上海老底子每天呈送精彩文章一组
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
晋福里存影
来源：《静安报》2022年12月16日
作者：卢润祥
沪语讲述：何振华
沪语记录：飞飞
审定推荐：丁迪蒙
编辑：王乙其
勒我慢慢叫、一眼眼老去个今朝，常庄会得想起小辰光等个晋福里。搿是上海滩邪气普通个一个石库门里弄，现在已经消失得无影无踪。伊个位置，就勒勒北京西路、山海关路边浪。随着城市个更新，此地拨了政府征用先是造了绿化带，后来就成了静安雕塑公园。今年，公园还打开了围墙，一派气象万千！
晋福里成了公园个一片草坪，去雕塑公园散步，看见我出生后就居住过个晋福里3号旧址，变成了上海自然博物馆门前几只“老牛”休息个地方。城市发展日新月异，旧时痕迹，昔日光影，不免涌上心头。
我个小辰光，生长勒新中国成立之前个旧社会，父亲是个老实人、小职员，收入邪气低，我个老爹虽然老态龙钟，却勿得勿勒勒弄堂口摆摊头，卖眼零食，多少赚点铜钿贴补家用。有一日夜里，老爹吃了邻居好意送来个一碗排骨汤，勿小心拨一块骨头哽牢了喉咙，屋里人豪少请来了对马路个私人医生，开仔一大堆药，几乎拿屋里向仅有个现钞侪交脱，也呒没挽回老爹个性命。阿奶有一趟勒勒外头拨骗脱铜钿之后一直闷勒心里想勿落，过世了。姆妈养了一个弟弟，生毛病了也呒没铜钿送医院，几天功夫就呒没了，我还记得半夜里姆妈暗暗叫哭个声音。要是勒勒现在，老爹搭仔弟弟，是完全能够看好个！
新中国成立之前个社会，就是一个无底个黑洞。勒勒旧社会，弄堂里实行保甲长制，负责治安唠啥搿些事体。保长个办公室就勒勒距离晋福里勿远个西园寺门口一间小房间里。屋里经济勿宽裕，弟弟夭折之后，姆妈就想勒勒弄堂口也摆个牛肉汤摊头，伊要送礼拨保长，烧了两只拿手菜，一只鱼饼、还有乳腐肉，趁保长外出勿勒嗨个辰光放勒伊写字台浪，用纱布盖好（埃个辰光还呒没现在用个保鲜膜），写字台浪再放一封申请函。老快，姆妈就拨批准勒勒弄堂口摆牛肉汤个摊位了。
我记得，弄堂里还有个“图书馆”，书邪气少，实在是称勿上“馆”个。搿是一位热心公益个丁同吉先生用旧木板搭出来摆书个，装个滑轮，推到弄堂个井边浪，供大家阅览。书也是弄堂里个爷叔捐个，记得有《子夜》《家》《瞿秋白选集》《苦儿努力记》《老人与海》《格列佛游记》《大人国游记》《格林童话》《安徒生童话》及《小朋友》《儿童世界》唠啥，不过也就百把本书，平常等我伲搿些学生子侪放学回转来个辰光，推出来，为大家服务。
住勒弄堂底10号里个丁同吉，是个家庭教师，屋里书多，伊也欢喜读书欢喜写作。新中国成立后，伊担任当时一家报社个通讯员，离晋福里勿远个王家沙，对面有一家三开间个上海医药馆，是卖药做生意个。丁同吉常庄去埃面坐诊，也勒里向学过打金针。当时辰光我读高中，也欢喜写作，伊呢就带我一道去采访，让我写成一篇通讯，伊帮我修改之后交拨报社，我居然以通讯员名义、大标题上了报纸二版个头条。
丁同吉为人邪气厚道，热情，乐于帮助人，伊会得打金针，还欢喜篆刻，免费帮人家刻名章，伊常常会得诵读世界名著，古典名著个名句信手拈来。伊性格开朗幽默，热爱生活，欢喜讲笑话，热心里弄工作，每到年底，伊就举办迎新春联欢会，会场就是伊屋里个客堂，吸引了勿少邻居一道来守岁。难怪有哲人言：美不存在于外露的表面，而在深刻的内涵。“美”实在是一种内秀搭仔奉献个魅力。
当时辰光邻居隔壁有一个20几岁的小姑娘，长得邪气漂亮，又特别欢喜看书，常庄问丁同吉借书，两个人勒勒一道讨论文学，探讨写作，听听评弹、听听音乐，天热个辰光，丁家姆妈就烧绿豆百合汤拨伊吃。日常时久，勿知勿觉，小姑娘欢喜丁同吉了。事体拨勒女方爷娘晓得之后，坚决勿允许，还拿囡圄关起来勿许伊出门。断脱来往，丁同吉冷静个拨小姑娘写了张条子，伊讲，我身体太虚弱了，又有得残疾，一辈子勿敢爱，“爱”对我而言，是一种奢侈，一种罪过，将来我伲勿不可能“同吉”，侬迭能个纯洁美丽，应该获得真正个爱啊！伊还讲，我搿辈子就是以书为伴，听听书，看看云，吃吃茶，多为人家做好事、告老母亲相依为命、坚守独身，就是积德也是快乐个一辈子了。
晋福里虽然呒没革命者，但是有一位地下工作者经常夜里向到3号楼浪个亭子间来探望我个爷娘父母，嘘寒问暖，讲一眼社会新闻，从伊嘴巴里透露出中国有个延安，有一批革命者正出生入死，为建立一个崭新个好政府努力，伊预言解放之日，就是我屋里生活改善之日，伊讲，革命成功了，以后一家人家再也勿会轧勒只有9平方个亭子间里了。果不其然，后来，我屋里分到了市内两室一厅70平方个房子。伊常庄带书拨我看，记得其中有一本封面浪是张恨水个《秋海棠》，内页却是一册《为人民服务》搭仔《论联合政府》个合订本。搿是为了躲避出版物稽查才迭能做个。有个辰光伊也告伊女朋友带我一道出去白相，吃茶点。伊叫阿德，公开身份是永安公司店员。新中国诞生之前，也是黎明前最黑暗个辰光，交关地下党员侪被捕了，关勒龙华警备区司令部，勿少革命志士惨遭枪杀。阿德为了隐蔽身份，勒伊等了虹口个一条弄堂里，装作孽子蛰伏，连女朋友也离他而去。伊由此迓过敌人个耳目，迎来了新中国个曙光。
“天空不留痕迹，鸟儿已经飞过。”泰戈尔个诗句十分真切！光阴易逝，青春老去。旧物灰飞烟灭，但人世个风风雨雨、旧貌新颜、点滴个残梦、烟云旧韵……并呒没跟了晋福里个消逝而消失精光，反而勒勒老来个我回忆当中染上了故事个色彩，桩桩件件，复活于眼门前。
讲述：何振华
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
联系客服
