过年

朗读：石铮铮

朗读者

过年

作者、朗读：石铮铮

推荐：丁迪蒙

过年对中国人来讲，又叫过春节。

春节是一年中最重要个节日。回想起老底子小辰光过年，人气足，年味浓。快过年了，一个月前头屋里向大人就开始忙了。封鳗鲞、盐咸肉、咸鸡、咸鸭、咸鱼，做肉圆、挞蛋饺、磨水磨粉包小圆子、做八宝饭。一家人忙里忙外，忙前忙后。为过好年忙了团团转。

老底子过年个辰光，我外婆常常会卤点猪头肉，我最欢喜吃外婆卤个猪头肉，又香又糯，比饭店和熟食店里做出来个好吃，真个是吃了打耳光还勿肯放。

记忆中老底子过年买物事侪要凭票供应个，按大户小户，每户人家会领到配给个购物券，买点过年个黑木耳、金针菜、冰冻蛋等少量年货过节。伊个辰光我就盼望过年，因为平常呒没啥吃，到过年了，就有好吃个物事吃，有新衣裳穿。一到大年三十夜，我会兴奋得勿肯睏觉，要守年等12点钟，敲响钟声新年来到，再肯去睏觉。第二天早浪向起来，搭大人拜年，就会拿到压岁钿。心里邪气开心。老底子大人小人侪盼望过年。

现在物质丰富了，商店里个商品琳琅满目，应有尽有，去超市逛逛看看，鸡、鸭、鱼、肉、鲜个咸个样样有，蛋饺、小圆子、八宝饭用不着在屋里向自己动手做了，只要袋袋里向有钞票，去一趟超市，过年个年货全部可以搞定。相反，现在大家侪觉得过年无所谓了，过年个味道呒没老底子浓了。讲句老实闲话，我现在一点也勿想过年，因为过一年就老一岁，年龄往上爬，体质往下降。从年龄和身体上讲，真是王小二过年，一年不如一年了。拿小囡来讲，对过年个期待还呒没老底子浓了。回过头仔细想想，现在过年为啥年味勿浓，人气还呒没老底子足了。我认为搿也是经济条件决定个。老底子穷，物事少，平常吃勿到，所以大家侪盼望过年。现在物质丰富了，大鱼大肉天天有。夜饭再咪点小老酒。有钞票还可以游山玩水，泡温泉洗桑拿、K歌跳舞蓬嚓嚓，生活幸福又快乐，天天侪勒过年。从物质到精神生活上满足了勿同层次个消费人群。老百姓勿愁吃勿愁穿，所以过年也就没啥稀罕了。

精彩回放：
一语成谶，开年的上海没有太阳
辰光，请侬慢一眼走
巴结
“万宝全书”烟纸店
甜酸苦辣说年货
有一种思念，勿联系，勿打扰
择校勿亚于择偶（三）
择校勿亚于择偶（二）
择校勿亚于择偶（一）
雪花的快乐

图片来自网络