上海历史並不短
▲来自网络
一直有人话起上海昰座城市历史比较短，是近代开埠之后刚产生亇，开埠前头是隻小渔村。应该讲来昰个是一隻误解。
嗰么，大家一般哪恁去衡量一座城市亇历史长短嗫？
好像也不是看整个行政区划范围里是否有古人类活动遗迹。若然看昰点，嗰么现在上海市境内发现亇古人类活动遗迹也要几千年著嘞！
好像也不是看整个行政区划范围里某几只古镇亇历史。若假看昰点，嗰么像南翔、安亭、朱家角嘞排古镇全有相当亇年数啧。昰排古镇全属于上海市亇。
好像也不是看现在管辖范围著历史上属于亇行政区亇中心城镇亇历史。若是看昰点，嗰么现在亇上海地区历史上长期属于以苏州城为中心亇行政区，而苏州建城要两千几百年啧。当然大家是不会得拿苏州城亇历史套到已经不属于苏州管辖亇上海头上亇。
嗰么大家一般看啥个？看亇是一个市中心城区亇历史长短。对于上海市来讲，就是上海城亇历史长短。嗰么，上海城到究啥辰光出现亇？首先，宋朝亇辰光就已经有上海镇啧，嗰么，昰隻镇也有七八百年，恁千年啧。若假儿一定要拿成为县城作为建城亇开始，嗰么从上海县1292年建立到乃也要七百几十年啧。七百多年亇城，称为古城，总贯是呒不问题亇。昰座古城，就是大家熟悉亇豫园、城隍庙所在亇伊垯户荡。
嗰么，为点啥交关人常常觉着上海历史短？昰个可能是拿显赫程度撘有无问题搞和脱啧。
佷要话有无，嗰么上海城起码货存在著七百多年啧，历史並不短。但是，塱中国漫长亇历史中，上海县、上海城亇地位长期以来不算突出，撘全国数量众多亇其他县城俦可能也只有能算脚碰脚。讲着中国古代史，硬碰硬北京、南京、西安、洛阳更为人们熟知。即使是拉近眼看，苏州、杭州也要傍上海显赫交关。甚至大家千万覅忘记，上海城当年还不是府城，上海县属于松江府，松江城是更加显赫亇府城。如果佷觉着上海著历史上不算有名，嗰么若假看见史料上话着“松江府”，佷就要有意识啧——昰个就是塱现在亇上海地区，当年亇上海县及其县城，就是包括著昰个“松江府”里啧，老早就有啧。当然，昰个的确可能是人们容易忽视上海昰座城市历史存在亇原因之一。
嗰么，上海啥辰光真正进入公众亇视线？无疑是近代开埠以后。1843年开埠之后，著上海县城撘租界亇基础上迅速发展出一座繁华亇大都市，不再是一个普通亇小县城，地位掩盖著佢亇府城——松江城，超越著老牌亇大都会苏州、杭州，甚至可以直接撘皇城北京俦相提並论啧。也就是塱昰一个半世纪亇辰光，外界一趟又一趟听见“上海”昰隻名头，也可能为昰恁嘞大家容易误认为上海昰座城市也是近一个半世纪刚刚“出现”亇。实际上，应该是近一个半世纪刚刚“出名”亇。
当然，从某种程度上来讲，成为现代化大都市亇上海城，撘作为小县城亇上海城，性质上也已经发生著一定亇变化。但若假我伲考察昰种变化亇发生，就不难发现，塱全国为数众多亇城市中，超出城墙撘城河大步开拓，从小县城脱胎换骨为一座现代化亇都市，上海倒是全国极少数最早迈开昰个步伐亇城市。也就是讲，当全国绝大多数县城，包括州城、府城昰排作为地区中心亇县城，还处于传统城市形态亇辰光，上海已经超出昰种初始状态大踏步亇崛起成为现代都市啧。而交关人亇误解就是，拿上海城亇崛起年代，当成功著上海城亇出现年代啧。
上海昰种质变亇早，早到啥个程度嗫？我伲嘉定县也是名列前茅亇全国百强县，但截止到廿世纪八十年代末、九十年代初，嘉定城像煞厡旧基本局限著环城河昰隻框廊档里，印象里出著环城河就基本上是乡下头啧。扩展到环城河外头亇菊园、南苑、迎园嘞啥城市化地区好像就是昰二三十年里陆陆续续建成亇。但上海城嗫？一百年前头就已经开始著脱胎换骨亇巨变啧，昰个差距实在是大到呒得闲话讲。故嘞尽管嘉定、上海全是13世纪建立亇不相上下亇两个县，可谓是阿哥兄弟，脚碰脚，但六七百年之后只有可能以上海城为地区中心，嘉定城作为卫星城绕著转，而不可能是合转来亇格局。
有辰光跑著外滩，看著两岸气势恢宏亇建筑群，不禁感慨：本来差不多亇两个县，就因为地理条件、历史机遇嘞厛一系列亇因素最后竟然会产生如此大亇差别！但昰个就是历史事实撘客观现实，大家全应该正视撘充分了解。
总数，上海城亇历史並不短，撘古城嘉定，还有全国交交关关默默无闻亇县城一样，塱13世纪甚至更早亇时期全已经出现啧。人们之所以当著佢历史短，是拿佢崛起撘出名亇时代撘佢出现亇时代俦搞和脱啧。而要论城市现代化亇质变，上海又是中国最早开始昰个进程亇城市之一。所谓小渔村亇时代，起码货也要追溯到七八百年前头上海镇形成之前亇初始状态。
当然，从中国漫长亇历史来看嗫，七百多年亇城市，毕竟大长不长透，特别撘伊排两千年以上亇老资格古城比起来的确不是一个级别亇，但短总贯也不算短亇啧。
疁·浏河长江
2018年4月8日 礼拜日
戊戌年 二月廿三
嘉定建县800周年
朗读：疁·浏河长江
排版：神死恸瞑
本平台暂未开通评论，大家可至吴语学堂微博留言：
新浪微博：吴语学堂微博
你还可以通过以下方式联系我们：
投稿信箱| wugniu@126.com
联系客服
