上海老底子每天呈送精彩文章一组
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
作者：曹开锋
沪语改写、讲述：俞颖
指导推荐：丁迪蒙
编辑：王乙其
我欢喜上粮票收藏，是交关年数之前一趟偶然个机会。埃个一天，我到连搭马路浪吹个风阿是香甜个上海南京路去逗了一圈。勒一家专卖纪念品个商场里，我看到了一本装帧得邪气精美个粮票纪念册，里向有60多张已经停用个旧粮票，一记头勾起了我个童年记忆。六七岁个辰光，我看到商店里卖个中秋月饼，馋吐水往肚皮里咽，绕牢仔大人去买，大人拨我弄得心烦了就对我讲：“呒没粮票，营业员不会卖个！”时隔多年，搿桩事体始终让我记勒心里，对于粮票勒生活中个特别珍贵难以忘记。出于对拨称为“中国第一票”搭仔“中国第二货币”个敬仰，当场毫不犹豫地购买了一本，就作为个人个一眼纪念伐。
后首来，朋友送了一份《藏友》报纸拨我，报纸浪有甄别粮票真伪个介绍，讲述了一眼粮票发行辰光个社会环境，也刊登一眼票证供求信息。勒一段辰光里，通过对粮票个物事前世今生个知识学习，我再晓得粮票并勿是阿拉国家个独家首创。俄国十月革命后，国内外形势严峻，采用商品有计划个分配，发放了凭票购物个票证；美国二战期间，商品紧张，也发放了各类商品购买券。新中国成立后呒没多少辰光，百业待举，各类物资极度匮乏，1953年中央决定实行粮食统购统销政策。1955年8月25日，国务院全体会议第17次会议通过《市镇粮食定量供应凭票印制暂行办法》，从此以后，从中央到地方，各类粮票铺天盖地个进入社会，进入了寻常百姓家庭。阿拉国家粮票区分全国通用搭仔地方专用，以公斤、市斤、半斤、两、克为单位。面额大部分是拾斤、伍斤、叁斤、贰斤、壹斤、半斤、一两，上海市还有半两个粮票。值得一提个是，1972年前后，一眼地方专用粮票背面个印章不断变化。以江西省为例，1969年印章为“江西省农产品公司”，后首来又改成粮食局、粮食厅，再后来随勒形势需要，变成了江西省革命委员会，一直沿用到粉碎“四人帮”搭“抓纲治国”后，“革命委员会”几个字再正式停用了。
当时，老百姓获取粮票个方式主要就是三种：城市居民按照定量标准，每个号头向粮食局领取；矿山企业是向工人定向定额发放，可以勒内部流通；农村居民主要靠超额完成生猪搭仔蛋禽养殖任务，由食品站奖励，粮食局返销、补助，救急救灾。埃个辰光，农民需要外出探亲访友办事体，事先可以拿自家个口粮交到粮管所，兑换成数量有限个流动粮票。假使目的地是边疆搭仔偏远地区，就要兑换成国家级粮票，也就是阿拉常庄讲个全国通用粮票，否则侬有钞票也买不到吃个物事，寸步难行。我买个粮票纪念册，勒共和国票证时代，连一滴小水滴也算勿上，就像芝麻落进西瓜篓子里，数也数勿到我买个埃个一本票。葛么，我暗下决心，一定要多收集一眼计划经济体制下个票券，供亲朋好友茶余饭后欣赏，告诉大家勿要忘记伊段峥嵘岁月，珍惜当下来之不易个幸福生活。
西藏作为世界屋脊。60年代因交通勿便，内陆地区个老百姓根本呒没看到过西藏粮票，更勿要讲有机会获得流通使用。为了收集粮票，我连续寄了几封信拨宣称有迭种票证个人，每一趟会勒信封里夹带上人民币贰拾元，表示一下我个真心诚意。令人沮丧个是，趟趟是石沉大海，我晓得，是碰着勿讲诚信个骗子了。吃一亏长一智，我干脆寄拨拉萨市城关粮食局，信中言辞诚恳，讲述了自己收集粮票个艰辛。大半年过脱了，就勒我绝望透顶个辰光，来自雪域高原个礼物到了。我欣喜若狂，连牢仔几个夜到侪呒没睏着，勒灯光下头拿搿套粮票左看右看，上看下看，爱不释手，觉得自己成就感满满。搿套粮票共6枚，品相好，贰市斤个粮票浪带有水印防伪标志。最弹眼落睛个是，其中贰斤搭仔伍斤粮票模仿了1962年中国人民银行发行个枣红色壹元人民币图案，钞票浪开拖拉机个汉族女子，摇身一变，变成了身着民族服装开勒个拖拉机个藏族姑娘。
对我个人来讲，收藏是拼经济实力个，我曾经做过一桩“戆事体”。10几年之前，听说古镇甪直有位老人，手里向有1967年个军用语录粮票。闻讯后，我勒朋友个陪同下，匆匆乘上了南下班车，几经周折寻到了老人住个地方。老人年轻个辰光，勒东海舰队某部当文艺兵，搿套粮票是伊下基层演出个辰光，守护海岛部队个一位司务长送拨伊个。伊转业回原籍之后，尽管生活拮据，一张粮票勒黑市浪侪是价值勿菲，但伊一直舍勿得使用，而是拿粮票夹勒一本杂志里收藏。随着辰光流逝，老人慢慢交忘记脱了搿桩事体，现在伊住个房子面临拆迁，勒勒整理老物件个辰光又发现了伊。搿套语录粮票“养在深闺人未识”有几十年了，搿是中央粮食部为人民子弟兵专门发行个，随便到全国各地一家军粮供应站，马上就可以兑换相等个粮食搭仔物品。全套24张，分马料、粗粮、大米、面粉品类，最大面额是1000市斤，背面有毛主席语录。现在普通人想要看到这套全票，可能只有去军博馆里看展览。我出价500元想拿伊买下来，老人讲2000元再肯出手，经过一番讨价还价，最后以1000元成交。1000元洋佃勒勒当时可勿是小数目，我勒工地浪搬砖每只号头只有3000元工资。搿趟专程为了买粮票，我搭朋友个来回车票、吃饭住宿个开销侪勿少。埃个号头，我彻底成了月光族。呒没办法，只好委屈自己，每顿侪吃白开水，啃馒头吃榨菜，熬过了两个多月邪气艰难个日脚。
到目前为止，我收藏了3000多枚粮票。迭眼粮票反映了一个地方个人文历史、革命圣地、社会环境、科技创新、名山大川、标志性建筑、工农林牧业欣欣向荣个景象，展示了地域风情，以及当年个政治环境。据了解，全国省市自治区、市县乡人民政府搭仔各军种、矿山码头、生产队，还有火车浪，或多或少侪发行过粮票、购粮券。九十年代，一眼县镇级粮票印制简单粗糙，搿是历史发展个必然。牛气冲天个粮老大成了看顾客眼色个小店员，农民由过去吃勿饱穿勿暖，转变为吃得饱，吃得好，粮票随勒社会经济个发展被淘汰了。假使有人要问，全国究竟有多少套多少枚粮票？搿无法统计，呒没人晓得，勒此地打个比方，恐怕比天浪个星星还要多。
“文化大革命”个十年，全国各族人民勒极端困难面前，仍旧满腔热情个建设社会主义，粮票设计搭印刷达可以讲达到完美。从票面浪来看，侪有一个催人奋进个地方，带了红旗标志个图案占了大多数，这寓意着广大人民群众勒中国共产党领导下，战天斗地勇挑重担，誓将祖国山河换新貌。我想，搿是一个时代吹响个冲锋号，是人们思想个觉悟，是指引我伲前进个方向，更是信念搭仔信仰个力量。
粮票一路走来40多年，见证了我伲从一穷二白走向繁荣富强个新生活。1994年，粮票光荣退市了，成为记忆。无论时间哪能变化，粮票勒共和国个历史浪有着极其重要个地位搭作用，成为大家心中无法忘记个篇章。
讲述：俞颖
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
联系客服
