作者：朱海洪
沪语改写：边秦翌
沪语讲述：冯济民
台风潮汛个辰光发大水了。一帮子小朋友就撩起裤脚管，勒勒新昌路、北京路浪“哗啦、哗啦”个临波微步划大水，迭个是水趣；
寒冬腊月，飞雪飘零。勒勒弄堂里向滚雪球、打雪仗、堆雪人，白相得开心，迭个是雪趣；
热天介个夜到，跑到三楼阳台浪向看市井小民乘风凉，短裤赤膊个邻居男人勒自家个门口头洒清水，勒竹椅浪芭蕉扇摇摇，乘乘风凉；四周还有眼静勿下来个小囡勒奔来奔去。我呢，搭仔隔壁阳台浪个同学沈震威，两家头隑勒铁栏杆浪，望望星空，聊聊宇宙：天浪向个星星有得几化啊，宇宙个边际线到底勒勒阿里啊。山胡一直嘎到微风拂面，燥热散尽再回到房间里去睏觉，迭个是热趣。
当然咾，最好白相个童趣还是要讲一讲 “官兵捉强盗”。
官兵捉强盗
迭只游戏通俗叫法是“勿许动”。我常庄勒礼拜天到“懋益里”去白相“官兵捉强盗”。我有得勿少个同学住勒“懋益里”，同班个，其他班级个侪有。搿条弄堂清爽、开阔，邪气适宜小朋友勒勒此地追逐打闹。
“官兵捉强盗”游戏要分成功两派人，一派“官兵”，一派“强盗”。先要确定两派个头头，再由迭两个头头“猜东里东猜”，挑选各自个“官兵”搭仔“强盗”。小朋友侪欢喜当“强盗”，因为“强盗”比较自由。拨挑选出来当“强盗”个侪开心得勿得了，当“官兵”个呢，就有眼垂头丧气了。
“懋益里”弄堂口进门右转是一条狭窄个小弄堂，搭仔左右两边个大弄堂形成了一只丁字形，大本营就设勒迭只夹弄里向。
游戏开始，“官兵”侪遮好眼睛，头枕勒交叠个手臂浪靠牢墙壁。等到“强盗”侪迓好囥好，“官兵”就开始商量分头去捉“强盗”。假使讲寻到并且捉到“强盗”，“官兵”可以用大拇指搭食指比成功个“八”字，像煞是一把驳壳枪顶勒“强盗”背心浪，叫“勿许动”，就算是捉牢了。挨下来还要拿“强盗”押到夹弄堂个大本营里去关起来，派个“官兵”看勒海，其他个还要继续去捉“强盗”。
“强盗”可以救“俘虏”个。假使“强盗”趁“官兵”勿当心，冲到大本营，用手碰着“俘虏”，就算救出来了。假使拨捉起来个“强盗”有得好几个，伊拉还可以手拉手变成功人链，人链个一头勿可以离开大本营，另外一头可以跑出圈子，邪气活络个等勒海自家人来救，只要碰着冲过来营救个自由“强盗”个手，人链浪向个所有人就侪得救了，一道重新成为自由个“强盗”，游戏再继续进行。
假使讲，所有个“强盗”统统拨捉起来了，葛末角色就要互换，“官兵”弹冠相庆，变成功“强盗”了，前头个“强盗”呢，只好当“官兵”，游戏再重新开始。
迓起来、搜寻、捉人、营救，比拼个是体力搭仔智力。弄堂里向到处侪是小囡兴奋个呼叫、狂奔个脚步、还有掼倒个叫声、捉到或者救出来个欢呼声。
迭只“官兵捉强盗”个游戏狂野、刺激，奔来奔去，打打闹闹，有辰光会得弄假成真。两个小囡推推搡搡就用沪语小调相互骂了：“叫侬一声阿六头，何必搭我掼浪头。晓得侬从小跑码头，能识人头轧苗头。摆摊头、搬砖头，生意做得起蓬头。本来有点额角头，侬当自家亨榔头……”
阿六头气得来是阿噗阿噗呀：“啥人摆过摊头、掼过浪头啊。”一看，伊是小三子，阿六头搔搔头皮就还两句：“侬搿小瘪三，手拿小洋伞。身披夹克衫，去爬花果山。前山勿走走后山，屁股跌得纷纷碎。”吵归吵，骂归骂，呒没过几天，小三子搭仔阿六头“相逢一笑泯恩仇”，又勒一道白相“官兵捉强盗”了。
童趣天成，往事随风。
儿时个欢乐如今只能勒勒回忆当中玩味了。
往期回顾：
图：网络 / 编辑：渺渺
联系客服
