北京东北合称京东
▲夜未央摄自松江天马山
曾经听见有人话：“我还听得懂东北闲话嘞！”像煞是桩非同寻常亇事体。但佷仔细想，听得懂东北闲话阿算稀奇？並不稀奇。为啥？因为我伲已经普遍掌握嘚普通话，普通话定义就是“以北京语音为标准音，以北方方言为基础方言……”而北京官话撘东北官话俦啥个关系？相似度高到甚至可以认为呒得必要分成功两只方言区。佷用北京语音表达也已经内透，听东北语音表达自然轻松，只要不出现冷门亇词，从语音层面本来就不是问题。除非像伲老代头里一样——只会江南本地汉语，连档北京语音也听不懂，嗰么听不懂东北闲话么是也再正常不过亇啧。
也就是讲，只要我伲掌握嘚北京语音，约等于就掌握嘚东北语音，或者话我伲所有已经会普通话亇北京语音人口，实际上也就约等于东北闲话人口，硬碰硬声韵调系统是高度类似甚至基本一致亇，至多具体音值、音色可能稍些有眼差别，或者少部分字亇读音归类稍有不同。有场时，塱辰光有限亇对话中，甚至难以分辨一个人到底算塱讲普通话，还是北京方言，还是东北闲话。某种程度上来讲，北京官话撘东北官话，的确可以归併为一个大类——作兴，可以称佢为“京东闲话”。
应该讲，京东闲话堪称是中国最强大亇方言集团，我国现阶段亇语言变化总趋势，就是京东闲话不断普及、扩散到全国，逐点逐点替代当地闲话交流功能亇过程。也就是讲，当代中国雄鸡版图亇鸡头、鸡颈骨昰段，就是整个国家强势语亇辐射源。
可能有人要问：“为啥不拿整个官话方言区全部包括进去？”原因蛮简单，大家回忆回忆自家学堂里、单位里碰着亇其他官话区亇人，撘伲俦讲啥闲话？无论兰银官话区、西南官话区、中原官话区、江淮官话区，跑出来对外交流，撘我伲一样，普遍全操北京语音，用京东闲话交流，而不是佢垯当地闲话。也就是讲，昰排区域当地闲话撘京东闲话亇差异程度，已经超出嘚人们亇忍受限度。若然假定两种闲话相似度达到95%以上么双方会稳定亇使用各自亇闲话互相交流，嗰么以上几大官话区撘京东闲话亇相似程度就低于95%，故所以，当有两种官话可以选择亇辰光，昰排区域亇民众【情愿】宁选用京东闲话，也不肯继续使用自家家乡亇官话方言——毕竟，我伲东南地区亇中青年也普遍是京东闲话人口，大家全用京东闲话，自然交流起来顶顶便当。尽管我也请相关同学用佢垯家乡亇西官、中官、淮官嘞厛撘我俦交流，毕竟我会京东闲话，自然撘佢垯亇乡音俦有相当程度亇相似性，但昰种要求明显超出嘚人家对交流便捷性亇追求，至多个别人稍些撘我俦用乡音话嘚昶，不消几时就稳定亇永久性亇用京东闲话撘我俦对话啧。
昰种情况，撘普通话、北京方言、滦平闲话、东北闲话嘞啥昰排京东闲话内部“你中有我、我中有你、混沌难辨”亇状态，对比还是蛮明显亇。尽管，京东闲话内部也必然互相影响，但就对外来讲，昰个基本可以看成功一个同质性比较高亇整体，尤其是声母、韵母、声调系统。普通话亇基本盘是北京方言，最起码硬碰硬用亇是来自北京亇声韵调系统。讲北京方言是用北京语音表达；讲普通话，同样也是用北京语音表达。北京方言撘普通话可以看成功是同一个人着便装撘着正装亇关系。为此嘚共同使用北京语音，一排本来仅局限于北京地区亇方言词汇蛮容易畅通亇直接进入普通话，同时，普通话里更加具有全国通用性亇讲法也容易畅通亇直接进入北京方言，不断削弱北京方言亇独特性。一个人，特别是一个北京人，讲亇到底是普通话嗫还是北京方言，有辰光是混沌难分亇。
同样，从北京周边到东北，有相当一部分区域声韵调系统高度近似乃至基本一致，甚至词汇系统越加接近经过严格规范亇普通话而不是本地特色词还比较丰富亇北京方言，以至于据说不少地点全打出嘚“普通话之乡”亇招牌，只是滦平可能是宣传得特别成功亇。虽然全是北京官话，但北京城属于京师片，而滦平属于怀承片，两片亇差异大家有兴趣可以去深究，但滦平可以造成如此大亇声势，行大家认为昰塱么是 “普通话亇采集地”，若是呒不高度亇相似性，的确也蛮难立定脚头。当然，若假照寔恁，整个京东地区亇“普通话之乡”是也好一把一把，有排区域亇东北闲话基本就等于普通话。就像我问一个吉林同学：“佷垯当地亇方言哪恁话？”佢操嘚我伲认为亇“普通话”讲：“昰个就是我伲亇方言。”
或者话，就算考虑着京东地区内部存在一排语音层面亇差异，也无非就像全国其他地方学北京语音存在口音一样，相似性、共通性可能大于95%，也就是头先假定亇双方会稳定使用各自闲话互相交流亇忍受限度。就像现在江浙人撘广东人俦更加青睐甚至依赖带有各自口音亇京东闲话互相交流一样——虽然有差异，但毕竟差异度可能小于5%，是顶顶便捷亇交流工具。
故所以，从北京一块一直到东北相当一部分区域亇高度近似亇方言集群，全可以用“京东闲话”昰只称号予以统摄。其内部亇互相影响可以作为另一只问题讨论，但佢对于全国大多数地区亇影响是共同亇——就是大家全逐点逐点从自家乡音转用京东闲话来作为主要亇思考、表达工具。确切亇讲，当代京东闲话亇使用范围已经远远超出嘚其原生区域——大江南北、海峡两岸，全已经是京东闲话亇分布范围，只是腔调上还存在一眼差异，但已经足够保障大家便捷亇交流啧，並塱进一步亇交流中朝更加相同亇方向发展。
乃么统称为“京东闲话”有啥好处嗫？可以有助于大家，特别是语言保护圈亇同仁，看清撘理解一排问题。
首先，我伲要认识着：除脱嘚伊排只会自家当地闲话亇老人，全国中青年已经普遍全是京东闲话人口，只是同时还维持嘚一定自家当地闲话亇能力。但交关青少年已经不会当地闲话，只会京东闲话啧。语言过渡状态明显。应该要看见，全国各地乡音亇共同替代者，就是京东闲话。而我伲自家，就是京东闲话人口，应该有昰个勇气承认。若然真亇有心守护乡音，嗰么就要勇于刀口朝里，从自家做起放弃京东闲话。不然，自家每趟使用京东闲话思考撘表达亇实际行动，就是塱压缩自家乡音亇生存空间，要怪别人根本怪不出。
交关人欢喜拿乡音衰亡而畀京东闲话替代迁怒于迁居到本地亇东北人。是亇，东北人是京东闲话人口。但是，侺嗫？侺亇广大本地同乡嗫？不也全是京东闲话人口？佷仔细看看看，身边到底有几个东北人？我从读书到工作，各只学堂、各个单位里碰着亇东北人从来全只有零星、少数。交流对象不是东北人亇辰光佷就不用京东闲话啧？可以讲，本地最大亇京东闲话人群就是本地人，根本不是东北人！
还有不少人欢喜拿乡音衰亡迁怒于（黄）河南撘安徽亇中原官话撘江淮官话移民，但是，何里个人乡音不用之后是转用中官撘淮官亇？转用亇统统全是京东闲话！清爽得不得了——取代佷乡音亇是京东闲话，而不是中官撘淮官。同样，对河南人、安徽人来讲，取代佢垯乡音亇也是京东闲话。佷若然要怪佢垯：“全是因为碰着佷嘞我只好用京东闲话！”倒转来佢垯也可以怪佷亇：“全是因为碰着佷嘞我也只好用京东闲话！”嗰为啥就呒得志气索介放弃京东闲话只讲乡音嗫？侺只会乡音，啥人有能拿佷哪恁？
佷话因为（黄）河南人撘安徽人弄得佷呒能讲乡音，乃么佷碰着（洞庭）湖南人撘江西人就用乡音啧？碰着福建人、广东人就用乡音啧？不也全用京东闲话交流亇？哪怕碰着江浙其他地方亇人，甚至自家本市、本县亇人，也照样常庄塱用京东闲话，乃么也全是昰排场许亇人逼得佷不讲乡音？根本性上还是为嘚交流沟通亇极大便捷，使得佷高度依赖京东闲话。外加，从河南、安徽到福建、广东，乡音同样也是受到京东闲话亇替代，从语言保护亇角度来讲，不全是团结亇对象？
还有排语保同仁，一方面用京东闲话压缩自家乡音亇思考、表达机会，一方面强调“普通话不是北京方言！”为自家亲自推动乡音消亡亇实际行动寻找理由开脱。嗰不碍，北京方言是京东闲话，普通话也是京东闲话，就算佷话佢是滦平闲话么啧，嗰么也是京东闲话。横竖全是京东闲话，反正不是佷亇乡音！佷要用京东闲话，就是压缩佷乡音亇空间，自家就塱推动乡音亇消亡！就寔恁简单。
总数，北京、东北合称“京东”，建议大家拿“京东闲话”昰只称呼用起来，一排问题就容易看得通透。
本平台暂未开通评论，大家可至吴语学堂微博留言：
新浪微博：吴语学堂微博
你还可以通过以下方式联系我们：
投稿信箱| wugniu@126.com
联系客服
