最近烧鸡瘾发作，趁住周末难得嘅好天气，约上一班好朋友一齐去劈烧鸡。讲到喺广州食地道嘅烧鸡，首先谂起嘅都係农家菜。既然要去农庄，梗係要玩埋一份，黄埔古港走起！
黄埔古港一向都係广州食烧鸡嘅好去处，不过嗰度各式各样嘅农家餐馆未免会令人花多眼乱，好在同行嘅有一位石基地胆，佢话黄埔古港呢度发展得快，菜馆主人变迁都快，好多菜馆都已经易过好几手。唯有呢间正记园林美食十几年来始终屹立不倒。
入到嚟正记，首先就被店内绿意葱葱嘅植被环绕所震撼，果然係园林美食，餐厅四周围都係绿意盎然嘅环境，青葱嘅荷塘，成群嘅芭蕉树，加上暖暖嘅阳光，一切都十分美好。正因为噉，好多村民及游客都专程过嚟揾食，连大家熟悉嘅安神、珍珠、李富贵扮演者张鹏都过嚟食饭啊！
如果天气好，仲可以坐喺露台外面，近距离望住荷塘用餐，感受大自然嘅恩赐。
我哋去嘅时候，正係阳光普照嘅好天气，连驻地正记嘅喵星人都喺度慵懒噉晒太阳~
老板同我哋介绍，佢哋嘅菜式都係最传统嘅农家菜，就连餐厅选用嘅食材都係来自天然，鱼、虾蛎、菜、腊肉……全部都天然无添加，食得健康又干净。
古法秘制烧鸡
就係为咗呢只烧鸡而嚟！老板话，呢只烧鸡几乎每张台必点，最多嘅时候，一日300只都未够卖！足以见人气几咁高。
每只烧鸡上台后，都由老板亲自用手撕开，唔斩，保持烧鸡口感及保留肉汁。睇住裹喺烧鸡里面嘅酱汁混合鸡汁自然流出，我仿佛已经品尝到烧鸡嘅美味！
撕开嘅烧鸡金黄肉嫩，卖相好靓！睇到我口水都流啦。
正记嘅鸡全部都係用正宗走地鸡，采用湿烧嘅方法，师傅通过特殊手法将花椒、蒜蓉、沙姜、洋葱等酱料全部塞入鸡肚里面，腌足成日。等到入晒味先移落炭炉度细心烧制，D酱汁同烧鸡嘅汁水相互渗透，汁水紧紧锁喺鸡里面，充分保持鸡嘅湿嫩、原汁原味！
烧鸡一上台，我即刻眼明手快攞起只烧鸡髀，手慢D都冇！大大啖咬开，哇，鸡皮香脆松化，连埋香嫩嘅鸡肉一齐食入口，一D都唔觉得肥腻。鸡肉吸收晒腌料嘅酱汁，食入口自然好味道，连酱都唔使蘸！
香芋正鹅
成日食烧鹅，今次食D唔同D嘅。用芋头同鹅肉一齐煮，相互吸收香味，鹅香中有芋香，芋头中又有鹅嘅鲜，perfect！
炭烧排骨
哇！烧排骨一定要趁热食，噉先可以keep得住排骨嘅外焦内嫩，同丰富嘅肉汁！
鸡蟹煲
鸡煲蟹永远都係咁经典，鸡肉及蟹各自释放出鲜味，令呢个煲味道层次更加丰富，加上煲里面嘅中药材，减少肥腻感，食起身更加香醇。
田螺鸡煲
山坑田螺同新鲜走地鸡同煲，鲜味互相吸收，配以甜笋、生姜、紫苏一齐焖煮，味道点止一个鲜字了得。螺肉好肥厚，鸡肉鲜嫩，食起身好满足。
柚子皮煮鱼菘
平时阿妈都会用柚子皮嚟煮菜，因为够营养，有暖胃、化痰、润喉嘅作用噶。而且正记喺拣柚子皮嘅时候落足工夫，皮厚多肉，食起身唔会涩，好清润。
招牌新鲜野生河虾
今次真係食到货真价实嘅河鲜啦，唔好睇呢D河虾咁细只啊，佢哋比海虾更鲜甜！而且有丰富嘅营养，健脾益肾又益精，好食又健康！
吊烧禾雀
禾雀经过腌制，再放喺吊烧炉里面慢慢烧制，加上辣椒调味，食起身咸香带辣，满嘴流香！
黄沙大蚬
蚬肉只只都咁大只，真係吓我一跳！将佢哋拌上辣椒茸、蒜茸、香菜茸一齐蒸，鲜美得嚟又惹味，不知不觉就食晒一大碟。
禾虫煎蛋
城市人想食禾虫，去普通酒楼都冇得食。而正记呢度都唔係成日有噶，每一日都係限量供应，而且係限定季节先有。
唔好畀佢个样吓亲，其实禾虫好有营养，蛋白质含量高达60%以上，仲富含维生素B1以及多种微量元素，无论男女老少都好啱食。
美极田蚊鱼
田蚊鱼已经好少见，亏得正记呢度仲有得食。
田蚊鱼骨细幼嫩，简单咀嚼下就可以直接吞落肚。加上经过油、蒜蓉、姜一起炸，口味酥香，餸饭抑或斋食都好正。
椒盐虾蛎+虾蛎粥+虾蛎膏蒸蛋
虾蛎其实就係细细只嘅蟹仔，虽然体型细，但係味道係你估唔到嘅鲜！
做法一：加上花椒粒同粗盐爆炒，食起身带D香辣，但係好香口，蟹壳软到可以咬碎，送酒一流啊！
做法二：用嚟煲粥，咸淡水河鲜味渗入到粥里面，鲜到无法形容！
做法三：虾蛎膏好似唔使钱噉，大把大把放入去，同滑嫩嘅鸡蛋一齐蒸，吸收咗虾蛎膏嘅鲜味，食起身特别香。
虾蛎膏炒饭
呢个虾蛎膏炒饭相信出到市区都好难食得到，虾蛎都已经少见，莫讲话虾蛎膏。用虾蛎膏嚟炒饭，加上葱花，鲜香味混入米饭里面，食起身特别甘香。
虾蛎膏金黄幼滑，食入口齿颊留香，饭都自然食多两碗。不过呢个炒饭最好要趁热食，否则虾蛎膏冻咗之后会觉腥噶。
水瓜香芋煮蚬肉
粉粉绵绵嘅香芋，加上清甜嘅水瓜一齐煮，味道好正！再加上蚬肉，令呢个清润嘅汤水之中增加一道鲜味。
黄埔蛋
黄埔蛋亦係呢度嘅特色菜之一，好多人都专程嚟呢度点呢个菜噶，食起身就好似一匹丝绸咁柔滑。
老板话，煮黄埔蛋好考工夫，唔止要睇实火候仲要够细心，炒出嚟嘅蛋先会油润、细嫩、柔软、入口即化。
杨桃炒鸡杂
平时以为鸡杂会好腥，点知食入口完全冇腥味，仲好香料酒味。加上杨桃嘅酸酸甜甜，成道菜别有风味。
酥炸鱼青丸
完全用鲮鱼肉制成，粒粒都係师傅人手打嘅。入口爽滑弹牙，估唔到鱼青丸都有呢种口感。
鱼青丸外皮裹上香脆嘅面条，食起身卜卜脆，配上鲜甜嘅鱼肉，口感更加丰富。
香蕉卷
睇上去好似春卷噉，其实里面係香蕉嚟噶！不过就唔係普通嘅香蕉，而係自种嘅农家蕉。
一啖咬开，酸酸嘅口味绽放喺舌尖，软滑嘅香蕉慢慢软化，越食越香甜。外层酥脆嘅春卷皮炸到金黄得适到好处，同香蕉绵软嘅口感配合得天衣无缝。
古港香蕉紫菜河鲜汤
嚟到黄埔古港饮咩汤？肯定就係饮呢个古港香蕉紫菜河鲜汤啦，用本地嘅香蕉肉，加上河鲜、紫菜带出鲜味。
呢个汤有润肺止咳嘅功效，特别适合秋冬食用，够晒滋润。
野生塘葛菜煲鲗鱼
野生塘葛菜煲鲗鱼呈淡奶白色，鱼肉已经化作肉渣，尽数融化在汤里面，味道清淡甘凉。
食咗咁多酒楼菜，偶然食下农家菜，真係别有一番风味，嗰种天然淳朴嘅味道，冇太多花多眼乱嘅调料及装饰，简简单单，就係好味道。
正记园林美食
地址：海珠区新港东路石基村(黄埔古港)杨桃园5号(渔塘边)
电话：020-34088038、18928824480
人均：40-60元左右。
路线：
【开车】这里非本村人的车是进不去的，所以开车的要把车停外面停车场，然后走进去；
【地铁&轻轨】万胜围地铁站B出口出来，找个摩的，告诉他到正记园林美食，一般都知道，价格是6-8元，走进去会比较远，所以建议打摩的咯，不过要注意安全！也可以体验一番轻轨，同样到万盛围下车就OK啦~
【坐车】坐229路或者旅游公交3线到琶洲石基村（黄埔古港）总站下，看地图路线行走。
还在为做饭而烦恼吗？还在纠结今天该吃什么吗？
关注美食君微信公众号：meis233（←长按复制）关注回复即可轻松获取食谱！
联系客服
