客家山歌：十月怀胎

山歌 | 2019-8-21 15:29|

摘要: 客家山歌：十月怀胎正月怀胎唔知骚，厓今同郎床边坐，甜言密语同郎讲，双牵郎手肚中摸，唔知阿妹有子无。二月怀胎真唔真，手软脚酸无精神，三餐食饭厓唔想，希望厓郎爱关心，杨梅水果买几斤。三月怀胎係当真，厓今同 ...

客家山歌：十月怀胎

正月怀胎唔知骚，

厓今同郎床边坐，

甜言密语同郎讲，

双牵郎手肚中摸，

唔知阿妹有子无。

二月怀胎真唔真，

手软脚酸无精神，

三餐食饭厓唔想，

希望厓郎爱关心，

杨梅水果买几斤。 

三月怀胎係当真，

厓今同郎讲真情，

鸡公糯米爱买便，

唔好急时正来寻，

小孩衫裤一色新。 

四月怀胎就唔同，

分男分女在腹中，

食尽亲娘心头血，

肚里胎儿鹿鹿动，

一下轻来一下重。 

五月怀胎妹身重，

每日出门去做工，

田头地尾勤耕种，

丈夫语言记心中，

有子唔好挑咁重。 

六月怀胎胎儿肥，

身箩肚大正出奎，

青年女子好怕羞，

心里觉得係畏遂，

手拿雨笠肚中围。 

七月怀胎苦难当，

请个医生开药方，

安胎药子食下去，

肚里胎儿就安康，

唔会冲下又冲上。 

八月怀胎真苦情，

日难坐来夜难眠，

床头坐到笃目睡，

身体总觉无精神，

火烧八字正可怜。 

九月怀胎重于山，

抬头容易低头难，

三餐唔敢食过饱，

食得过饱怕麻烦，

嘴里答答吐口涎。 

十月怀胎儿出生，

口中好比咬铁钉，

肚中疼痛如刀割，

心里恰似用油煎，

望儿长大心爱贤。