看著标题侬大概晓得，阿拉该期要讲“玩”。常庄讲“坐有坐相，立有立相”，坐搭著立，全有讲究，箇么玩起来呢，也有番讲究。在慈溪，玩个讲法倒是邪气多：嬉嬉、搞搞、嬲和、游六门、白相相......其拉个用法，也各有千秋。
慈溪人顶欢喜讲“嬉”。“嬉”就是广义个玩，既可“楼下底嬉嬉”，亦可“乘飞机去嬉”；“嬉一顷”是玩一歇歇，“做嬉客”是去旅行，“嬉家生”便是玩具了。总归，大玩可，小玩也可。
该个还不够，别人讲侬“嬉花头”，是在讲侬玩花样；讲侬“嬉调缠”，是侬太难弄了；若是“嬉”加上啥个器官，难么要小心！是其在骂侬呢！1981年电影《西安事变》里向，孙飞虎饰演个蒋介石，一句“倷娘嬉䏘”，竟一传十，十传百，被传成“国骂”！真个假个勿要去管其，先勿先，外地个朋友听勿听得懂，讲勿讲得蓝衫，已经是个问题了。
搞也是玩，其比“嬉”更细致眼，有固定个对象，侬比方讲，“搞石头”是玩石头子，“搞烂污泥”就是玩烂泥，还有“搞水”、“搞橡皮泥”，倒像煞小朋友个专用词。当然啦，小朋友介可爱么，本身也可能变成一种好玩个物事。比方，有眼童心未泯个大朋友，看见自家小人么，总熬勿牢上去逗其一逗，拨长辈看见著么，也难免听一顿骂头：“小人好好叫困觉浪，侬去断命个搞其作啥啦！”
搞搞似乎是其拉绍兴许头个话法，来东阿拉慈溪西首频率更高一眼；杭州话语里似乎也有“搞搞儿”个话法。
嬲字音同“乃”，在普通话里向念“鸟”，是一种特别宁波个讲法，勿相信么侬来感受一记：“小娃儿一个人无人嬲和，真真无趣相煞！”“介大人了，做出事体嬲和一样。”该个辰光，若改成嬲嬲和，情绪就缓和仔交关了：“我头貌是搭侬嬲嬲和，侬莫要生气！”
衍生出个“嬲和嬉头”，是开玩笑个意思：“大家嬲和嬉头讲讲，莫要当真”。“嬲和东西”便是玩具了。
宁波老话里还有个词叫“游六门”，也是玩个意思，何出此言呢？原来宁波古城老底子有六门（最早有十门），分别是永丰门、和义门、东渡门、灵桥门、长春门、望京门。游六门，自然是来该宁波游玩啦。
宁波人常讲，侬相相看，相电视、相戏文、相医生、相来相去，样样式式全好相。“相”即是看，但比看要来得认真，来得细致，有个辰光呢，情绪更加重些，比方，小囡看电视勿肯吃饭，大人总归要板起面孔，讲一声“侬再相呐！”故而，带有相个“相道”、“卖相”、“吃相”，也大多数带有责备个意思，比如“吃饭脚刮刮个抖抖，啥个相道！”
既然相是看，那么白相就是白看喽，白看就是勿使铜钿个，比如来到西子湖畔，搿亭台楼阁，湖光山色，全是“弗要铜钿，白相相个”。搿能介一来，白相便成了玩的意思，慢慢叫，使勿使铜钿也无所谓了。慈溪人会得讲“来来来，阿拉搓点小麻将白相相”，宁波言话里“白相果”就是玩具的意思。
还有一种“白相人”，顾名思义，便是玩乐人生个人，原来，是讲搿眼老欢喜轧朋友，帮助穷人个人，箇么，可是好人否？后首来，勿晓得哪能，慢慢叫就变著味道，专门用来讲哀眼无业游荡个流氓胚子。搿是男个，女个呢，叫“白相人嫂嫂”。
该个词搭普通言话一样，不过发音有所勿同。单作动词个辰光，用白读，在慈溪说话里向同“慢 main”；在词语里向呢，大多数用文读，在慈溪言话搭普通话差不多。比方讲“玩玩具 main wain-gyu”，前头后头“玩”发音是两样生个。
当然，表示玩个词语笃定还有，比方小人发痴一样个玩叫“发废”，去隔壁邻舍屋里玩叫“跄人家”，玩弄叫做调排，不一而足，就勿一一列举哉。
听著介许多，勿晓得倷对阿拉慈溪个“玩”可有啥看法？如果觉着有趣，欢迎侬个关注。好哉，阿拉下朝再会。
更多慈韵的文章：
打赏 ☺
联系客服
