孔庙跑到州桥头
▲嘉定孔庙
昰滩是孔庙、汇龙潭门口头。从小爷娘就领我来孛相。记得嗰辰光总贯欢喜著昰个石栏杆上弄伊种小哝哝亇孛相干车子,一个不当心么“唂咚”势嚷落著湖里,乃么伲爷娘请下头划船亇人相帮捞起来。划船人用把桨一捞话就捞着啧话,我现在想想还觉着真大本事——把桨狭哝哝、扁塌塌亇嘞话哪恁捞得起来亇?外加湖底下哪恁看得清爽亇?
▲汇龙潭
汇龙潭公园里也兜著呒趟数亇啧。小辰光年常来看菊花展亇,特别是夜头,灯光一打,哦,点菊花花丽斑斓,赞透赞透!看亇人是巷尽巷是,闹热非凡呃!有趟伲爷领我来,塱门口头,好像记得我看见有人卖洋泡泡,也想要,伲爷大概话:“覅买!小囡孛相亇物事,呒不意思亇。”乃么正好两个大阿姊看见我要么主动拿自家手里亇洋泡泡授畀我话:“小弟弟,我亇畀佷。”结果我话:“大啧,不孛相啧。”乃么两个阿姊“讴——”蛮扫兴亇。伲爷马上拿我话:“人家畀佷物事佷哪恁昰恁话亇咾?!”我塱想:“嗰不佷教我昰恁亇咾?!大著覅弄洋泡泡啧。”
除脱著跟爷娘来,小学堂里搞活动也几趟到昰滩来亇。嗰歇儿头儿全走著来亇,从李园一村亇实验小学一埭边过来,一大俦人惊惊有俦亇。有辰光么汇龙潭公园,有场时么孔庙。小辰光确实不大识货,孔庙里参观著几趟也朆大记牢啥个物事,倒是両只石乌龟印象深刻,觉着生得蛮滑稽亇。现在想来轧实学堂里从小就有意识对我伲进行文化熏陶,有排物事可能真亇是潜移默化亇。像我现在蛮多会到孔庙昰塱来跑跑,可能撘小辰光亇熏陶有关系。好多趟夜底头一个子跑著昰滩踱来踱去,看昰点弹街路、石狮子,还有昰両棵苍劲有力亇古树,越来越觉着昰个塱历史厚重,回味无穷。
乃么从孔庙门口头到南大街上一拔直朝北就可以到州桥老街,我伲可以一埭边趤过去。若然朝南嗫,就是跑到环城河上,有一座大透大透亇水关,叫南水关。初中嗰歇儿来得个欢喜看城墙,乃么四突圞圞到块去寻城墙。结果踏著脚踏车钻来钻去,先是塱西门发现著西水关,后晚来发现著昰塱亇南水关,喔唷!傍西水关大脱让些儿著嘞!宏伟得不得了!上下头两层,霸气十足!立著顶上远望南面亇水路,觉着威风凛凛,像煞介仔著塱守卫我伲嘉定城!当时辰光真亇是像发现著古迹一样,奇稀得不得了!乃么期中考试考好著么领著交关同学一俦来看。両个同学也兴致高得,开心得不得了!不过,我本来道著昰个就是古代一直保留到乃亇,结果我一个同学替我划著盆冷水,佢话:“我看佢造起来亇嘞!”当然,不管是真亇古迹还是现代重造亇,对于我伲来讲,毕竟还是可以看看、爬爬,立著上头怀古亇。
▲塔城路南大街路口朝北看法华塔
呶,昰歇儿过亇昰条横马路是横贯我伲嘉定城亇主干道——塔城路。嘉定因为著塱上海亇西北部,相当于新疆著塱全国亇方位,故嘞路名蛮多用新疆地名来命名亇,像昰条塔城路,还有温宿路、博乐路、清河路、叶城路、阿克苏路嘞厛间。小辰光记得温宿路上么全是摊头,博乐路么像石头铺亇,清河路么闹热非凡,老底子亇展销会嘞摸奖嘞啥亇一般就塱博乐路、清河路上行亇。
呶,昰爿杂货店是伲高中老同学垯屋里开亇。老早嘉二中读书辰光我一直脚踏车踏去亇,踏到南翔。有趟礼拜五心血来潮话哪恁两介头话好亇话我踏佢归来,说干就干呃!乃么南翔朝北踏归来。嗰歇儿头儿横年纪轻,像煞介仔觉着精力无限,破脚踏车踏个人也不觉着衰瘏亇。后首来好像语文老师撘我话佢还写著篇作文记录昰趟难忘亇归途。现在想来,当年同学俦里亇交关事体真亇蛮值得回忆亇。
旧年嘉定电视台做著一档微信节目,讲着著州桥老街昰滩,介绍著昰爿杂货店,我转发之后伲昰位老同学留言话就是佢垯屋里开亇。乃么晚转来我散步到昰塱么到窗口头撘佢垯爷娘俦叫应一声,白话话。不话不晓得,话着著是原来我认得亇一位嘉定文化界老前辈撘佢垯爷俦是嫡亲弟兄,巧得呒哪恁!故咾想想嘉定地方小是也小,不经意间互相全有昰恁伊恁亇关系。
▲法华塔
继续朝北,呶,嘉定亇标志性建筑法华塔已经望得清爽宛啧。现在楼房全多著座塔像煞介仔也不见高,但完全可以想象得出,老底子昰个绝对是鹤立鸡群亇宏伟建筑,应该是全县亇制高点啧。
乃么塔下头西北角里昰部石桥就是嘉定州桥。州桥昰部桥,老实讲我小辰光印象不深亇。印象里亇州桥一直是昰个区域亇统称。倒是记得州桥北堍朝东点大概塱只路口塰墪有爿饭店嗫面馆,门口头有只老虎。老早乡下头亲眷出来一俦到昰滩吃过饭亇。从小就听见话,老底嘉定顶顶闹猛亇就是西门撘州桥啧。不过想想蛮坍台,小辰光长期不晓得“州桥”到底应该哪恁写,一直道著是“独木舟”亇“舟”嘞!当然现在是晓得原来因为是元朝辰光嘉定州亇缘故。听说讲当时辰光亇衙门也就塱昰段里,撘南面亇孔庙俦遥相呼应。
从孔庙到州桥,昰块户荡是嘉定最最中心亇区域,对于每个生活著嘉定亇人,或多或少全会留下某些难忘亇记忆。
疁·浏河长江
2017年6月-8月
嘉定建县799周年
朗读:疁·浏河长江
联系客服