昨日談較低價買優質股坐定唔郁的策略，記住要「低價」或至少是「較低價」，決定價錢高低，唔係由股票銀碼決定，不是100元的股票就價高，0.1元的股票是價低，係由市盈率決定，反映隻股票賺錢能力相對股價是否便宜，市盈率愈高，代表股價愈貴，唔抵買。
網友迷茫中青有此一問，「陸SIR,聼你講10%投資回報，真係有感而發。 其實看我自己呢 8-10 年的股票+基金投資（作爲會計佬，我有做“月結”的習慣），前前後後，投入過大概100萬，但10年來賺左唔夠20萬 （包括賬面及實質回報）。其中的原因當然包括細個玩玩下炒呢炒路有輸有贏，但當時投入相對少。我自己覺得我做唔到合理回報最主要的原因係 1.一次跌浪可以破壞好多年既正回報。2006/07賺錢開始多左，可以買股的餘錢亦開始多。一場金融海嘯，我因爲覺得自己睇長，我又只買大股/2800 等，所以無止蝕。宜加比低位升返好多，但個 PORTFOLIO 都只係拉勻打個和。之前的很多個10%回報都給抹煞掉了（隻豐到宜加都未返家鄉...）。第2 （都有點類似），我一向有月供股票同基金。經過07入左好多貴貨，雖然09有買到平貨，但拉勻，又係差不多得個吉。」
佢再講:「我既失敗經驗係，在高位，好難清倉（因爲唔知何時是頂，開始跌時亦怕清倉後就回升，左一巴右一巴），大跌市時難免有損失。陸SIR可否分享一下如何在市場大升大跌時，都可以長遠保持10%平均回報？謝謝。」
我話長線投資坐定唔郁的部份，都唔等如完全唔可以減持，如果你覺得股市升得太顛，例如去飛髮三九唔識七的理髮師係咁同你講股，仲話自己炒股賺?好多錢的時候，睇番市盈率，如果升到好離譜，例如內地股市升到50、60倍，香港股市升到30、40倍時，可以開始減持部份長線投資，記住不用一注沽清，沽完再升又沽?，每次沽一半，都可以有排沽，日本股市90年代有超級大泡沫，升到200倍市盈率，若日本人在50倍時沽清股票，見佢日日升，亦可能會好痛，痛唔緊要，怕忍唔住手在更高位入番市。迷茫中青的問題是第一入貨價未必夠平，第二個市升得太顛時完全無減持。升得顛時減持一?，將利潤套現，同自己講，呢一部份賺?40、50%，都夠頂幾年回報要求啦。
這又涉及另一個策略，就係一個「游水策略」，這是中線投資策略，唔長唔短，我認為對一般散戶而言，低買優質股長(例如買指數基金)，係較易處理的策略，相反叫散戶游水進出，唔係咁易處理，弄不好買?貨賺少少走?，追貨又要坐艇。咁我點解仲叫大家都諗諗「游水」的策略呢?
在一個持續大幅向上的升市中，唔游水好過游水，但在上落市中，買股長未必得，所以亦可考慮游水。這裏也可以講一個故仔，也是我去游真水時聽到。幾年前有一次去跑馬地一個富貴會所游水，聽到一個幾富貴的阿伯，講佢點買匯控，佢話「大笨象今時不同往日，以往業績一年比一年好，股價持續向上，買佢坐住唔郁，加埋派息一年20%回報好平常，但而家股價比較呆，坐住唔郁，成年到頭除?收息，股價都無乜上落，所以我咪游下水囉，佢一年都會炒一兩次，通常在公布業績前開始炒，公布完業績無乜大突破就回，每次升到10%，我就沽啦，等低位再買番，游到一轉我賺10%，游兩轉賺20%，都叫做追到以前的回報o架。」我當時諗富貴老伯日日對住股市呢個金魚缸，真係有?研究，留意到大笨象開始弱化，唔游水回報唔夠好的現象(其實已預示佢開始唔掂)。
股市唔係年年大升，有時係小小向上的上落市，如果感受到個市無乜氣氛，部份長線投資有10%回報時，走一走游一游水，未嘗不是增加回報的方法。當然，有一些朋友本身就喜歡在股市進出，唔買賣會身痕，咁樣游水這種中線策略也適合他們。
買股就好像量體裁衣一樣，要找適合自己的方法，我建議投資組合都係以長線的長或中線的遊水為主，佔組合7成或以上，主要買指數股或巨股，其餘3成或以下是比較投機性的部份(年青人想加大投機的比重，唔係唔得，但你要有輸清的準備)。有些市況是逼人投機的，假設如今已是牛市第三期升到好顛時，你當然可以唔買股，但若要順勢買股時，也要明白買親都係投機，40、50倍市盈率，買幾好的股票都有投機的成份，咁就要硬守止蝕，兼且手風順食到咁上下時都要走啦。我講的投資方法，係細水長流，不要求年年倍升，只要求唔蝕兼有合理回報。
陸羽仁
联系客服
