深夜無人睇，靜靜雞講故仔……
《我老婆由細到大都好鐘意紙紮公仔》
最近我老婆怪怪地，佢經常都會買啲紙紮物品比自己，例如手袋同首飾。我每次見到都覺得好恐怖，但老婆就話好靚，反問我點解唔可以買？而每一次佢都會拎出嚟擺喺鏡面前慢慢欣賞，仲會癲到拎嚟用。
我有時會語重深長同佢講，我話：「呢啲紙紮係燒比死人用架，我地點會拎嚟儲架，你仲離譜到拎嚟用！？」
但每次想討論都會變成爭執，佢理直氣壯咁反駁我：「儲有咩問題？任何嘢都可以儲架喇，點解紙紮就唔可以儲呀？」
由於每次嘈交都惹起佢激動情緒，始終老婆細細個就有過抑鬱症，情緒唔係太穩定，所以我對於佢呢個「癖好」唯有隻眼開隻眼閉，但有時都會思量一下，覺得佢講嘅嘢如果換個角度睇又真係幾有道理，呢家咩都可以收藏，點解紙紮就唔可以收藏呢？
不過，老婆後來愈嚟愈過份，佢不斷買好多唔同類型嘅紙紮物品返屋企，體積愈嚟愈大，唔再係手袋、電話，而係大屋，甚至兩個同我差唔多高嘅紙紮公仔，我覺得已經遠遠超出我接受嘅底線。
我地有一個三歲嘅女，我有次返屋企見到個女喺到玩緊架紙紮車車，仲玩得好開心，我即刻衝上去阻止佢玩，嬲起上嚟仲即埸撕爛架車，個女見到我咁做，不斷失常地喊，喊得一發不可收恰，喊得令我更心煩。
老婆喺廚房聽到喊聲出嚟，見到地下成堆紙碎，就發哂癲咁罵我做咩撕爛咗車車，話個女玩得好開心好鐘意，唔明我點解成日插手阻佢呢樣阻佢𠴱樣。
我見佢呢個反應，我情緒都失控，於是激動同佢對罵：「你收藏係你嘅事，有咩理由比個女喺到玩呢啲紙紮車？呢啲係比死人用架！唔係我地用嚟玩架！」
老婆嬲到廢事同我講，捉住個女去雜物房，呢間雜物房正正就係收藏咗大量紙紮物品……而最詭異嘅係，個女一入去就即刻收聲，展露返笑容，開心咁喺到望住啲紙紮公仔。
我忍唔住搵老婆阿媽傾下呢件事，因為老婆嘅父母細細個就已經離咗婚，一直都係佢媽媽湊大老婆。
「阿媽，我真係頂唔順你個女，佢鐘意紙紮公仔我都算，佢要收藏拎嚟用我都算，有咩理由比個女去掂去玩呢啲嘢？一整爛佢啲紙紮就發哂癲咁，好似拎佢條命咁，你話係咪有問題？」
伯母聽後一臉無奈，佢回憶起我老婆細細過時候已經好奇怪，有一日帶佢行街經過一間紙紮鋪，佢竟然話啲嘢好靚，仲話好平想買嚟用。即使伯母不斷解釋紙紮物品用途，但老婆都係心有不甘，估唔到愈大愈過份。
「你不如就一就佢，唔好再為呢啲事傷兩公婆感情喇，你又唔係唔知個女有情緒病。」伯母似乎想我接受呢件事，我覺得好似問題變相落喺我到咁。
有晚凌晨，我突然覺得口啖啖想起身飲杯水，經過個女間房時想順便望一望個女，開門一睇，見到張床空無一人，我嚇到入房周圍搵都無，於是跑出廳同廚房廁所搵都無，最後我打開雜物房一睇，我見到個女瞓喺一間由紙紮造嘅大屋入面，一路瞓一路展露詭異笑容，令我感到十分心寒。
嗰一晚，我完全瞓唔到，諗咗好耐究竟點做好，最後我決定咗做一件事。
我趁老婆落街買餸，我將屋企所有紙紮嘅嘢拎出嚟，然後喺廁所一把火燒哂佢，望住成堆垃圾被燒成灰燼，我就開心。但唔知係咪我多心定係聽錯，當我望住呢埋紙紮燒緊時候，我隱若聽到火堆之中有把令人心寒嘅恐怖叫聲，而且仲有啲熟悉感覺。
老婆開門後，聞到廁所有一陣燒濃味，就掉低哂所有嘢衝入廁所睇，一望之下，見我燒哂所有紙紮。佢即刻發癲，癲嘅程度更超出我想像，佢雙眼發紅，臉露兇光一路瞪住我，有一刻我真係覺得佢會殺死我，佢最後一言不發咁關自己喺房，而我都唔敢打擾佢，一心諗住比佢冷靜下。
我將呢件事話比佢阿媽聽，佢話會打比老婆傾下。
過咗幾個鐘，佢終於開門出嚟。
「我諗通咗，我唔會再儲呢啲紙紮。」老婆雙眼紅腫，整個臉容都出現疲態，目無表情地說，似乎都喊得累了。
「咁就好……你要儲其他嘢我唔反對，但紙紮就……」我話未說完，老婆就轉身走了。我見到佢落寞身影，不禁無奈地嘆息。
後來，老婆真係無再買紙紮物品返嚟，但就出現另一種奇怪行為。
老婆不斷將自己嘅嘢燒咗佢，有一次我見佢將部Iphone燒，我嚇到即刻問佢點解要咁做，部機仲要岩岩新買無耐。
佢聽到我咁問，一臉疑惑，就好似唔知道我點解會有呢個問題。
「我要用就梗係要燒。」老婆回應著。
我驚訝得唔知點回應佢好，而事後老婆將佢手袋、錢、衫褲通通都燒哂佢，攪到自己經常赤裸咁喺屋企行嚟行去，有次夜晚氣溫得10度，我同個女都著到好厚嘅衫保暖，而老婆就赤裸著，明明佢已經凍到成身震哂，鼻水直流，不斷打哈痴，但佢聲稱一啲都唔覺得凍，仲話件衫好暖。
為咗佢身體著想同唔好赤裸落街，我都會逼佢再著多幾件衫，同埋我因應疫情影響，開始要求「在家工作」好好睇住老婆。
但每次見到佢咁，我都覺得好心寒，同時間，又覺得心痛，為咗唔刺激佢情緒，我都由佢不斷燒自己嘢，而我地廁所入面每一晚都會不斷傳出燒濃氣味……
我見事態嚴重，我同佢阿媽商量過，決定要帶老婆去睇精神科醫生，但可惜一切太遲。
當我同佢阿媽返去我屋企樓下時，已經見到大量消防車喺到救緊火，一查之下原來係我屋企著火。
我嚇得係咁問附近警察我老婆有冇事，而最後消防員喺我屋企抬出一具燒焦嘅屍體，應該係我老婆嚟。
我同佢阿媽見到後都失聲痛哭，完全無諗到會攪成咁，估唔到我老婆趁我出去期間，將成間屋都燒咗去，包括佢自己。
但有樣奇怪事情，就係場火無論幾大都好，都無累及到其他人，隔離屋完全毫無影響。
事後我鄰居同我講返，佢地聽到我間屋入面一路燒，一路傳出我老婆發出嘅恐怖笑聲。
當我以為件事告一段落時，後來我發現原來背後並唔係咁簡單……怪事仲要發生喺我三歲女身上。
（待續）
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
希望大家比like或share或多多留言給啲支持！
你地既like 就係我寫作動力～大家要瘋狂留言呀～
夠3000like 或者反應好嘅……我拿拿淋聽晚出埋佢！
記得follow ig：https://www.instagram.com/homing0624/
另外，我暫時偷偷地放隻限量預售link比大家預訂本書
如果大家鐘意《孔明古怪故事集》，記得支持我，買返本。
記住呀，《紙紮公仔》只係故事集其中一個故事咋～本書入面仲有好多故仔架～計返都係幾蚊雞一個故仔…
希望大家支持，但由於限量預賣，所以數量有限，買完即止，希望趕到復活節印起到比大家。過幾日我再出post 正式向大家預賣～
可以喺到買
購買網店：https://homingming.boutir.com/
某晚深夜放工，帶著疲倦身體搭小巴返屋企時，發現身旁個男人竟然擁有超過三十幾把鎖喺身，望一望佢個樣，見到佢痛苦表情，嗰雙眼好似對人生充滿絕望般一樣，我完全想像唔到呢個人究竟內心存有幾多心事同唔開心從而生長咁多把鎖?
「先生，你有冇事?」我擔心地問。
佢望一望我，再望一望自己，拎起胸前數把鎖，苦笑地說:「又多咗幾把鎖......」
「其實你係咪有心事? 不如去睇上心理醫生好嗎?」
那男人苦笑地搖頭，然後說:「無用，如果醫生可以幫我解決，我一早已經解決左。」
「但係你咁樣......」
個男人閉上眼，我見佢好似想瞓陣於是就唔打擾佢。過咗陣，我要落車了，我八掛地再望一望個男人，發現佢無任何表情同呼吸，由於佢生左好多把鎖，上車時已經吸引車上好多人同司機注意。
司機從倒後鏡望一望，即刻爆哂粗咁講:「屌你老母.....要死就唔好死喺我架車到啦屌你!生咁多把鎖喺身把撚咩.......咁撚灰嘅話好心就自己屈埋一邊死咗佢算喇!」
車上頓時紛紛加入討論，有人報專屬「清理部門」執屍，亦有人同司機一樣認為呢類人應該滅絕，對社會無貢獻。
事後我就無再理會，我落車後一直係到沉思，腦海一直出現個男人嘅畫面，鎖鏈與鎖鏈之間嘅摩擦聲不斷係我耳邊出現。
（點擊看全文）
深夜無人睇，靜靜雞講故仔……大結局
《我老婆由細到大都鐘意紙紮公仔》
「我爸爸究竟幾時先會醒？」靜妍擔心地問。
「劉生佢個後腦受到撞擊，積咗唔少血塊喺入面，所以到呢家都一直昏迷。但如果我地開刀去拎走血塊就太危險，所以要再觀察一下會唔會惡化，至於幾時醒，我地真係答你唔到。」醫生說。
靜妍聽後頓時感到傷感，望住瞓喺病床中嘅爸爸更顯得有種無力感。
返屋企途中，靜妍一臉憂愁，諗返起嗰晚所發生嘅事就好唔開心。佢估唔到自己一踏入屋，見到爸爸想燒佢啲心愛紙紮朋友，一時之間控制唔到情緒，就隨手拎起支棍將老豆打暈。
雖然事後話爸爸跌親撞到個頭，警方無懷疑到佢，但靜妍已經相當後悔，因為呢個世界上面，爸爸就係靜妍嘅唯一至親，佢唔想失去咗呢個爸爸。
佢同自己講，如果再有紙紮同老豆兩項選擇要佢揀，佢一定會揀老豆。
返到屋企後，靜妍見到眼前一堆紙紮，雙眼從空洞之中變得活躍起嚟，頭先對於紙紮嘅抗拒之心一掃而空，反而內裡嗰股激動興奮心情不斷湧現，佢心諗老豆既然唔知幾時先醒，倒不如好好盡情做自己鐘意做嘅事，於是心情突然180度轉變，展露笑容咁收拾紙紮玩具。
而靜妍每一晚都會好細心咁幫紙紮公仔掃塵清潔，亦開始物色唔同嘅紙紮家居用品。久而久之，成間屋企都好似一個紙紮家居設計咁，所有傢俬都係用紙紮製成，令到靜妍非常興奮。
由於紙紮用品佈滿整間屋，而紙紮都有其獨特氣味發出，靜妍不時用力聞一下，當聞到紙紮味道時，就好似感覺到自己被一堆紙紮所包圍自己，充滿溫暖嘅感覺。
但呢種滿足感，只有屋企先可以帶到比佢。
一踏出門口，靜妍望一望自己，見到自己著嘅衫褲，見到自己用嘅銀包，見到自己所著嘅鞋通通都唔係紙紮所造，佢頓時覺得討厭，甚至覺得自己背叛咗紙紮一樣般內疚。
每次返到大學，靜妍都忍唔住去廁所嘔，因為佢討厭件衫所帶出嘅氣味，佢恨不得返屋企換返紙紮造嘅衫褲。
靜妍知道自己唔可以再咁樣落去，佢希望可以將紙紮變成每個人都會接受嘅日常用品，但奈何自己唔識設計亦唔識製造紙紮，於是佢想搵一個可以幫到佢設計鐘意嘅紙紮，又唔會當佢變態嘅人，於是佢做咗唔少調查，最終將目標鎖定讀緊大學時裝設計系嗰個無咩地位，無咩存在感嘅學生。
佢叫家銘。
家銘係一個典形毒男，雖然時裝設計能力強，成績優異，但往往比人印象係無朋友，亦唔識打扮自己同人地溝通，所以好多實習機會或人緣都無佢份，令到家銘非常自卑。
呢個時侯，靜妍竟然主動親近佢，並欣賞佢嘅設計能力，呢點令到家銘受寵若驚，估唔到能夠吸引到如女神般嘅靜妍。
「係呢，你想我幫你設計啲咩衫？」家銘問。
「想知？今晚嚟我屋企。」靜妍故意賣弄關子，令到家銘個心十五十六，唔好話同女性相處，連人地屋企都未去過。
當晚，家銘盡佢個能力將自己打扮得好好睇睇，務求配合返靜妍對佢嘅主動。
「叮噹。」家銘按了門鐘。
當靜妍一打開門時，內裡嗰股紙紮氣味即時撲出嚟，一時之間令到家銘唔係好接受得到，於是用手掩一掩口。然而，佢竟然見到靜妍全身衣服古怪奇異，望真啲，竟然係著住件紙紮連身裙！
「你條裙……？」話未說完，家銘已經留意到屋內所有擺設都係用紙紮而做，驚訝得目瞪口呆。
靜妍捉住家銘隻手，然後溫柔地為佢逐一介紹傢私。
「呢個紙紮茶壺。」靜妍然後開水龍頭，將水倒入呢個紙紮茶壺，好快呢個紙紮茶壺就被水整濕，慢慢爛掉。
「始終都係用紙造，一濕水就玩完。」靜妍為呢個已廢嘅紙紮茶壺而感到難過。
靜妍緊緊地捉住家銘隻手，哀求說：「所以我想你設計出一個可以裝到水嘅紙紮茶壺，可以著出街嘅衫褲鞋襪……
家銘覺得靜妍痴咗線，於是甩開佢隻手，想轉身離開，但由於太過震驚，家銘不斷退後，期間誤打誤撞，撞掉一個紙紮公仔。
佢正想執返起佢時，佢見到紙紮公仔用一對充滿怨恨眼神望住佢，嚇到佢即時退後。
「你痴咗線……我聽人講過，你阿媽係受到紙紮詛咒而燒死，估唔到連你都變成咁！」說罷，家銘開門直奔離去。
呢一晚，家銘返到屋企後一直都瞓唔到，明明身體上好抗拒紙紮，但唔知點解，腦入面諗下諗，又發覺紙紮製成品又真係幾吸引，而且靜妍又咁欣賞自己，一諗起做人做咗十幾廿年都未有女神親近過佢，如今大好機會喺面前，無理由唔好好把握？
於是家銘忍唔住不斷上網搜尋「紙紮」嘅圖片，愈睇愈吸引，雙眼充滿喜悅，睇完一張又一張，完全不能自拔，慢慢投入整個紙紮世界，不知不覺間，佢已經被紙紮所詛咒。
為咗討好靜妍，家銘付出畢生努力為靜妍設計出由紙紮所整嘅時裝，令到靜妍非常開心，因為終於可以著唔同設計嘅紙紮出街，而家銘亦運用自身能力，利用特殊紙質同木製材料，製造出可以裝到水嘅紙紮茶壺，轉眼間，所有傢俱都可以利用紙紮當作日常用品。
當靜妍著住家銘所設計嘅紙紮時裝出街同返學，惹來唔少身邊嘅人目光注意，部份人望望下又覺得呢類紙紮時裝非常吸引，散發出獨特嘅氣質，認為呢個係流行嘅象徵，紛紛用唔同嘅方式投入紙紮世界，令香港頓時掀起紙紮熱潮。
家銘嘅作品更加成為眾人焦點，唔少品牌公司都向佢招手，希望佢設計出更加吸引嘅紙紮時裝。令到家銘有生以來，除咗靜妍之外，佢嘅成就係得到人重視。
佢認為，呢一切都係紙紮帶比佢嘅回報，令佢更加對紙紮充滿著迷。
……… ……… ………
張開眼晴，望住灰白嘅天花板，腦海完全一片空白，全身手腳都感到無力。我慢慢將個頭轉去左邊，見到個護士為個病人探熱，然後個護士轉身望住我，短短幾秒間，個護士好似嚇親咁，跑過嚟大聲問我：「劉生！你醒喇？我幫你叫醫生！」
我醒？呀……我一定係昏迷咗好耐。個頭好痛，但我開始有返些少記憶印象。
突然，我瞪大雙眼，因為我諗起靜妍受到嘅詛咒已經病入膏肓，頓時彈起身想即刻阻止個女，但我一起身，頭亦開始暈，更嘔咗一大輪。後來醫生話我長時間瞓床，所以身體仲未適應，叫我暫時好好抖下。
我拒絕醫生嘅要求，夜晚偷偷地走出醫院，希望盡快返屋企，我答應過老婆唔可以比個女出事，佢呢刻只係比紙紮迷，我一定要救佢！
當我走出醫院後，我嚇呆了。
因為我見到街上有幾個人竟然著咗件紙紮衫褲出街，我望住佢地目瞪口呆，佢地望一望我，完全唔覺得自己怪異，佢地雙眼反而好奇我做咩咁樣望住佢地。我以為自己撞鬼，畢竟夜晚晚邊會有人著住紙紮出街？
我行到樓下商場時，我再一次嚇呆了。因為我見到幾間時裝店都賣緊紙紮。我走到其中一件紙紮衫面前，我用手摸摸，真係用紙做，但竟然可以做到好柔軟，一啲都唔生硬。
「先生，有興趣可以試下著上身睇下岩唔岩。」售貨員親切地走來說。
我激動地反駁：「你叫我著呢件紙紮？你當我死咗呀？呢啲係比死人著架！」
只見售貨員聽後無任何表情，仍然露出一副詭異笑容，續說：「先生，有興趣可以試下著上身睇下岩唔岩。」
「你都痴線！」我退後數步，然後轉身離開，究竟我昏迷呢段期間發生咩事。
我返到屋企前，發現門鎖已換，於是我瘋狂拍門，但無人應門。而我亦體力耗盡，慢慢跪喺閘前抖下。呢個時侯，對面屋鄰居聽到聲於是開門睇睇，見到我痛苦咁坐咗喺到，即時開門叫我入去抖抖。
「劉生！你點呀？你終於無事喇？」
「知唔知我個女去咗邊？」
「你個女？你個女無接你咩？呀！你個女呢家好出名架！」
「出名？咩出名？」
鄰居將我昏迷期間所發生嘅事一五一十講比我知，原來靜妍同佢男朋友家銘所設計嘅紙紮時裝帶起潮流，更發展到其他製成品。雖然呢種「潮流」唔係人人可以接受得到，但最詭異嘅係，好多曾經反對紙紮潮流嘅人最終都慢慢紙紮而著迷，逐漸加入紙紮一員。
「咁佢呢家去咗邊？」
「其實係人都知佢住邊……因為佢間屋幾乎全部都係用紙造成，亦成為香港其中一個打卡點。」
我聽後，整個人都發軟，不斷搖搖頭說：「佢再係咁落去，一定行返阿媽條舊路……唔係，佢應該比佢阿媽下場更加慘。」
「你睇下你成個人累到咁，你食咗嘢未？我不如煮過麵你食下。」
我點點頭，因為我已經好累了。
鄰居走入廚房煮麵時，我腦海仲諗緊究竟可以點做時，我留意到枱上嘅茶壺好似有啲特別，於是我慢慢伸手去拎起佢，竟然係一個用紙造嘅茶壺，仲可以倒茶出嚟，我驚訝得即時放手，令到茶壺跌落地下……但由於用紙造，所以無爛到。
「其實紙紮呢種咁靚咁完美嘅製成品好應該一早就要用！所以我好多謝你個女！如果你想阻止個女嘅話……我係唔會比你咁做。」鄰居雙眼充滿欲望，臉容亦慢慢扭曲地詭異地笑。
我正想起身想走時候，突然我被壓住，我轉身一望，原來有個紙紮公仔用手壓住我膊頭，他操一把流利大陸口音：「怎麼喇？想跑呀？」
「嘿嘿……佢叫Mary，係我屋企工人，基本上每個屋企都會有。」鄰居指住我背後嘅紙紮公仔介紹說。
我本來身體已經虛弱，實在受唔住呢類驚嚇，我慢慢地失去意識暈倒了……
……… ……… ………
「老豆！老豆！」
我慢慢張開雙眼，隱若見到靜妍喺我身旁喊住叫我。
「老豆呀，做咩醒咗都唔叫我嚟接你呀？」靜妍喊住說。
我望一望佢，然後伸手掂一掂佢件衫嘅質地，發覺佢無著到紙紮嘅衫，呢件係普通嘅衫。似乎靜妍知我諗緊咩，於是急說：「我知你唔鐘意，所以我已經無再著嗰啲衫，我應承你。」
我虛弱地點點頭，再用最大力氣講句：「紙紮係死人用，唔係我地用。」
「我明呀！我唔會再著架喇！」靜妍攬住我喊著說。喺靜妍心目中，爸爸嘅重要性絕對比紙紮強，而一直昏迷嘅爸爸，靜妍曾經多次向天承諾，希望爸爸可以早啲醒，寧願放棄紙紮都唔想爸爸一直昏迷落去。如今爸爸醒返，對靜妍嚟講係一個重生機會，今次佢絕對會珍惜。
「係呢，我介紹你識，呢個係我男朋友，佢叫家銘。」靜妍開心地向我介紹。
「世伯你好。」家銘客氣地說。
我見佢一表人材，內心都放心好多，同時亦覺得個女終於大個了，已經識到個男朋友。
我表示好累想再抖下，閉上眼放鬆地瞓，估唔到個女仲咁聽我話可以擺脫詛咒，總算對老婆有交代。
過咗一星期，家銘嚟接我出院。
「靜妍呢？」我問。
「呀，佢今日要返公司處理啲嘢，所以我嚟接你。」
「咩嘢緊要得過我呀？等我打比佢先！」我嘗試搵下手機喺邊。
家銘笑說：「唔好喇世伯，靜妍佢唔係啲普通職員，所以公司有好多重要嘢真係要佢先處理到。」
我亦笑說：「我講笑咋，難得個女咁重要，我點會阻住佢，我地兩個走就得。」
喺車上面，我一路望住出面街景，留意到街上仲有唔少人著住紙紮，睇到我心都煩。
「係呢，你地呢家住喺邊？」我問。
「哦，放心，我地呢幾日都搬咗出嚟，無再住嗰間紙紮屋。」
「咁都好啲，我一聞到嗰陣味就想嘔。」
「其實佢地都幾可愛架。」家銘說。
「唔係嘛，可愛？恐怖就真。我由細到大就同靜妍講，呢啲係死人用，唔係我地拎嚟玩！拎嚟著！你睇下出面班人，著住紙紮出街？真係痴哂線。我真係為佢地父母擔心！」我稍稍激動地說。
「係係係，唔好勞氣。」家銘笑說。
我望住呢個後生仔，覺得佢份人都幾好，靜妍應該無揀錯人。
突然間，我見到前面好似有個熟悉嘅人企喺路邊一直望住我，直至我架車喺佢身邊走過，我先留意到佢係我老婆，我即時叫停車！然後打開車門轉身一睇，明明頭先老婆企喺到，轉眼間已經唔見咗。
「世伯咩事？」家銘緊張地問。
我搖搖頭說：「無嘢……」
上返車後，腦海再次出現岩岩畫面，點解老婆會突然出現？
車停了，眼前有間別墅，估唔到靜妍已經變得咁有錢，連別墅都有。
「我拎啲行李上房先，你入去抖下。」說罷，家銘就拎住幾個箱上房。而我就行入大廳坐住欣賞間屋。
但我突然間覺得唔係好舒服，我不斷聞下周圍，呢種氣味正正就係紙紮嘅氣味。
當我發現時候，我發覺身後已經企滿一堆紙紮公仔。
其中一個紙紮公仔說：「這個瘋子，上一次放過他，今天一定要殺死他。嘻嘻！」說罷，佢拎住一支棍一步一步咁行埋嚟。
我正想退後時，突然間，家銘從後捉住我，然後說：「對唔住世伯！你醒返嘅話，靜妍一定放棄紙紮，佢放棄嘅話，姐係放棄我！我就再無用架喇！」
我未開口說話，我就感到巨大暈眩，然後我就被打暈了。
……
……
一星期後，靜妍喺張梳化到喊，家銘走去安慰佢：「唔好喊喇，我估世伯想散心行開陣姐。」
「究竟佢去咗邊……我好掛住佢呀……我等咗佢咁耐，點解又要突然走咗喎。」靜妍嗚咽地說。
家銘企起身，然後從櫃入面拎出一個紙紮公仔。
靜妍一望，驚訝地問：「個公仔咁似老豆嘅？」
家銘溫柔地說：「我知你好掛住佢，所以專登做一個紙紮公仔，係用你爸爸個樣去做。你睇下，連身高都跟足。」
家銘再行去靜妍身旁說：「我只係想你提起精神，見到呢個公仔，等於見到你爸爸一樣。」
「多謝你。」靜妍覺得身邊呢個男人除咗爸爸之外，係世界上對佢最好嘅男人，估唔到自己當初故意親近佢，如今卻有咗深厚感情。
「好喇，今晚我地出去食飯？你……不如換件衫好唔好？」家銘暗示靜妍應該換件紙紮衫說。
「嗯，我上去換件衫同你出去。」說罷，靜妍就開心地走上房。
而家銘見靜妍上房，望望身邊呢個紙紮公仔，然後輕聲說：「拜拜喇，世伯。」
二人開心地牽手離開。
屋內只有隱若的痛苦聲音：「吾……吾……吾……」
靜妍重拾對紙紮嘅依賴，家銘亦繼續發揮佢嘅事業，令紙紮潮流升至頂峰。
香港人，慢慢被捲入紙紮的詛咒，成為紙紮下的祭品。
《完》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
終於都完咗呢個故事，大結局，希望大家一定要like爆佢，留言爆佢，我想睇一睇大結局究竟可以去到幾多like 幾多留言！
就當對我嘅一種鼓勵吧。
我每個留言都會睇！！！！！！！！
我真係要休息一下，然後再重新出發寫更多故仔比大家。
雖然故事完咗，但記得都要支持買返本書
因為本書仲有其他故事架，我亦應讀者要求，寫個阿傑嘅外傳喺入入面＝」
我嘅網店：https://homingming.boutir.com/
感謝大家！
同埋再次提大家，今次係預售，幾多人訂就印幾多～
過咗三月就無得再訂同買架喇～＠＠希望大家買書支持
四月就會製成同寄出～～
（突發）
聽晚將會出大結局。
正常人都會將結局收埋，然後叫人買書睇
但我真係好想同大家一齊感受睇完一個故事嘅感覺
所以唔理出咗結局點樣影響賣書情況都好，我都想出。
其實今晚本身我已經想出，但今日香港變成咁，我真係無呢份心情。
所以留返聽晚吧
各位讀者，聽晚見。
联系客服
