪拨我设置了“消息免打扰”,有空辰光才浏览浏览。有个群主想拿自家所建之群营造成一个大家庭,我笑话伊是一厢情愿。同学同事同乡同好之间,啥人会得拿一向勿见面个、或者只是客客气气招呼个、或者已经分别几十年个群友当屋里向亲人?
刚刚白相微信辰光,一觉醒来,发现微信消息交交关关,原来是又拨拉到啥个勿同个群里向去了。现在,最叫我头痛个,就是歇勿歇拨人家邀请,参加啥个折扣群、购物群,我是一概勿进去个。倒勿是勿肯拨邀请者面子,实在是怕自家定力勿够,捂勿牢皮夹子。
我总归觉着,微信群赛过是一只咖啡馆,说勿定还不如咖啡馆。来个侪是客,但是呒没人招待。一个人讲闲话,所有人侪受影响。假使迭个人讲得对路子,葛末还好。顶怕伊眼发早浪向好、中浪向好、夜到好表情图个、嘘寒问暖个、庆祝节日个,以及专门发眼奇出百怪耸人听闻消息个群友。还有勿少转发过来个文章,标题老吸引侬个,点开一看,啥物事呀!纯粹标题党。
回顾迭个几年混群个经历,我发现,有几种行为顶顶讨惹嫌。
一是霸屏。有个爷叔勒勒现实生活里太冷清,缺乏听众,乃末上到天文地理国家大事,小到油盐酱醋鸡毛蒜皮,统统拿到群里来讲——“老婆卖相哪能”“儿子缺勿缺女朋友”“昨日吃了啥、今朝要吃啥”……一百条里向,八十条是伊发个。勒伊个言话里向,还时时刻刻记牢,揩揩女群友个油,自以为赚了便宜。搿种人面目之猥琐,一览无余。
还有个阿姨天天勒群里发自家个照片,晒自家做过个善事。有人看勿过眼,好言相劝,就是勿听;有人直接触伊霉头,也呒没效果。只好请群主踢伊出去了。
还有人欢喜复制整篇文章,粘贴到对话框里,长得来叫侬恨勿得一删了之。其实得体个做法,是拿文章转换成文件,再发到群里,想看个,自然会去点开个。
两是霸话题。交关群侪是有主题个,譬如宠物群、园艺群、文友群咾啥。有种人就是母爱泛滥,好为人师,一看到自以为有用个文章,马上所有个群,伊侪要转一遍。
还有做小生意个,看见只群就来发广告,没完没了。群友对伊冷嘲热讽,也挡勿牢伊赛过“邓禄普”个面皮。
有一枪,因为自家所在个微信群里有搿种人搿种事体,我邪气烦恼。有一位钻研佛教教义个文坛前辈,为人邪气真诚,也曾经被动个加入过交关群。有一日,伊退出了所有微信群。我老欣赏伊个决断个,但是我所在个群,群主有个是老同学,有个是好邻居,有个是好朋友,情面难却。退群勿退群,也是要看看群主个面子个。
算了算了!迭个一只只微信群,我就当做是一只只咖啡馆,店老板要搭我留一把椅子,是看得起我。至于去勿去坐坐,就要看我是勿是有心情,是勿是有闲工夫了。
再讲几句题外言话,一只微信群,要想运转良好,一定要有一个有威信有气度,敢得罪人个群主,还要有几个经常冒泡个骨干,更加要有众多千年潜水万年勿退个基本群众。要是还能杜绝霸屏,群里就可以少几个油腻爷叔,再适当办几趟线下活动,见光之后,大家友情加深,葛末搿只群就会真正成为群友个大家庭了。
“言话”基本解释:说话,谈话。南朝宋·刘义庆《世说新语·赏誉》“天锡见其风神清令,言话如流。”宋·苏轼《归去来集字》诗之三“言话审无倦,心怀良独安。”此与今日上海话中“言话”的用法是一致的。
“闲话”基本解释:指闲谈;背后议论他人是非的话;不满意的话,有关私人的谣言、传闻、幕后消息等。见陆游《雪意》诗:“闲话更端茶灶熟。”
图:网络 | 编辑:渺渺
联系客服