三门湾乡音
从读音及变调习惯上来看，宁海、象山之南乡，临海下乡，椒北，甚至天台、仙居两地之东乡，这么一大片范围内的语言相似度极高，这也是本号名为“三门湾乡音”的原因。共说本地话，同做文明人。
第二届乡音茶话会
于正月初一下午在三门技师学院举行
欢迎大家过来坐坐
武 松 打 虎
吴语翻译：王怀军
旁白：王怀军
武松：屠建伟
店家：陈祥麟
配乐：英雄的黎明、天地孤影任我行、In The Tunnels
武松在路得几日走爻，到得阳谷县地界，离县城还远猛远。箇日走得日昼边，肚瞎烧来，望着头前有眼饭店，一面旗挂在门口头，上头五只字写得：“三碗过冈”。 武松进去坐下来，畀哨棒隑横边：“老板，酒驮来，酒驮出来，快点欸。”讲完，店家便畀三口碗，一双箸，一碟暖菜，掇得武松头前，亦满膯膯一碗酒泻来。武松酒掇来一口吃光，讲：“箇酒劲道介大！老板，何物垫肚个物事有不？驮点来过老酒。”店家讲：“便只熟牛肉嚎。”武松讲：“无较个，畀我切个两三斤来。”
店家进去熟牛肉切两斤，放大盘上向，掇得武松头前，亦畀渠酒泻碗凑。武松吃完讲句：“好酒！”箇头店家接牢定亦畀渠一碗酒泻得。
等得武松三碗酒吃完，店家便不来泻爻。武松放桌得便死敲：“老板，酒不倒吤？”店家讲：“客，你得想加肉便讲声呺。”武松讲：“我酒对肉都要要啦。”店家讲：“肉好加，酒无之加爻了。”武松装奇来：“箇怎装法嘅？酒不畀我吃算装何物嘅？”店家讲：“客，我门口头箇面旗得清清爽爽写得：'三碗
店家望渠箇主讲，且亦畀渠泻三碗凑。武松吃爻，讲：“箇酒老实好！老板，我吃一碗便解一碗酒钱，你畀我倒来便是爻。”店家讲：“啊奈客欸，你难只忖吃落去嚎，箇酒老实要畀人咜倒吤，到时节无药医吤！”武松讲：“休要在得糊嘞！你还想药差里面啊？我鼻头嗅不出吤？”
店家得武松箇一套讲，亦接连泻三碗凑。武松讲：“要便肉畀我装两斤凑相。”店家亦两斤熟牛肉切来，酒泻三碗。
武松越吃越想吃，便对饿牢里向放出来样。渠在包裹里向驮点细碎银子，对店家讲：“老板，你过来望望相，介多银子解你个酒肉钱，你讲有爻不欸？”店家过来张眼，讲：“有猛爻，有猛爻，还要倒找转畀你。”武松讲：“甮找算数，你畀我酒倒来便是爻。”店家讲：“客官，还五六碗有呺，你会吃落啊？”武松讲：“只五六碗当何物唵，你倒来便是唵。”店家讲：“你箇人人山介长大，得讲醉爻了怎防防你得牢！”武松回渠：“要你防还算好汉啊？”
店家酒便不倒，畀武松装胀来，讲：“我何物是来白吃吤？畀我装卵来便，畀你屋里都敲光！畀你间鸟店反反訤你相信不相信？”店家在肚得忖忖：“嚇渠姨爻嘅，箇婊子儿老实吃醉爻了。算数算数，不对渠嬲，但凭渠。”嚇咛，亦走去六碗酒泻来凑畀武松吃。武松前前后后十八碗吃爻，且nan3起身，哨棒挈挈，讲：“我何里会醉嘞！”走得门口头，朝面旗笑笑：“'三碗过冈’， 还好意思讲！”讲完，哨棒挈挈便走。
店家追出来讴：“得何里去欸？客。”武松停落来，问：“讴我装何物唵？少你酒钱啊？”店家讲：“阿奈客，我是好心啦。我一篇榜文抄解得，你顶好转来望望相。”武松问：“何物榜文？”店家讲：“箇迈程啊，头前个景阳冈有一只吊眼睛白额头个大虫，夜夜摸出来拖人，两三十个过路客个性命断得訤爻了。官府扣在得压打猎人限日子去畀大虫揢爻。山脚个路口得都有榜文迫得，讴来去个过路客都要结成帮，在巳午未箇三个时辰得向过冈；寅卯申酉戌亥箇六个时辰都无之去。独个人便甮管唣昶都无之去。箇且扣是未时个尾申时个头，我见你走出去问都不问，㦜你个性命白断断山得訤。要便晚头在我得歇夜，等到天亮枯心人斗得两三十个爻了，且佐队上山去。”
武松听爻笑笑：“我是清河县人，箇条景阳冈少讲讲也有头两十带走过，几时听讲过有大虫？你休要疆得鬼话装来畀我㦜㦜！——便算有大虫，我也不㦜！”店家讲：“阿奈客，我是好意救你wae3，你相信便进来榜文望望相咛。”武松讲：“望屁啊望！便算老实有老虎，你大爷我也不㦜啦！你讴我在你得歇夜，你是想半夜三更谋财害命正是不唵？嚇装只鸟大虫来㦜㦜我。” 店家讲：“难难难~~~，箇讲话讲来介难听！还谋财害命都讲出来，劳狗咬吕洞宾，不识好人心啦。你相信便但凭你唵，管你去也好留也好嘞！”店家一头讲，一头头摇摇，进得店里向去爻。
武松哨棒挈挈，大踏步朝景阳冈走去。差不多四五里路走爻，到得山脚下，见着一株大树，皮刮爻，一片白，上头两行字写得。武松字也两只识得，头窍来望望，上头写：“间箇迈时景阳冈有大虫伤人，来去客商都要在巳午未三个时辰结帮成队过冈，难去犯差。”
武松望爻笑笑：“箇肯定是箇老板挈来个花头眼，装点畀人㦜㦜，好讴大世家得渠店得歇夜。我卵也㦜唻！”便哨棒在地得拖拖，望山得上去。
解个时节也是申时靠近黄昏爻，日头对红霞和队，慢慢示朝山冈头落去。武松借着酒劲，头笃得只顾上山。半里路还朆走到，远打远望着一间旧爿爿个山王老爷殿。走得老爷殿头前，望着一张带印信个榜文迫在老爷殿个门口头。武松停落来望望，上头写：
阳谷县示：间景阳冈一只新大虫伤害人命，箇关杖限各乡里正对打猎人去揢都朆揢牢。得讲有客商来去，要在巳午未三个时辰结伴过冈；各个时段，还有独个人客，都无之过，便㦜性命断得。大家世人自家有数。
政和某年某月某日。
武松印信榜文读爻，嚇识得老实有大虫；想转身得饭店去，亦在肚得忖忖：“且怎装，若讲走转去肯定让箇个老板便一顿笑，讲我不是好汉。箇生活无较用，无之转嘅。”亦一昶忖爻，讲：“㦜个毛啊！来也来爻，便上去望望相！”
两步走爻，酒劲上来，便畀凉帽簦下落来擐背脊得，亦畀哨棒夹箇手胠下，朝山岗头一步一步nan3上去；擂转头望望，箇日头也一点一点望山得脱落去爻。且扣是十月个天架，日短夜长，暗来也快。武松自言自语：“何里来个大虫！都是人自㦜自在得，无胆上山呶。”
武松一直路走爻，酒劲发作发来，全身焦热。渠一只手挈哨棒，一只手畀胸头板头前个衣裳都hua2爻，摇记晃记，朝箇乱树解冲去。武松望着一块俊平镜光个大青石，便畀哨棒隑横边，人倒倒落去。扣要困个时节，一蓬狂风辵过来。风过爻，且听着箇乱树后头扑声响，一只吊睛白额大虫跳出来。武松望着，讴声“阿奈姨欸”，趁箇大青石上头翻转落来，哨棒揢手得，避得横边。只大虫肚瞎嘴燥，两只脚爪在地得一记捺，身家箇一记高猛高扑上去，趁半空里朝武松窜落来。武松箇一记㦜，酒都变著冷汗撒出来光爻。
只见大虫亦扑来，武松连忙至紧跳得横边，擪在大虫箇朏臀后。箇大虫朏臀后望人顶难望，便畀前脚爪搭地得，畀腰横过来用力箇一记扫。武松亦一记闪，避得横边。大虫见扫渠不着，“哄”声响叫来，便对雷佛响样，山都振来引引动，亦畀箇铁棒样个老虎尾巴竖来，用力箇一记掼。武松亦避得横边。箇大虫揢人本来便只扑，扫，掼箇三样；箇三样得讲还揢不着，一半气性便没有爻。大虫见掼也掼不着，亦叫声凑，一个旋便亦旋转过来。
武松见大虫身家撚转过来，便和双手畀梗哨棒挈来高猛高，全身家个气力都用落去光，朝大虫箇一棒掼掼落去。只听着“啪”个一声，树梗对树叶便目劳劳打脱落来，且渠识得，带头箇一掼掼着急猛，大虫未打着，打箇树丫杈得，畀梗哨棒打断子两橛生，还剩半橛揢手得。大虫大吼大叫，越装越凶，转身亦一记扑过来。武松望后头十把步远跳出去，大虫箇双前脚爪扣当当搭在武松个眼头前。武松畀箇半橛棒断断訤，两只手趁大虫个头扣笃落个时节，畀渠头顶箇块顶花皮一把揪牢定，箇一记捺捺落去。大虫着急来便手脚乱抓，想爬转出去，得武松拼死命捺解定，甐也甐。
武松用力朝大虫个面、眼睛得便只顾乱zau3。大虫一头叫，一头在身底下爬两堆黄泥，挖一只土坑。武松畀大虫个嘴望箇黄泥坑得捺进去。大虫吃武松不落，气力也慢慢示少落去爻。武松借手畀大虫个顶花皮死揪揪牢定，顺手抽出来，杀鸡槌放出来，铁榔头样个大细拳头，瞩大虫个头得只顾打。打得五、六十拳上落，箇大虫个眼，嘴，鼻头，耳朵，都是直直浰个血光，倒解定不动动，剩口气在解进出。武松手放爻，嚇走得松树横边畀梗哨棒橛寻转来，揢手得；亦㦜大虫死，用箇段哨棒橛亦放得一顿打爻。望着大虫气都没有爻，武松且畀棒断爻，在肚得忖忖：“要便且便畀箇死大虫拖得山下去？……”且便和双手走去拖倒箇血塘里向个大虫，何里会拔得动欸，甐也甐。头前气力用爻镜光，手脚都hua3糊倒懦光。
—— 完 ——
电梯咨询热线：136 766 76763
乡音是心灵的故乡
感谢欣赏
联系客服
