来源：食品与生活
作者：杨忠明
沪语改写：丁迪蒙
诵读：顾天虹
小菜场大乾坤（下） 来自吳越小豬 00:00 08:02
1903年到1930年，上海市立室内小菜场有得三角地小菜场、梧州路小菜场、顺昌路小菜场、松潘路小菜场、大自鸣钟小菜场、马立斯小菜场、唐家湾小菜场、白克路小菜场、八埭头小菜场、舟山路小菜场、北京路小菜场、山海关路小菜场、四川路小菜场、爱尔近路小菜场、小普陀小菜场、八仙桥小菜场、铁马路小菜场、福州路小菜场、西摩路(现在个陕西北路) 菜场等等20余家。市民室内买菜勿会受风吹、雨淋、日晒个影响。老上海还有得几家私营小菜场，譬如大成、溧阳、康定、虬江、西宝兴、大通、元芳、安南、白莲泾咾啥，规模蛮大个。
老底子小菜场里个卖肉柜台，马路边浪肉庄个柜台浪，砧板高到侬手够勿到，为啥呢？有人讲拨我听个秘密：最早，肉庄个柜台搭仔普通商店一样高个，有一趟，几个买肉个客人围牢仔砧板挑精拣肥，动手争肉，卖肉个一勿当心一刀下去，砍断了客人个几根手节头，差点闹出人命来。后首来，肉庄同行商议，拿砧板加高，让买肉个人看勿见斩肉，以防不测。
浙江电影院对面个四马路小菜场邪气有名，菜场个北面是水产公司营业部，食品紧缺个辰光，常庄有排队也买勿到个凭票供应个来自黄海、东海个海鲜，有大黄鱼、带鱼、墨鱼、鲳鱼、马鲛鱼、比目鱼、海蜇头。买好鱼，穿进四马路小菜场，买好菜再到点心店里弄点生煎馒头，叫碗咖喱牛肉汤吃吃，还可以到对面个浙江电影院去看场电影。
老底子个小菜场会得勒当天卖勿光个鲜海鱼身浪抹一把粗盐、放到太阳底下头去暴晒，做成咸鱼干。有辰光毛豆、蚕豆大量上市，菜场就鼓动附近个居民下半天去剥豆，每剥5千克有得1角洋钿个报酬，交关老人、小人侪去赚钞票，场面相当热闹。
上海市区比较早个马路菜场有宁波路、牛庄路、永安路、广西路、平望街、派克路、山海关路、巨籁达路、嘉善路、徐家汇、麦琪路、诸安浜咾啥。华山路希尔顿宾馆对面个马路浪就曾经有过马路菜场，我路过个辰光买到过大明虾。
以前，上海小菜场附近常庄有大饼油条豆浆摊、面摊、小饭馆、茶馆、老虎灶、米店、酱油店、煤球店、理发店、南货店、烟纸店、杂货店、陶瓷店、混堂咾啥。小菜场里还有得卖鲜花个，家庭主妇顺带便带一束康乃馨、菖兰花、茉莉花或者玫瑰花回去，往红木家具浪向个花瓶里向一插，拿煤球炉生好，小菜烧起来。
小菜场一般早浪6点开称，冷天介蔬菜供应紧张，过年前头置办年菜要半夜起来来排队，或者勒夜里向用砖头、竹篮占位子排队。有一年，鸡、鸭、鱼、肉侪要凭票供应，牛庄路小菜场出售罐头食品厂提供个下脚：鸡头、鸡脚、鸡翅、鸡架、鸭架，一度成为当时个热销货。我还到八仙桥小菜场帮大人买过黄鱼子、黄鱼膏，乌贼鱼个膏、蛋，红烧烧味道特别鲜，搿是以前上海人家艰辛个生活经历。
上世纪五六十年代，蔬菜大多数是上海郊区个生产队种植个。深秋了，菜场里向常常拿昆山个大闸蟹用黄鱼车送到里弄里来推销，每500克6角，喊哑了喖咙也没人问津。巨鹿路小菜场还勒淮海中路乐安坊老弄堂里向开设早场，方便居民买菜。伊个辰光个大黄鱼、鲳鱼每500克2角几分。卖酱菜个黄鱼车也会得到弄堂里来个，吃泡饭个酱菜也就有唻！小菜场里个盆菜邪气有特色，二、三角一盆个，可以买到洋葱豆腐干、咸菜百叶咸肉，4角一盆个有肋条肉冬笋、蹄髈黄芽菜、大黄鱼竹笋，小菜荤素搭配合理，侪已经汏好、切好。其实，买盆菜主要是因为鱼、肉、豆制品侪勿凭票供应。
往昔天蒙蒙亮，好像是人生大舞台个小菜场里寒风当中摇曳个灯光，吆喝声、嘈杂声，买菜个人晃动个声影早已离阿拉远去了……
联系客服
