沪语朗读：王浩峰
作者：魏福春
沪语改写：荣梅
朗读：王浩峰
外公勿是本地人，是退休之后过来个。
外公勿习惯搿搭个生活，也呒没朋友，做啥个事体侪要小心翼翼个。譬如，喉咙痒了，是勿可以随便“啊呸”个；吃香烟，是勿可以蹲勒屋里向吃个；吃老酒，每天夜到只好吃一小杯，多一滴也勿可以。囡儿管得老紧个。伊看到囡儿，一点“毛腔”也呒没，眼睛里侪是欢喜呀。还有一点，伊特别欢喜外孙。小家伙读幼儿园大班，长得虎头虎脑个，像伊个娘，当然喽，也像伊迭个外公。
外公人勿长，粗粗壮壮、蛮结实个。伊也真个有力道，搿个老张印象老深刻个。老张搭伊拉屋里住楼上楼下。伊个初秋个周末个黄昏头，高温还呒没退脱，老张刚刚坐到车子浪快点就逃出来了，因为车子里向拨太阳晒得热气腾腾。伊豪扫拿空调开开来，车门关关牢，等车里向个温度下来了以后再上去。
搿个辰光，外公个夫人、也就是外婆摇仔一把扇子从大楼里向走出来了，搭平常日脚一样，优哉游哉，慢慢叫散步个节奏。外婆体态丰盈，人比外公还要高出一只头。呒没任何征兆，伊突然之间歪倒勒无障碍通道浪。老张一吓，想要过去，就看见了外婆身后头个外公。外公来煞勿极冲到了外婆个身边，一边讲点啥，一边就伸出手想去拿伊搀起来。啥人晓得，外婆用力个捺伊甩开，起身朝前走了。外公看牢仔伊，呒没跟过去。没想到，外婆刚刚走了没几步，又掼倒勒地浪向，外公笑了笑，勿紧勿慢个上去，外婆却是勿让伊靠近自家。外公扫了一眼老张，面孔浪向个笑有眼尴尬，一弯腰勿讲啥个闲话一把头就拿外婆抱起来，随便外婆哪能犟，拿伊抱到屋里去了。
伊拉夫妻两家头发生了啥个事体，老张是勿晓得个。夜饭吃好，两个人仍旧是一前一后出去散步了，夜快头个事体像煞呒没发生过，几天以后，外婆一家头回老家了，搿趟回去再也呒没来过。外公也回转去过，隔脱仔几日天又转来了。伊舍勿得囡儿，自然，还有外孙。
伊个囡儿上班老忙个，每日天要进出小区好几趟。伊老早个单位离屋里勿远，电瓶车一歇歇就到了，伊个辰光，伊个儿子还呒没到去幼儿园个年龄。后来调了单位，每日天早浪7点钟，出租车准时停勒楼下——伊要赶辰光。中浪再乘出租车回来。没多少辰光，伊就自家开转来部白颜色个SUV。也就勒搿个辰光，外公退休了，带仔外婆到了此地。
外公外婆个到来，无疑是及时雨，尤其是外公，每日天早浪搭囡儿一道下楼，指引囡儿拿车子顺顺利利开出小区；夜快又早点到楼下头去等囡儿回来——囡儿车技勿好，每一趟停车侪像煞是一趟考试。
外公勿欢喜搭人家讲闲话，楼浪楼下邻居电梯里碰着，人家搭伊打招呼，伊总归回复：嗯、啊，接下去就眼睛朝别地方看。唯一个一趟跑到邻居屋里，还是因为伊个外孙——伊日下半日，外公要到幼儿园去——接送小囡是外公个一项主要任务，外婆回老家以后，“买汏烧”也侪由伊负责了。搿日天女婿休息，伊欢喜打游戏，废寝忘食，平常辰光屋里向个油瓶倒下来也勿会得拿伊扶起来个，今朝竟然邪气体贴，要丈人歇脱些，伊自家去接儿子。
步行到幼儿园大概也就十分钟辰光伐。想勿到小菜已经摆好勒台子浪，囡儿也回来了，还是呒没看见伊拉个身影。囡儿急了，怪老爸为啥让伊去接儿子？囡儿对迭个“伊”明显是勿放心个。
父女两家头急急忙忙个下楼。天色老里八早暗下来了，勒小区门口头伊拉看见了勒打电话个、团团转个女婿——儿子原本是跟勒伊身后头个，快到楼下头辰光，伊关脱仔游戏转过身，再发现儿子已经呒没了踪影！
接儿子侬也要打游戏啊！囡儿是气得差点昏过去了。
小囡是老张带回到自家屋里个。小囡勒小区勿远个超市里向白相得乐不思蜀呀。是饭后散步、顺带便买包香烟个老张看见了，拉牢仔小囡跑回去个……
搿日天夜到，外公第一趟到楼浪个老张屋里去，伊要好好叫谢谢老张，老张也因此晓得了，外婆是拨女婿气得来勿得了再走脱个。外公讲：家主婆吃勿消，一走了之，我好走伐？讲迭个闲话辰光，伊个眼眶里向竟然有得眼泪水。老张点了点头，又摇了摇头，伊勿晓得哪能介回答……
往期回顾：
图：网络 / 编辑：渺渺
联系客服
