沪语朗读：俞镝
东海大楼个书香（下）
作者：马尚龙（刊于新民晚报夜光杯）
改编：丁迪蒙
朗读：俞镝
书真是香啊。书香个意思，原来是指书籍当中夹勒香草发出来个香味道，后来也嫁接到书个油墨味道，勒搿个一段辰光里，书香个意思是，经历了读书无用论个“文革”之后，青年人更加欢喜读书，书邪气吃香。
“数理化自学丛书”个飓风还没退却，“世界名著”个狂风几乎是同时袭来了。伊个辰光，勒任何一个公共场所，侪可以看到低头读书、掩卷而思个场景。走路，乘车，公园个长凳子浪……现在勒多少场合大家可以看到看手机个人，当年就有多少场合可以看到看书个人。中学个女同学再次成为了众望所归个人。
……
交关年数以后，我勒一则重大刑事案件当事人个受访当中，联想到了当年个书香流感。有则央视“面对面”个独家采访，对象就是已经勒一审受审个林森浩。记者搭伊对话，聊到了搭案情无关个读书。记者问，进来一年多了，主要辣做啥？林森浩讲，勒看书。问看啥个书？讲主要看十八、十九世纪个世界名著。问伊为啥要看搿眼书？讲以前教科书看得多，搿种书看得少。问伊看了以后有啥感想？林森浩虽然犯罪，但毕竟是高材生，善于提炼搭仔归纳，伊讲，主要也就是做人个道理。伊个回答邪气好，只是晏了——懂得做人个道理，却失去做人个机会了。
台湾作家龙应台提倡现在个青年人一定要读十八、十九世纪公认个名著。有记者问伊，为啥一定要读介久远个小说？龙应台讲，伊认为，勒搿眼经典著作当中，人性、人文、人本、人道……对人个所有个思考，侪有淋漓尽致个阐述，教会大家哪能做人。伊个“读书论”完全是非功利性个，读书搭黄金屋无关，搭颜如玉也无关，却又是真正个功利性，是有关做人个道理。
我又想到了几十年前个书香流感，虽然交关人并呒没因为读书而达到人生个啥个高度搭仔成功，但是毕竟多了一眼人性人文人本人道咾啥个做人道理。
现在常庄有“拼个是人品”搿能个讲法，蛮有意思个。人品是啥？人品从阿里搭来个？我认为，所谓人品，葛就是一个人对人性、人文、人本、人道、人伦个悟彻搭仔践行，从啥地方去悟彻？读书，一定是条非常好个渠道，当然咾，需要个是好个书。
现在个新华书店，老早就变身为书城了，上海书城也是地标。每次到书城去签名售书个辰光，作为写书个人，对书店当然是充满敬意个。搿几年又有新个地标书店勿断开出来，先是“季风”，目前是“钟书阁”。松江个“钟书阁”已经是老有名气了，静安寺个“钟书阁”更加是占了天时、地利、人和，借牢静安寺个地理坐标，打造出了一只“空中书阁”。我上去一看，侪是年轻人，邪气轧，但也老安静个，坐标个感觉又浮现出来了。
南东新华书店个女同学，应该是已经退休了伐？
图片来自网络
联系客服
