上海话白话：老酒店里吃老酒

 

 

       老早仔上海有交关老酒店，顶顶出名个当然是“王宝和”和“言茂源”了。到老酒店是去吃老酒个，过老酒个菜倒是无所谓个，因此吆上海滩浪有迭能一句闲话，叫啥“菜钿勿能超过酒钿个”。老酒店门口头会有一只摆小菜个台子，上头摆了几只就是上海人讲个“独脚蟹”、（水发干蚕豆）焐酥豆、油氽果肉之类个小菜，到了“秋风起，蟹脚痒”个季节，老酒店里向也卖大闸蟹，拿草绳把大闸蟹扎紧，摆到镬子里煠熟，蘸生姜米醋吃，味道邪气。伲小辰光听老人讲，迭种蟹大多是摆了镬子里煠熟仔吃个，所以吆叫作“煠蟹”，但是上海人写勿来“煠”字，只好用“闸”来代替，就错写成“大闸蟹”，害得有一眼人认为迭种蟹是长了拉水闸里向个，侬讲好笑勿好笑。
       老酒店里个老酒是装了锡壶里向买个，老底子用老秤，一斤16两，一壶12两，老板拿一壶酒当一斤买，先赚侬四两酒个铜钿。乃末上海人拿老酒店个酒壶叫作“吃四”。就是“一斤缺四两”个意思。吃仔老酒难免会得发酒疯，拿仔酒壶乱碰乱掼，老板也勿来讲张，因为拿掼瘪脱个酒壶装酒，一斤勿罢缺四两了，或许缺了五两六两喽。倒霉个还是吃老酒个人，好来吃老酒个人只当图开心，啥人会得去追究迭种鸡毛绿豆能个小事体。