医院看毛病辰光，常常是生病人太多，医生太少，每趟看毛病侪呒没辰光细聊。其实有眼医疗健康小常识，医生们一直侪想对乃讲。
量血压辰光，最好把左右手侪测一下。通常以高个埃个为准，多测几趟求平均值，血压值更准确。
每天梳头一百计并勿能健脑。学一种乐器，学一门语言，学一个新手艺......，搿眼对大脑更有好处。勿过梳头一百计啊有眼好处，毕竟常用埃只手会更强健。
勿建议靠喝红酒保护心脑血管，虽然红酒中个白藜芦醇能对心脏有好处。如果把有效剂量换算到人身上，相当于每天要喝八百多斤红酒，啥人吃得消。而且，酒精伤肝又致癌。
生糖尿病个病人并勿是因为糖吃多了，因为糖尿病个病因有老多，比如先天个遗传因素、后天个环境因素等等，跟吃糖呒没一眼关系。但少糖少油个饮食，还是会降低发病个风险。
随便啊里一种贫血，吃阿胶、红枣、红糖侪呒没用场。缺铁、缺维生素B12和叶酸、重金属(铅)、遗传......，搿眼常见个贫血病因，吃伊拉侪呒没办法解决。
打呼勿是困得香，打呼是呼吸勿畅导致个响声，严重打呼可能导致(困觉呼吸暂停)，老危险，有搿现象，建议咨询一下医生。
如果出现下头搿眼情况，老可能是中风征兆。
一侧肢体麻木，活动勿方便；口角歪斜；讲言话听勿清爽；头混头痛；憨困老难叫醒；甚至剧烈呕吐，全身抽筋，大小便啊勿晓得了等。发现迭种样子及时送医院检查治疗，勿要耽误辰光。
我国成年人推荐每天钙摄入量是八百至一千毫克，如果每天保证喝牛奶能辣辣三百毫升以上，深绿颜色蔬菜能吃一斤以上，再配合其它日常饮食，是可以达到推荐个量，可以勿用额外钙片。钙片对中老年人吸收下降原因，多吃反而会积石。
烫伤了，勿要瞎抹物事。正确个处理方法是：冲(冷水/自来水冲，勿要用冰水)；脱(脱下烫伤搿搭个衣物)；泡(辣辣冷水中持续浸泡)；盖(盖上清爽个纱布或者毛巾)；送(及时送往医院)。烫伤后涂牙膏、酱油、猪油、面粉等，统统勿可取。
一天出污3趟和一个礼拜出污3趟，侪是正常个。只要污样子正常，勿要去纠结趟数。
勿管有勿有高危因素，五十岁以上侪应该去趟医院，做一次肠镜检查。一次检查，排除危险。
骨折个病人，勿大适合喝骨头汤。因为搿汤最补个勿是钙，而是脂肪。骨折后行动勿方便，吃胖了反而增加负担。要想补钙，可以多吃眼深绿颜色个蔬菜或者豆制品和牛奶等。
吃发个物事勿影响伤口个愈合，真正影响伤口个因素是：年令、高血糖、感染、局部血液循环出现状况、还有就是抽烟等。各种忌口，勿吃物事，容易营养勿良，更会妨碍伤口愈合。
要强健膝盖，只要每天坚持做靠墙深蹲就可以。蹲个辰光膝盖勿要超过脚尖，啊勿要内扣。蹲得多低，以膝盖勿觉得痛为准。坚持半分钟至一分钟，休息一歇歇，再重复做搿动作五至六趟，觉得吃力就立起来。
肥胖会增加肿瘤发病率，肿瘤发生个风险，会伴随肥胖程度个增加而增加。和其它致癌因素相比，肥胖是一种可以逆转个致癌因素。所以要管牢自家个嘴巴，空下来迈开腿走走，控制好体重。
勿存在能防癌抗癌个食物，大蒜、绿茶、秋葵等能防癌抗癌个说法，侪呒没经过科学考证，如果吃某种食物就能一劳永逸，远离癌症，迭能样子医院恐怕要开到菜场里去了。
吃发个物事勿会让癌症复发，所以基本勿存在忌口个讲法，实际上生病人更应该吃一眼高蛋白，容易消化个食物，保证足够个营养才有利于治疗后个恢复。
宫颈糜烂勿是病，医生看到搿现象会掉头而走，绝大多数情况侪是正常个生理改变。
传统个坐月子有害，产后个姆妈的确需要护理，但绝对勿要勿汰头、勿汰浴、勿刷牙齿、勿出门等。
六个号头里向个小毛头勿需要额外喝水，一岁里向个宝宝啊勿要吃盐，因为母乳和婴儿配方食品里侪有。
勿要拨一岁里向个宝宝喂蜂蜜，蜂蜜中可能含有肉毒梭状杆菌，产生肉毒素。小于一岁个宝宝肠道环境老脆弱，对毒素反应更加敏感。吃了蜂蜜后容易中毒，出现严重症状。
小囡啊怕热，用勿着里三层外三层裹牢。特别是隔代个爷爷、娘娘带小囡，伊拉觉得冷侬一定啊冷。所以有一种病，叫做穿衣强迫症。
宝宝感冒发烧，勿要用酒精揩浴，啊勿要捂汗，酒精揩浴可能会引起酒精中毒。捂得太紧，热坏了，容易脱水，小囡个毛病只会更严重。
八十岁个老人啊能有二十颗健康个牙，勿要觉得老掉牙是宿命，只要侬定期看牙医，坚持护牙啊能办到。
吃再多胶原蛋白啊勿能美容，因为吃进去就成了氨基酸，并勿能直接变成皮肤上个胶原蛋白。涂辣辣面孔上头啊呒没用场，因为皮肤吸收勿了迭种大分子物质(蛋白质)。好好吃饭多喝水，搿才是皮肤变好个基础。
防晒勿仅能防止变黑，还能预防皮肤癌。阳光中紫外线可能引发恶性皮肤肿瘤。所以，需要晒太阳，但勿要晒太狠，注意抹防晒霜。
关灯白相手机、看电视、看电子书等，对眼睛伤害邪气大。既然关了灯，就安心困觉吧。
戳了鱼骨头勿要吞饭，试试咳出来或夹出来，勿来讪就去看医生。
上了年纪，眼睛生理调节功能下降，会出现老花。提高环境亮度，把手机字体调大，避免长辰光连续看书看电视，侪对眼腈有好处。建议到正规店家验光，配一副合适个老花眼镜。
勿要用手指甲挖耳朵污，啊勿要用其它物事挖耳朵污，因为耳道用力容易损伤耳道皮肤甚至鼓膜，大部分耳朵污是可以自行排出个。
