春节，上海人勿吃饺子吃年糕

沪语朗读：陈正平

朗读者

春节，上海人勿吃饺子吃年糕

原创：孔娘子厨房

改编：郭莉

朗读：陈正平（新西兰）

推荐：丁迪蒙

年糕年糕，顾名思义，是过年吃个糕。白年糕、桂花红糖年糕、血糯猪油年糕、鲤鱼豆沙年糕咾啥，侪是叫人一讲起来就两眼放光、回忆满满个好物事。

上海有眼小青年，包括有种上海媒体，过年了吵吵闹闹讲啥“吃饺子”，真是滑稽煞脱了！上海人过年从来也勿吃饺子个，侪是吃年糕个呀！

各种年糕里向，上海人顶熟悉个是浙江宁波个水磨年糕。年糕主材料是大米，讲得严谨一眼，正宗个宁波年糕只用大米，勿戗糯米个。因为宁波出产个当季晚稻，也就是秋天收下来个新米，口感邪气软、滑，经过祖传上百年个“浸水、磨粉、榨水、刨粉、蒸粉、舂捣、做坯”，搿能一道道个工序做成功个年糕，一条条雪白粉嫩，活像宝宝手臂膊个年糕腾空架成井字形，放勒阴凉地方吹干。要是需要长久储存个，葛末就要切片㫰晒，晒成又干又硬个年糕片，吃个前头用清水发开。准备过年个前后半个多月要吃个，就整条头摆勒水罐头里保存，三五天换一趟水。

我外婆屋里是宁波人，尽管外婆老早离开乡下跟外公到上海来了，并呒没严格遵循乡下头过年个习俗，亲手做宁波年糕，不过呢，逢年过节屋里宁波年糕是一定会得备好个。

外婆最擅长个就是荠菜、冬笋炒年糕，或者是咸菜肉丝汤年糕。春节到外婆屋里去拜年，要是吃夜饭，我就盼勒海下半日早点到外婆屋里，外婆看见我就笑眯眯个，还会得炒一小盆荠菜冬笋年糕拨我“垫垫肚皮”。雪白黏糯个年糕片浪向沾了翠绿个荠菜，粉黄个冬笋丝，呒没肉丝，味道还是介鲜，还有一眼眼铁镬子焦香个镬气，让我迭能个小姑娘一面吃，一面对人生个烟火充满了美好个憧憬。

外婆个汤年糕一眼也勿输拨伊拿手个咸菜大汤黄鱼。关键就是宁波水磨年糕特有个细腻、柔滑、糯软，还有小半个原因末，大概要算伊选购咸菜个本领。宁波人拿咸菜叫咸齑，外婆选梗子细细叫个，颜色青黄个雪里蕻，雪里蕻从新鲜辰光㫰晒到腌制辰光长短，侪候分掐数逃勿出外婆个“毒”眼睛。外婆个咸菜肉丝年糕汤里有辰光放点冬笋丝，有辰光放点鲜蘑菇片，汤水蛮宽个，调羹舀起年糕搭仔半口鲜汤一道滑进嘴巴里，酒足饭饱，来一小碗年糕汤真个是由里到外讲勿出个适意。

到迭歇辰光，板要乖乖叫搭外婆讲：“外婆，侬烧个小菜比阿拉屋里向烧个好吃一千倍！”讲个辰光覅去管姆妈个眼神，但是讲好搿两句言话，一定要快点从红木鸭蛋凳浪向滑下去，逃走为上策。

外婆年纪大了，牙齿勿大好，有点忌讳吃黏性大个物事。偏偏桂花红糖年糕搭仔血糯猪油年糕是伊个心头之好，我个阿姨伊拉过年前头侪要到南京路沈大成，苏州采芝斋去买迭眼物事来孝敬外婆。外婆焖饭辰光拿只小碟子，搁几片糖年糕勒饭浪向蒸一蒸，偷偷叫跟我分享。我至今记得有一趟我瞒牢表弟吃猪油年糕，实在忒烫了，一块透明个糖渍猪油“卟”一记勒勒我个嘴巴里向炸开，蜜汁横流，我是又慌乱又有一种莫名个幸福。

桂花红糖年糕蒸软了当点心吃。年糕先是搭牢筷子，接下来又搭勒嘴巴里个天花板浪向，大多数人怕伊忒甜勿敢多吃。我欢喜勒勒炒菜个辰光，先厚厚叫切几片糖年糕用小火煎一煎，喊屋里向人先一道吃两片，然后我再安心拿三菜一汤慢慢叫弄好。

传统吃年糕还有一种相当有形式感个方法，就是放勒火浪向烘烤。炭火缸里放一圈铅丝网，大块个白年糕搁勒上头烤到焦斑出来，看牢伊突然吹起只大泡泡，再过脱一歇，泡泡“噗呲”破脱，实在是邪气开心个。年糕烤软了拿出来，蘸绵白糖或者鲜酱油吃。小辰光屋里向有只烤面包片个网夹，有辰光我放学回来，屋里向呒没人，我就用伊拿年糕夹牢，勒勒煤气灶浪烤，一口气可以吃下去一整条个年糕。当时年糕还是有计划供应个，我应该是饿得发呴了再去偷吃个，勿晓得爷娘是勿是发现过。

贫穷搭仔饥饿已经离开阿拉长远了。吃饭辰光，台子浪毛蟹炒年糕一年四季侪可以有，汤年糕，炒年糕作为主食，邪气容易打发一顿中饭。手指年糕可以配火锅，做韩国辣年糕。要是拿年糕米浆塑型，做成金红色个大鲤鱼，鱼肚皮里囥一包蜜甜个豆沙，好像八宝饭伊能，又讨人欢喜又好吃。

欢喜弄弄手作个达人自家做年糕，口味当然是随心所欲个。我看到网浪勒勒讲争，做年糕大米跟糯米个配比是7：3呢；是6：4呢，还是5：5。我勒勒一个旅游区过民族节日，伊拉勒露天广场摆了大石臼，大家举了粗壮个木榔头，嘻嘻哈哈朝石臼里向舂（song）年糕，简直赛过参与行为艺术表演。工作人员号称迭个年糕是糯米成分占一大半个，伊拉以为用料奢侈就是好物事，结果糕团太黏，木榔头舂进糯米团里拔也拔勿出来，迭个年糕口感想必勿会哪能好吧。

现在大家再也勿会吃筋吃力个用手动石磨来磨米浆了，侪是拿米浸勒水里泡一夜天，再用电动料理机、破壁机咾啥打成浆，然后过滤、蒸熟，再舂、揉成需要个样子。其实米浆蒸熟之后就是年糕团，趁热吃顶好。

可以想象宁波乡下过春节前繁忙个舂年糕景象，年糕勒大蒸笼里透出馋煞人个米香。小囡侪跑过来捣乱，外婆随手抄起一团年糕，再从菜碗里夹一筷子咸菜肉丝塞到年糕团里拨了伊，搿种好滋味等到小囡长大之后，随便勒勒天南地北，侪是一生一世勿会得忘记脱个。

精彩回放：
归彼大荒（下）
归彼大荒（上）
我欢喜侬现在个样子
做蛋饺
螳臂当车
咸肉
外滩个迭根老木桩
出租车个祖师爷——黄包车
小辰光过年
新年，你好
过年

图片来自网络