从读音及变调习惯上来看，广义三门话的区域远远大于今之三门县域。宁海、象山的南部区域，临海东部诸镇及椒北地区，甚至天台东乡区域，这么一大片范围内的语言相似度极高，这也是本公众号名为“三门湾乡音”的原因。
白雪公主
在远猛远、远猛远个坞荡，有只王国，国王对王后多年无小人，且便诚心诚意求老天爷管顾生个小人。
落脚，王后老实一个小公主生来。箇小公主得知唣有趣相，皮肤雪白，面颊股红来对苹果样。国王对王后便讴渠“白雪公主”，对渠得知唣宠宠。
可惜，无唣昶，白雪公主个娘便生病死爻。国王亦一个新王后讨来。箇新王后寔一个精通法术个巫师。渠人也死好相相，便箇心窍忒歪猛，亦得知唣得人识，得讲望着人家比渠好，便（勿会）心过。
新王后有面魔镜，统天下何物事干都会识得。嚇箇新王后便长长问箇魔镜：“魔镜魔镜，统天下哪个女人顶好相？”
魔镜老老实实回渠：“回王后，统天下顶好相个女人便寔你。”
白雪公主日长夜大，眼一记䀹便小大娘爻，人死好相死好相，好相来便对天仙样，王后也无渠好相爻。
箇一日，王后亦去问魔镜：“魔镜魔镜，统天下哪个女人顶好相？”
魔镜讲：“回王后，且白雪公主比你还好相。”
“啊！！！”王后听爻㦜箇一斩，人便得知唣气气。
“何物啊？有胆比我好相？我不畀渠杀爻望我呶！”
嚇渠畀武士寻来，讴渠畀白雪公主带得树林里向杀爻，还要畀白雪公主个肺对肝带转来作证。
武士畀白雪公主带得树林里向，望着箇天仙样个白雪公主，实在无办法落手，便对白雪公主讲：“王后讴我畀你杀爻，你快点逃逃詨。”
武士畀一只小野猪杀爻，畀野猪个肺对肝挖出来，转去交差。
白雪公主便拼命逃拼命逃。树林里向便只渠独个人，箇竹雈头叫来便对鬼嘶样，畀渠㦜来便搿搿抖。
逃得日头架晏爻，嚇望着一间树头搭来个矮屋。白雪公主嚇便得知唣高兴，总算碰着人家头爻。
白雪公主上去敲门，无人应渠。畀门攮进去，望着里向个物事都死细细，有七张小眠床排著一排生；屋里中央个小桌上头有七只小盘、七只酒杯，还有七把小叉。白雪公主在树林里向一长日逃爻，人着力死，肚皮也瞎敀进去爻，渠畀只加只小盘上头个物事都啜点，且眠一张小眠床得，眼一记闭便困去爻。
等得天黑爻，小屋个主人家也转头爻，寔七个好心个小矮人。渠帮人日得都出门做生活，都得夜得转头。
小矮人望着屋里个物事有人动过，便一人点盏小灯去检查。渠帮人望着困在眠床得个白雪公主，便畀灯都照渠面得。帮小矮人都望呆爻：
“哇，箇小大娘老好相唻，天仙样。”
“皇天啊，介好相个小娘还未见着过。”
“好相！好相！老实好相！”
第二日枯心，白雪公主醒来个时节，望着箇七个小矮人围在横边，笑眯眯望渠。
白雪公主眼泪唰唰，畀自家个遭遇前前后后、老老实实hae3帮小矮人讲。小矮人忖渠介可怜，全部讴渠留落来住。
便箇著，白雪公主便庉小矮人屋里爻。渠日加日烧饭、扫地、铺眠床、洗衣裳，帮小矮人都得知唣高兴。
王后还忖白雪公主死爻，箇一日亦去问魔镜：“魔镜魔镜，统天下哪个女人顶好相？”
魔镜讲：“回王后，小矮人屋里个白雪公主顶好相。”
“嗯~~~”王后嚇识得白雪公主还未死，人便气抖来。
“白雪公主，我要你死~~~~~”
箇一日，王后扮著一个卖杂货个老太婆，走得小矮人个小屋头前，叫卖五彩丝带。
白雪公主门开爻，畀渠请进来。箇王后一进门便用丝带缉白雪公主个头颈得，畀渠缉得（勿会）动爻止。
“净态”产品代理：项女士135 1576 8382（微信同号）
夜得，小矮人转来，望着白雪公主倒地得不动动，连忙至紧剪刀驮来畀丝带剪断，白雪公主便活转来爻。
帮小矮人畀事干问清爽爻，且便对渠千叮咛万嘱咐：
“转套我帮人未在屋里，你门难乱开嘅。”
“对对对，千万无之乱开。”
“一定要记牢！”
王后转得王宫，亦问魔镜：“魔镜魔镜，统天下哪个女人顶好相？”
魔镜讲：“回王后，小矮人屋里个白雪公主顶好相。”
“啊~~~~”识得白雪公主还未死，王后面都气青青爻。渠作法作来，变出一把有毒个头梳，嚇亦扮著卖杂货个老太婆转，走得小屋头前。
一开始，白雪公主都（勿会）恤渠，落晏望着只头梳也老实好相，且便捱记捱记，几时亦畀门开爻。
王后门一进去，便畀头梳一把插插白雪公主个头发得，白雪公主当场便昏死去爻。
还好箇日帮小矮人转头早，畀把有毒个头梳捉爻，白雪公主亦活转来爻。
王后转得王宫，亦问魔镜：“魔镜魔镜，统天下哪个女人顶好相？”
魔镜讲：“回王后，还寔小矮人屋里个白雪公主顶好相。”
“噫~~~~”王后眼乌珠都气弹出来。
箇日，王后亦扮著一个老太婆，一只有毒个红苹果变出来，要畀白雪公主毒死。
“啊奈箇小大娘老实好相唻！我个苹果亦箇红亦箇香，你买点去哎。呶呶，我送只畀你啜啜相起呶，你肯定中意啜个。”
听渠箇七糊八绕，白雪公主亦畀门开爻，苹果接过来还只一口咬落去，人便当场倒地得死爻。
王后转得王宫，亦问魔镜：“嘿嘿嘿，魔镜魔镜，统天下哪个女人顶好相？”
魔镜讲：“回王后，且算你顶好相爻。”
“呵呵呵~~~~~~~”王后且便高兴来死笑。
黄昏时节，七个小矮人转得屋里，望着白雪公主倒地得，大家势人连忙至紧畀渠称得眠床上去，何物办法都用爻，白雪公主都（勿会）醒。
帮小矮人得知唣心痛，眼泪唰唰，畀白雪公主放箇水晶棺材里向，里头鲜花摆满。本来打算葬爻，望渠个面色白里透红，恰对在得困样，便先放山得起。
箇日，邻国个王子得树林里向打猎，碰着箇七个小矮人，还望着眠在箇水晶棺材里向对天仙样个白雪公主。白雪公主皮肤雪白，面色红润，一点也不像死爻个人，王子一眼望着便中意渠爻。帮小矮人箇时节便前前后后畀络事干都讲畀王子听，王子听爻便眼泪䀹䀹。王子想畀白雪公主连人带棺材搬得渠自家王宫转去，好好个保管，帮小矮人也都同意爻。
手下搬个时节，不小心撞树得。白雪公主箇一记震，嘴得口苹果也震出来爻，身家慢慢时暖转来，眼也开爻，人亦活转来爻。
“欸欸欸，望着爻不？望着爻不？白雪公主醒爻！白雪公主活转来爻！”
帮小矮人且便得知唣高兴，亦箇跳亦箇笑。王子也死高兴，渠上去和双手畀白雪公主牵转来，讲：“公主，我中意你，对我和队转去无较不？我想你做我个王妃。”
白雪公主面听红来，畀头点点。
白雪公主还未活转来个时节，魔镜都讲王后寔统天下顶好相个女人。箇日，渠亦得人识相走去问问：“嘿嘿嘿，魔镜魔镜，邻国王子结婚，我打算过去贺喜，不晓得寔我好相咛？还寔箇王妃好相？嘿嘿嘿。”
魔镜讲：“回王后，白雪公主比你还好相，渠便寔你讲个王妃。”
王后听爻便差点气昏去，便想借贺喜个机会畀白雪公主杀爻。
到得邻国王宫，箇王后一进门，白雪公主便望着渠爻，当场手脚都㦜懦光，头在解旋，差点昏倒。王子老早便畀一双烧来暄红个铁鞋准备好爻，便等箇歪王后上门。渠讴箇七个小矮人畀王后揢牢定，逼渠畀双暄红个铁鞋着得跳舞，一直跳得死止。
“净态”产品代理：项女士135 1576 8382（微信同号）
联系客服
