栋栋与茜茜
今天是十一月廿七号，礼拜一。一早起来的的笃笃也蛮忙，迭歇已经十点多了，搭帅哥栋栋，靓妹茜茜讲讲闲话，解解厌气。老了，就是以迭种无聊来消遣。
其实，我从小一直勿欢喜猫狗宠物个。
先生大炜搭二个弟弟从小欢喜养鸽子。鸽棚搭勒亭子间上头个露台浪，寸金地浪搭棚养鸽子实属勿容易，曾几何时，勒静安区也有眼小名气。随着新大沽路个动迁，郭家个鸽棚乔迁到浦东。为了防止窃贼，朋友送了一条部队淘汰个狼狗。先生晓得我吓狗，更覅讲威风凛凛个军用犬狼狗唻！难难板板带回来，也是趁我勿勒屋里个辰光。葛总有碰巧辰光：眼眼调兰克（狼狗个名字）到屋里勿多歇我回来了……乃末吓得我灵魂出窍！
来克真聪明：仅仅搭我有过一面之交，就记牢了。一趟，我有事寻先生，还沒到先生单位个楼下，六楼之上个楼顶，来克就叫了起来，先生马上下楼了。
二个儿子也是爱狗人士。几年前，我和先生在孩子们个安排下入住了目前个新居。兄弟俩瞒仔我买了一条五千多个边牧，吓得我勿敢进客厅……想想还是姆妈要紧，结果弟兄俩拿来克送人了。
至于栋栋搭茜茜，是因为孙儿今年读大学，八月底大儿子夫妻俩送孙儿去学校，屋里个两只猫咪短时期里沒人照顾，送宠物店寄养么又勿舍得，乃末搭先生商量，让先生做我工作……开始一直蹲勒客卫里，勿是我吓伊拉，倒是伊拉吓我啦！
一日一日捱下来，儒雅个栋栋，乖巧个茜茜终于让我从惧怕到勿吓，从讨厌到欢喜了！
侬讲，怪伐？
现在已经是夜里十点一刻了。一个多钟头前，兄妹俩个大便臭气熏人，冲得我隔夜饭也要呕出来了……
欢喜伊拉，毫无怨言！积极主动个搭伊拉做保姆！迭个，勒以前我是做勿到个。
从勿欢喜猫狗宠物到欢喜起栋栋茜茜，先生讲我变了。
现在，我每日夜里半夜里侪会起来到栋栋茜茜个居室看看伊拉，阿有大小便。栋栋特别欢喜清爽：哪怕是半夜，拉了大便伊就会走到门口“喵呜，喵呜”个叫，真可爱！
哎呀，栋栋茜茜赛过是两个小囡，让我欢喜，让我开心！
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。
“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”
图：与人为善 | 编辑：渺渺
联系客服
