沪语朗读：王浩峰
凡人凡事：爱个反省
作者：周云海
文字修正：丁迪蒙
我看重家庭亲情，无论是我个小家还是我个原生家庭；我爱我个家人，爱生我养我个爹爹姆妈。
弟弟妹妹、妻子儿子个生日，好像自家个住址记勒心浪；勿晓得哪能，记牢爹爹姆妈个生日好像老难个。有辰光，看到相关记载有爹爹姆妈出生日脚个证卡以后，我会得留意默记勒心里，但过后总勿能像弟弟妹妹、妻子儿子个生日伊能记得牢。迭个是勿是勒我个潜意识里，亲情偏倾年齿小于我个弟妹以及妻子儿子小家，而忽略了含辛茹苦养育我生命个爹爹姆妈？
扪心自问：爹爹姆妈勒我心中个情感分量确实是重中之重！
爹爹姆妈拔我浓情绵恒之爱，让我个生命涌动着血亲暖流。我铭记勒海感念爹爹姆妈个恩情，却疏于耕耘感恩个心田。比方讲，我爹爹姆妈从来勿为自家过生日，我迭个做儿子个也勿上心，甚至还记勿牢爹爹姆妈个生日。其实对爹爹姆妈，尤其是对垂垂暮年个爹爹姆妈个生日，做子女个需要有一番仪式感表示，仪式无所谓简单隆重，有表示、有心意就好。
一直以为自家邪气爱爹爹姆妈，但勒我与爹爹姆妈相处个漫长岁月里，却浑然勿觉我爱个短板。
子欲养而亲勿待。直到爹爹去世之前，我再发现我迭个爱个短板竟然是迭能个扎眼锥心。去年9月初，我姆妈看到爹爹身体状况邪气糟糕，常怕睏勒床浪个爹爹会熬勿过伊个生日9月15日。此后，每一次个日出日落，侪成了阿拉屋里人心里忧心个祈祷……
9月10日凌晨4点零8分，勒医院病床旁边，我拿爹爹个生命送出了迭个世界。从此，9月10日搭仔9月15日迭个两个日脚深深痛痛个刻勒了我个心里向，再也勿会忘记。迭个是我爹爹个生死纪念日。
勒爹爹离去以后个日脚里，我对伊个追思绵绵勿绝：时而是形象回忆，时而是睹物思人；有辰光是呆笃笃个思想，有辰光又会得有突然个闪念……
姆妈讲：老头子走了以后，我呒没一日天勿想伊，伊哪能一只梦也呒没托来过……
突然有一天，我觉着看到了爹爹。伊坐勒客厅里勒吃只饼，我立勒旁边。吃好饼，爹爹讲绿豆糕蛮好吃个，想吃绿豆糕。我讲，屋里呒没绿豆糕，等下趟我去买来拔侬吃……突然梦醒。拿起手机看，刚巧是爹爹走个凌晨辰光。
迭能介个父子相见，立时三刻有盈盈眼泪水滚落枕巾……我勒迭能个凌晨悲伤个送走了爹爹，也是勒搿能个凌晨欣慰个迎来了爹爹。我努力拿思想归归拢。猛然惊悟：几个号头前头，爹爹勒屋里吃过绿豆糕，屋里人还问伊吃个啥，回答是绿豆糕，讲好吃。
绿豆糕好吃，爹爹欢喜，我也欢喜。
好吃个绿豆糕，穿越了阴阳时空，模糊了生日忌日，浓聚了我对爹爹永无止境个爱搭仔思念，爹爹，魂兮归来！
往期回顾：
图：网络 / 编辑：渺渺
联系客服
