故里春秋
从新昌路讲起
作者：朱海洪
沪语改写：边秦翌
推荐：丁迪蒙
（一）
故里，就是故乡个意思。
假使从小生活勒农村，叫故乡；我从小生活勒城市里个，就叫伊故里了。拿故里个风情写下来，就是故里春秋了。
写故里春秋，勿得勿从新昌路开始讲起，因为，我小辰光个所见所闻几乎侪离勿开搿条马路个。
新昌路，是上海滩浪一条勿起眼个小马路，地理位置倒是蛮得天独厚个，勒勒名副其实个市中心。专家考证过，上海个中心点勒国际饭店，而新昌路呢，就勒国际饭店个贴隔壁。
修筑搿条马路是从清朝光绪二十五年，也就是1899年开始个。伊个辰光个上海滩分布了交交关关小河浜，当时个工部局就越浜筑路。造好个马路，北京西路以南个叫做梅白克路，以北个叫做蔓盘路。勒勒民国三年，也就是1914年，整条路改名字了，统称叫梅白克路；到了民国三十二年，也就是1943年，再改为新昌路。
梅白克路位置图
从梅白克路眺望跑马厅
1928年静安寺路梅白克路、跑马厅照片
北望梅白克路入口
新昌路南起南京西路，北到南苏州路，全长有得1150米。整条马路是又短又窄，两旁边有得交关小弄堂，名字呢，大多数是“某某里”、“某某坊”或者“某某新邨”咾啥。
由于勒勒市中心地段，人来人往邪气闹猛个。必过，六十多年之前，只有四、五岁个我，是跟牢仔姆妈、坐勒黄包车浪向过来个，看勿到啥个人，也看勿到车子咾啥，觉着还是蛮荒凉个，只有一幢红颜色个房子还印勒我个脑子里向。伊幢红房子呢，就是新昌路搭仔北京西路交叉口个新闸救火会。
昔日新闸救火会，今日北京消防救援站（今照张渊源摄）
救火会是上海开埠之后，随牢仔租界市政个发展而建立起来个职业消防队，实际浪，伊就是由上海原来个“水龙会”救火组织演变过来个。
旧上海一共有两只租界，法租界搭仔英租界，英租界也叫公共租界。法租界勒勒淮海路一带，公共租界勒勒南京路一带，新昌路是勒公共租界里向个。
当年个公共租界，一共有得六座“救火会”：中央、虹口、新闸、宜昌、静安寺搭仔杨树浦。勒北京西路口个伊只就是新闸救火会。搿是一幢红砖洋房，精致漂亮个门窗透出一种西洋风情，底楼转角处个三扇拱形门，就是救火车个进出口。
早期的中央救火会
讲到新昌路个源头，是因为有新昌大楼，搿幢大楼也是搿条路浪向最高个建筑。新昌大楼一共有得两幢，坐西朝东，占地596平方米。伊个南楼有得六层楼，北楼只有四层楼，侪是钢筋混凝土结构。后首来，大楼成为了新昌中学。
新昌中学，校址：新昌路39号。1985年由南京中学和长沙中学（两校均创办于1962年）合并而成。
南京路边浪个人民公园，老底子是跑马厅。跑马厅要养马个，马厩就勒勒新昌大楼个边浪向。
跑马厅全景图
从梅白克路仰望跑马厅大钟
跑马场总会大楼(钟楼)附近的街景
1948年7月20日拆除北京西路、新昌路口的石翁仲
1981年鸟瞰新昌路、南京西路区域
上世纪二十年代，沿牢仔新昌路，两旁边建造了勿少弄堂。第一条弄堂叫“懋德里”， 1924年造个，砖木结构、侪是二层楼个楼房，一共有得11幢房子。弄堂口有只开锁个摊头一直摆勒海个。从“懋德里”走进去，可以穿到“祥康里”。
懋德里
懋德里弄内
“祥康里”属于石库门里弄，里向一共有得121幢二、三层楼个、砖木结构个房子。弄堂口有家烟纸店个，“文革”个辰光关脱了，一直到了1994年，再重新开张。
祥康里87弄弄口
祥康里115弄、119弄弄口
祥康里115弄口
“祥康里”62号是海关俱乐部旧址。99号有眼革命色彩个：1930年初，中共中央出版发行部经理毛泽民，勒此地建立起秘密印刷站。二楼住人，三楼是印刷、装订车间，主要翻印苏区来个文件、文章，印制有关宣传形势、罢工斗争情况个传单。
勒搿个期间，印刷出版过《党个建设》、《红旗周报》、《布尔什维克》、《实话》等刊物。印刷站负责人叫钱之光，公开身份是底楼烟纸店老板，印刷站个活动一直持续到1932年夏。
（二）
点击下方收听音频，时长7分05秒。
沪语讲述：李群
沿牢仔新昌路往北，走到凤阳路口，搿搭有只凤阳菜场，大清老早，此地人来人往就邪气闹猛了。
新昌路凤阳路东南角，这里原来是凤阳菜场，以前大清老早熙熙攘攘十分闹猛。
新昌路凤阳路西南角：欣昌土特产食品有限公司
凤阳菜场笡对过是“新中邨”，1930年造个，一共有得61幢房子。此地，一开始住个侪是老有“立升”个大人物，后首来，沿牢仔马路造了一排生个平房，夹杂了勿少个小商铺，增加了蛮多个烟火味道。我小辰光，我爸爸常庄会得带我去光顾其中个一只小酒馆，买一包花生米，来个二两红彤彤个五加皮，再来盆猪头肉。伊笃悠悠个自家老酒咪咪、猪头肉吃吃，我勒勒旁边吃吃花生米，嚼得也蛮扎劲个。
新中邨动迁前弄堂内景
新中邨
小酒馆个对过是一幢两层楼个比较“蹩脚”个小平房，平房前头搭出来一只棚棚，专门卖眼大饼、油条、豆浆、面食咾啥个，早浪向个生意是特别好呀。旁边呢，还有只剃头个摊头，好像专门为老头子搭仔小朋友服务个，小青年是从来勿来个。
再朝北去，就是北京西路了。北京西路勒勒老底子叫爱文义路，新闸救火会就勒北京西路295号。
穿过北京路，右手个转弯角子浪有一爿天乐食品店。五、六十年代，店门口有得一只鞋匠摊，搿是个撑拐杖个男人，只有一只脚。只要伊一揩皮鞋，旁边就有勿少小人呆呆叫立勒海看。鞋摊边浪个弄堂叫“道達里”，斜对过是“宝塔弄堂”，弄堂口个石牌坊浪立勒一座水泥宝塔，必过因为勿断受到风雨个侵蚀，顶浪向只剩下来半截了，看上去有眼作孽巴腊个样子。
走过“三成坊”、“松柏里”，就到了“承兴里”。阿拉屋里就住勒“承兴里”，开始辰光是住勒石库门个，到我读小学个辰光，就搬到新昌路街面房子个楼浪向去了。“松柏里”对过，就是我个母校——新昌路第一小学。
道达里
新余里
厚德里
懋益里
学堂搭仔屋里是我小辰光个活动天地。
“承兴里”对过是“三德里”，走过“三德里”、“厚德里”、“树德新邨”、“懋益里”就到山海关路了，勒转角个地方，一眼就可以看到墙壁浪向有一只老老大个字：“當”，迭条路就是“八仙菜场”，早浪向，声音吵得勿得了。
八仙山海关路菜场
新昌路个尾巴是乌镇路桥，走到新闸路边望过去，桥个旁边有得一家邪气有派头个酱园坊，又阔又大个白墙高头，有得一个“酱”字，外头还画了一只神抖抖个圈圈，看上去像只老老大个句号，好像勒勒告诉侬：好了，新昌路到此为止了。
老上海的酱园
几十年呒没回过老房子了，故里个记忆，也好像是越来越淡漠了，差勿多侪忘记脱了。幸亏退休之后，老底子个一眼“着开裆裤个朋友”慢慢叫又侪联系着了，伊拉上门来邀请，让我重新回到老房子，去走走迭条马路。
人走来走去，显得嘈杂、热闹，市井商店个买进卖出，看上去是又熟悉、又亲切，搿眼侪像煞是昨日仔发生个事体，可惜个是，物是人非，熟悉个身影已经看勿大到了。
有趟，我突然之间看到一只熟面孔，是个老太太，但是我一眼就认出伊来了，伊，就是60多年之前关帝庙里向个埃个小尼姑。
关帝庙？里向哪能会得有尼姑呢？我自家也有眼模糊了。但是，仔细想想当年个场景，侪邪气清爽个勒我个眼面前呀。
历史搭仔宗教擦出来个火花，是我懵懂岁月当中闪过个第一道亮光。
“承兴里”，老底子是一条邪气有气派个弄堂，弄堂口口头有得两扇大个铁门，还有看门个人守门个。一到夜里向，看门人就变成功打更个了，勒弄堂里向敲更、巡逻：“笃、笃、笃”，“关-好-门-窗-啰～”“笃、笃、笃”，“平-安-无-事-喽～”
巡逻结束，铁门就关脱了，一个夜里安宁。大清老早，看门个再拿铁门开开来，让人进进出出，伊个派头像煞是官府个衙门。
当然咾，后首来搿扇大铁门就拨拆脱了。为啥要拿伊拆脱呢？呶，伊个辰光中国人开始勿淡定了呀，想跑步奔到共产主义去，乃末就大跃进唻，到处侪勒海搞小高炉炼钢铁，反正是，到勒勒末，大铁门个影子就呒没了，大约摸是送到小高炉里向去烧脱了伐。
（三）
点击下方收听音频，时长6分26秒。
沪语讲述：洪瑛
大铁门个旁边，原来有座“关帝庙”。庙邪气小，日里向总归是敞开半边门。我常庄跑过去探头探脑，好奇心特别强，对牢仔里向个三尊神像瞄发瞄发：红面孔、绿袍子个大将军，一只手勒撩长胡子，像煞勒勒读书，伊个后头还有两个模子高高大大个人，一只黑面孔，一只白面孔，黑面孔邪气威风，手里向还拿好仔一把老大个刀。后来大人讲拨我听，红面孔、绿袍子个是关公，白面孔个是伊个儿子关平，黑面孔个癞带胡子是专门搭关公拿青龙偃月刀个周仓。塑像两旁边还有一副对联，高头写勒海：
孔夫子关夫子二位夫子
作春秋看春秋一部春秋
关公塑像前头摆了只台子，台子浪有眼零零星星个水果糕点，蜡烛台搭仔香炉里向个烟火烊勒海。我勿大看得到有香客来烧香祭拜，实际浪向，搿只关帝庙一日到夜空落落个。
原来，搿搭只必过是一个守寡个女人个屋里。迭个女人是个国民党军官个外室，后来军官勿要伊了。可能是因为伊实在忒寂寞了，精神浪呒没地方可以依靠，就索性拿屋里弄成功了庙堂。外头供勒海关老爷，里向摆好观世音，一门心思吃斋念佛，成为了带发修行个女居士。呒没人能够讲得清爽女居士为啥要供奉关老爷，直到后来，我读了《三国演义》，再稍微有眼眼明白伊个落寞、哀怨。
《三国演义》里向有得一出“关云长千里走单骑”，讲曹操攻下了徐州、下邳，刘备去投奔袁绍，就拿自家个老婆、儿子侪厾拨关云长；当时关公驻守下邳，只好带勒刘备个老婆儿子逃到一只小山浪。同乡张辽上山去劝关公投降，谈定了三只条件：1、降汉勿降曹；2、用刘备个俸禄养两位阿嫂；3、一旦晓得刘备下落，就立马三刻要去寻伊。
关公降操之后，保护刘备个家小跟牢仔曹操到许都去。半路浪向，曹操存心让关公搭仔两位阿嫂住勒一间房间里向。关公只好一只手拿蜡烛，一只手拿刀，通宵立勒门外头。最后，曹操佩服关公个忠义，只好拿伊放脱。当然咾，关公也是过五关斩六将，一垯路里邪气勿容易个去寻刘备。
像关公搿能介傲上怜下，义薄云天，曹操佩服，女人当然是更加欢喜个。勿要讲骑赤兔，舞青龙偃月刀，过五关斩六将个勇武，单单就讲伊忠心护嫂，坐怀勿乱个情操，就配得上“圣”字。所以儒家拿关公搭仔孔子并称为“文圣”、“武圣”。孔夫子彰“仁”，关夫子显“义”，标示儒家学说个“仁义”个核心，演绎千年古国个历史春秋。
所以，女居士供奉关老爷以寄托哀怨，安顿灵魂，是有眼道理个。
青灯古佛、木鱼声声，女居士勒勒潜心佛事当中聊度余生。但是，勿晓得从啥个辰光开始，伊孤独个身影旁边突然之间多出来一个小姑娘，迭个小姑娘就是我后来看到个埃个小尼姑。
香火袅袅，烛影重重，小小个“关帝家庙”又散发开来了一眼温暖个人间气息。
关帝庙里个小姑娘是女居士收养个浙江小老乡，搿是1948年后头个事体了。
1948年12月3号下半日4点钟，一部客轮从上海十六铺3号码头出发，朝宁波方向开。
江亚轮停泊在上海码头
呒没想到，刚刚开出吴淞口，船就勒邪气明显个摇摆了。到6点45分，“咣”一记，像炸雷一样个声音从船个右舷后头传过来。
江亚轮沉没惨状
十几分钟之后，船就开始往下头没，一共死脱了3000多个人，其中。就有得小尼姑个爷娘。
搿就是解放前夕让人震惊个“江亚”轮沉没事件。
（未完待续）
（配图：网络 / 编辑：渺渺）
来源：“上海言话讲起来”公众号
联系客服
