[申情申音]荡马路（下）

荡马路（下）

原创：钱乃荣麦唐作 2018-07-20

钱乃荣-荡马路（下）来自麦唐作13:50

作者、朗读：钱乃荣

公众号主题歌《麦唐作》（夏季版），词：麦小姐，曲、制作：何东，演唱：陶嵩飞

思南路也是一条僻静幽雅个小路，有成排个深深个庭院，布满了花园洋房。我小学里同桌个同学就住辣“息庐”3号里，我去过伊屋里向，所以老小个辰光就欢喜到思南路去白相。初中一，我有两个同学就住辣复兴中路口个思南路75号到95号个弄堂里个花园洋房里向。搿个辰光，学堂里分两部制上课，阿拉是上午班，下半日我就常常到81号个刘国光同学屋里向去做功课。记得辣伊屋里个大草地浪背“文学”课个《从百草园到三味书屋》,“高大个皂荚树，紫红个桑葚……”，我抬头仰望屋顶浪向个高大个桑树，斑驳个天空，暗暗出神；又辣伊屋里向客厅里向，辣课本浪向做“汉语”课个划主谓宾、定状补个作业。作业做完，功课复习好，就一道种月季花，用气枪去打草丛里向钻出来个癞蛤巴。搿个一些经历侪对我个一生有明显个影响。搿个辰光，一些显赫一时个大人物大多从搿条马路离去，洋房里住个倒多数是家道好个百姓。我每日侪辣荡发荡发，从刘国光个屋里，走过半条思南路，认识各种树木花草，欣赏从51号到95号法国式、英国式、西班牙式个花园洋房个姿态，当年采集个交关花瓣、树叶，至今还睏辣我个植物学课本里向，已经有六十几年了，过了一个甲子，再来看看搿些东东，勿禁叹息人生之短促了。

“文革”开场，伊搬走了，但是我还会常常跑到思南路，昔日个声音、笑貌、搀手、拥抱辰光个童心，侪徘徊辣我个心底。今朝我当年走个搿条路线个房子，又开放打造成为一个新个“新天地”——“思南公馆区”了，八种风格个洋房修饰得更加精神，就是各自呒没富有想像力告活力个草地了，显得有点单调。位于重庆南路248号到252号个搿幢老宅，辣保持原来风貌个基础浪向改装，变得华丽起来，搿搭曾经有好几个我小学里个同学居住辣海，平民百姓，勿晓得搬迁到啥个地方去了！

“外地人欢喜荡南京路，上海人欢喜荡淮海路。”搿个是上海人个一句口头语。实际浪向，是讲了搿能样子个一个长期存在个现实。南京路紧连了外滩，过去又叫“大马路”，辣大家心目当中，一直占有“拿摩温”个地位，一路浪向高楼最多，又连到俯视中国告东亚49年之久个24层楼个“国际饭店”。南京路拥有四大百货商场高楼，当年出售个货物齐全，拨行情行市外地来个人琳琅满目一饱眼福个感受。现在也是一条上海个名牌店聚集个马路，自有伊个上海派头。当年交关外来者，侪要来采购上海出产个乓乓响个轻工业产品，还有各种优质商品，侪要到中百一店、第一食品商店咾啥名店去，所以上海南京路就名扬四海，即使是辣70年代呒没开放个辰光，南京路浪也走辣海勿少外地出差个人。

淮海路就有点勿同，伊原来是法租界个最繁华个路，当年个遗风一直阴魂勿散。法式个食品、服饰，尤其是伊个艺术文化氛围，遗传延续下来，勿断闪光。淮海路好像巴黎个香榭丽舍大街，小资又洋派，细微处见大方，中西融合个新时尚往往会辣淮海路浪老快老新个流行起来。即使辣“文革”时代，一眼小资先锋，侪会拿当时有限个阿尔巴尼亚、南斯拉夫、朝鲜影片当中个男女穿戴个服饰，自家辣缝纫机浪向做出来，大胆穿戴到淮海路浪去出风头，勿过一歇歇，自有年轻人马上跟上去，辣别个路浪向走勿配个，辣淮海路浪向就着得出，还会蔚然成风。

所以，淮海路是平民自动化个时装发布场所，青年人，搿点热衷引进时尚、学习时尚个人，侪要到淮海路去，市面领领，西菜吃吃，电影看看，不亦乐乎。我小辰光读小学四年级辰光有一次爱娣带我去荡马路，是从重庆南路走到淮海中路思南路勿到桃源坊隔壁个博览书局为止，眼界大开，从此就呒没关过，跟上去了，后来就脱淮海路有了勿解之缘。尤其是我年轻辣奉贤做教师个辰光，每周周末回家，第二日礼拜日，就夫妻两个人去淮海路荡一个上半日个马路，有了女儿以后，就三个人一道荡，搿个辰光是70年代，只有淮海路好像还有点活气，新个衣饰时尚打扮依然辣淮海路浪先流行。阿拉走个路线，就是勿断重复我小辰光第一趟荡马路个路线，走到思南路口，就辣对面个“庆丰熟食店”里向买一点熟牛肉，回到屋里去，摆点卷心菜、洋山芋脱番茄烧罗宋汤吃。80年代我太太调进向明中学教书，中浪向我每日送伊去上班，回来个路浪就走搿段淮海路，看看新华书店、上海书店脱报刊门市部，总有一眼新鲜个内容可读，有空个言话，从雁荡路进复兴公园走走，坐下来再看脱《中国语文》浪向个一篇论文，再从复兴中路个门出去回到屋里向，两点钟光景，就开始写稿子。

文人依然欢喜福州路，搿条老上海个四马路。搿搭里曾经是书局报馆出版业滥觞之地，酒楼茶肆梨园舞台，五湖四海食文化，万国药品，20世纪30年代20万文人曾经居集辣搿搭。现在仍旧是文化大道，最有书香气。搿条马路是我除脱淮海路外去得最多个马路。老早辣读高中个辰光，礼拜日，我常常乘5路有轨电车到浙江中路下车，就步行走到福州路个上海旧书店告古籍书店去看书买书，还从小马路穿到南京东路的“朵云轩”去买宣纸、扇面脱仔旧个碑帖，觉着老有味道。有常时还附带辣福州路个名店“稻香村”里买一只刚刚出炉个鸭肫干，三角洋钿，当时还觉得贵，但是辣60年代初辰光吃，鲜味无穷。后来1962年进大学以后，周六回家，常常要弯到福州路去看看，我当时个文房用品几乎侪是辣辣荡福州路个辰光买来。现在还是常常去个地方，到上海书城去买书买唱片，到古籍书店、艺术书店东走西荡，辣搿搭地方还闻得到书香味。

情人们欢喜荡鲁迅公园旁边个甜爱路，辣法国梧桐密密个绿树个覆盖下面，一双双情侣卿卿我我。整修过个粉墙浪向写辣海爱情格言，见证伊拉个爱情。走过甜爱路再弯到同心路走下去，伊拉两个人个恋爱作兴上了一个台阶。

外国人欢喜田子坊、新天地、仙霞路、城隍庙、朱家角。搿些地方有上海个传统，又有最新个洋派情调。田子坊是曲曲弯弯连成一片个下只角小弄堂，过去是轧来死个平民居住区，又有交关老厂房，现在改造成功既有住户，又有老多勿同风格个小店个共享空间。搿搭，有创意灵感，有奇思妙想，有艺术设计个工艺品、画廊、古玩商铺，有吃咖啡聊天个后院凉棚，有工业文明个沧桑感，有创意新产业个集聚风光，有阳光屋顶，有小板凳㫰衣裳竹竿。新天地有上海历史文化个轮廓脱仔内部空间个现代化，有中西合璧个石库门，有21世纪个生活方式告节奏，是上海个历史辉煌脱新时代个情感世界，吸引了外国人流连忘返。

大上海个马路多元而深长，最具有大都市个气场，荡马路顶好看个是上海人荡马路辰光个各种陶醉模样！

我们近期还发过：

本站仅提供存储服务，所有内容均由用户发布，如发现有害或侵权内容，请点击举报。