作者：王建华
改编、朗读：王浥清
离开沙枣花盛开个地方尽管已经几十年了，但是伊个故事倒一直辣我心里个某个角落里，搿是段刻骨铭心、挥之勿去个记忆。
刚刚到新疆21团3连，看到个是整齐个土砖营房，清朗个引水渠，一块块条田（搿个条田是农场从苏联学来个耕作农田模式，每块条田长1公里宽0.5公里，佮下来六百亩）。条田搭条田之间呢是林带，由几十棵沙枣树并排种植，延伸一公里。据说，种植沙枣树个目的是防风沙。因为沙枣树枝叶茂密，适合辣贫瘠干旱个土壤当中生长，搿能就变成了防风沙个一堵铜墙铁壁。
搿个辰光勿管是热天还是冷天，军棉袄基本浪是天天要着个。维吾尔族农民常庄用个、有点像锄头个物事，比锄头呢大一眼，名字叫砍土曼，也是阿拉随身勿离个工具。中浪休息，辣沙枣林里向，军棉袄朝地浪向一铺，闻辣淡淡个、甜丝丝个沙枣花香，一歇歇就打昏塗了。不过没多少辰光，班长或者排长个大嗓门就叫起来了：“开工了，开工了”。望望沙枣花，听听布谷鸟个叫声，一个翻身碌起来，又邪气有精神，捞起坎土曼，平地，开筑，去引水渠了……
有几年，我邪气幸运，拨安排当植保员。搿个绝对是个美差哦！自由，呒没劳动定量，最大个好处是呒没班长、排长辣后头催，不过任期末也就一个号头左右。
新疆个春天介来得晏，五、六月份，包谷苗刚刚冒新芽。为了防止地老虎啃苗，就想了个办法：因为大灶头是烧饭拨人吃个，所以借用烧猪食个地方，拿甜菜熬成糖浆，粗糙个搪瓷碗盛半碗，每五十公尺一只，摆辣条田个四周围，用伊来吸引地老虎个飞蛾。
伊个辰光也是青黄勿接个季节，新疆个蔬菜品种本来就少，到五月份，菜窖里存辣海个大白菜老里八早吃光了，主打菜西葫芦还没上市，每日天勿是咸菜汤就是大葱汤。因此，到糖浆快要熬好个辰光，聪明、机灵个战友会得跑到猪圈里，趁看个人勿注意，辣熬糖浆个镬子里狠狠个挖一茶缸，也勿管是勿是烫了，做贼一样滑脚就溜脱；拿到宿舍里大家一道分享。包谷馒头沾糖浆，吃得来是胃口大开。现在想想，阿拉搿是辣搭猪猡分享美食呀！
当植保员个辰光，早浪向人家侪出工了，阿拉就去拿糖浆个碗盖盖牢，常怕辣辣叫个太阳拿糖浆晒干，再记录好每只碗里向有几只地老虎飞蛾。夜快头，太阳落山了，再去㩋开碗盖，搿是最简单个美差。就是有眼厌气，呒没人讲言话。大致情况呢是搿能个：早浪向，晨曦快要散尽个辰光，花个香味道跟牢仔春风里迎面扑过来，走辣拖拉机耕过个、松软个条田里，一脚高一脚低，耳朵边浪有布谷、布谷个鸟叫声；下半天，太阳快要落山了，血血红个云彩遮盖了大半个天空。抬头望望，就可以看到现在邪气有名个旅游胜地，终年积雪个博格达峰。现在人看来，当时搿个工作是老有诗情画意个，每日天就走两圈呀，弯腰㩋碗盖、盖碗盖。搿倷要晓得一日天下来也是勿简单个呀，腰酸背痛。不过比起辣大田里劳动，的确还算是蛮轻松个。当时阿拉年纪轻，睏脱一觉，第二天精神就又好了。
秋天是收获个季节，刚刚进疆个辰光，就是让大家去扳包谷。肩胛浪背只箩筐，每个人两行，走到头就是两亩地。包谷扳下来朝背后箩筐里厾。包谷个杆子啊有得一人介高，太阳晒过以后，包谷个叶片象把小刀片介快。拿水嫩嫩个手背划出一道道血口子，当时勿觉着痛，收工汏手，碰到水了，搿是真个钻心啊！
碰着休息，睏好懒觉，要等到下半天再有得饭吃。搿个是勿成文个规定，休息日脚就吃两顿。于是，几个人约好厊到沙枣林里去，看阿里棵树浪个沙枣又大又红，树邪气高个，还有交关刺。当时辰光，矮小个我没一眼小姑娘个样子，爬到树浪向去，用力摇树杆子，沙枣就劈劈、啪啪个话朝下头落，尽管常庄会得拿衣裳、裤子，手、面孔侪划破脱，不过听到朋友辣树下头叫好吃，就摇得更加起劲了……
虽然讲，四十多年过去了，我已经离开沙枣花盛开个地方了，但是搿些往事像刻辣记忆棒浪一样，永远也呒没办法删脱个。伊只邪气重个包谷米个箩筐，伊眼因为挖冻土块震得裂开来个血口子，涌动过来个渠水，运肥个车夫吆喝个声响，还有挑肥个号子声，毛驴车辣戈壁滩开荒、造田个场景，拿羊群赶进山个牧羊人，因为辣康拜因农机浪做脱粒个生活一个个邪气衰瘏个夜到，辣一百号地里收浆，包谷地除草搭仔辣冰冰冷个水稻田拔草，辣戈壁滩修筑防渗渠个图景；伙房里难得吃得着个香喷喷个大米饭、金璨璨个包谷糊糊，流油个羊肉抓饭，火堆灰里烤热个甜菜馒头，搿眼啊侪是当年个“美食”呀；伊个一抬头就可以看到个高到云里向去个一年到头侪积雪侪积辣海个博格达峰，阿拉亲眼目睹个原子弹升空个蘑菇云，还有望伊戴帽个虎拉山（维吾尔农谚：虎砬山拨乌云遮牢戴帽子了，就可以睏觉勿做生活），还有蓝天、白云、挺拔个白杨，以及伊眼青涩个、朦胧个初恋、暗恋老啥……
联系客服
