平常日脚，淘伙淘里轧勒一道，七张八嘴一径勒嚼玄妙观里格名堂经。今朝头，老虫跌到仔米缸里，样样侪稀奇，格么哪哼会安逸。
格么，白相点啥呐？袋袋里格个几角洋钿好派啥用场呐？
老鬼(念居)弗失辟，玄妙观里弗出铜钿看白戏格花头经勿少，铜钿捏勒手里，弗是要紧当口勿出手，先四面兜兜再说。
咣咣咣！一阵锣响，跟仔人流轧过去。嘿嘿！三钻二钻，立到仔圈子里厢一排，啥末事---猢狲出巴戏。平常放学转去，街头巷尾匣一径看得见，不过，从头看起勿多。特别是小巷里人少，弄弄卖关子，猢狲匣朆到开箱子戴帽子，就收场子哉，勿煞念。看到只老猢狲抢仔面锣绕圈子讨铜钿么，对勿起，伲几个小猢狲溜哉。
"同志啊们！听我辣格唱......."格面点小热昏开场哉，尺板小汤锣敲得应天响，立勒只杌子浪，头浪戴仔只后头翘仔根辫子格两爿头老太婆帽子做贼腔，引得大人小倌侪涌仔过来。年初头浪，人多，小热昏唱得特别卖力，从"妙根笃娘哭妙根笃爷"唱到"金铃塔"，梨膏糖从一分卖一块格到五分卖两块送一块格，卖脱仔勿少。伲么全本听白戏，学会仔两句"东判官手里拿仔块萝卜干，西判官手里捏仔块豆腐干......"，挬转屁股去看西洋景哉！
西洋景，是利用太阳光照射到一只大箱子里放出来格小电影。放西洋景格一面摇机器一面说勒唱，看格人要钻勒俚格一块遮光格大毯子里对牢几只孔看个。该格勿好弗出铜钿哉。嘿嘿！匣有办法，几个人商量北寺塔，出两分，三个人轮流看。
三清殿露台西面，靠边一排摆格是剃头担，假花头立勒边浪看剃头师傅帮老老头刮光浪头，修面，扒耳朵。实质骨子，是勒浪听背后场子里格戤壁书。一只半桌，十几只长凳，就是玄妙观里的露天书场。一个眼睛半开半闭，胡子喇喳格老先生浪说"后五义"。说得阿好，实在勿灵，当然弗及伲屋里贴隔德仙楼书场里格响档。不过，俚格野书，说得野豁豁，书场里朆听着歇个，倒另有一功。覅看勿起该摊场化，听说响得刮辣辣格张鉴庭，朆出浜格辰光匣浪该摊露天书场浪唱过，匣出过点好脚色格。
白相仔半日，几个人要紧弗煞，跑到牛角浜去一趟。啥体？拆脱丈尿(苏州话念"书")。覅笑覅笑！该格倒是老底子白相玄妙观格一道好风光。偌大格玄妙观，浪格个辰光，还呒没厕所！就是孵茶馆格老白相匣免勿脱，板要跑到牛角浜去方便。所以就多仔句苏州老话"吃茶三万昌，拆尿牛角浜"。
当然，拆仔尿还要白相下去，停停再说。
苏州玄妙观正山门上的匾额
正山门如今开了家"玄妙金店"，天神天将帮了守店
值殿金刚好无奈
星宿殿不开了，六十甲子的星宿就供在三清殿后边
这是主事近几年生肖的星宿，自左至右:犬，猪，鼠，牛，虎，兔，龙
壬辰龙年星宿
本站仅提供存储服务，所有内容均由用户发布，如发现有害或侵权内容，请
点击举报。
