苏白学堂，做最优秀的苏州话教学与传承平台。
本栏目由灬醉里吴音灬授权转发
宠物，有人喜，有人不喜，无可强求
你可以不爱，请别伤害
依旧是我们的孙悟空，给大家说说，那年那狗那些事
「昏说乱话开始哉」
各位手机前头个听众朋友大家好，欢迎大家收听今朝一期个昏说乱话，我是唔笃个老朋友孙悟空。
今朝是三月九号礼拜四……弗好意思外头洗衣机勒滚，作兴录进去点声音。
那么今朝头一个呢我要非常感谢一位听众叫上官竹韵，为啥要感谢俚呢？因为俚帮我寄仔实梗几样物事，包括米仁啊，赤豆啊，还有一个冰糖，侪是云南搿面点个物事经，直接买仔寄拨我，让我补补身体，养养学咙。还有点蔬菜干勒啥物事，还有点茶叶，应该讲很有心。
虽然物事很简单，但是哀个心意呢我确实收下来哉。哀搭呢也非常感谢哀位听众，也希望哀位听众还有现在勒收听个别个听众侪可以继续来关注我，来关注到我个节目，应该讲非常感谢。
另外一个呢，就是今朝要讲的呢是宠物。也是今朝去看仔搿本电影，最近蛮红个叫《一条狗的使命》。那么哀场一本电影，很简单。今朝呢，礼拜四正好休息去看。整个电影院，连我，前面两排还有一对应该是小情侣吧，三个人。写意是写意，坐勒里向，搿场么叫看电影，必必静，也呒不人吵，呒不人孛相手机，一个人也呒不，写写意意看仔一本电影。应该讲哀本电影呢真个拍得蛮好个。
我也看仔点人家个评论，有种人讲：虽然弗是大片个效果，但是情怀满分。几个故事，描述仔人搭狗相互个感情，得到仔很好个表现。
那么还有人讲，应该是一个男生个评论，唔倷讲：刚刚搭一个女生，第二埭看哀本电影，偷偷交哭仔三埭，现在我躺勒床浪过来发评论。
阿末点辰光两位男女主角个重逢心里向想，应该唔笃重逢个辰光呢去拉女生个手，结果呢唔倷弗敢，俚讲活该我是个单身狗。哀个也蛮有劲个。
还有人讲呢我个狗呢死因也是肾脏弗来三，从十四岁陪我到廿五岁。后头我也不讲了蛮作孽葛，拿里埋脱。
当然啦也有半颗星葛，唔倷讲看过最难看个电影没有之一，完全没有故事内容！哀个么我也真个呒不话讲哉，我觉着哀本电影蛮好个哇。
应该讲我看下来呢也是蛮感动个，因为我也养过狗，相信现在养狗个人交交关关。很多很普遍拿狗当自家个小人，好朋友，跟俚一道睏觉也有葛，应该讲侪是蛮普遍葛。
我小辰光养狗呢，我记得就是勒我外公阿爹个屋里，唔倷养。最最早个记忆是一条黑狗，额骨头浪呢有两个黄点点个，大家应该有印象哀种狗。我外公阿爹对我讲搿个是天狗，是三眼杨戬个天狗，哮天犬。
我相信个，我想哦哟屋里狠得啦，有哀场一只狗。过后估计也是送脱了纳亨哉。
过后印象就弗是特别深啦，当然头一个印象比较深个是一只黄颜色个小草狗。搿歇辰光小了，狗小辰光大家侪晓得蛮有劲个，肉滚滚个，耳朵么拖勒嗨，登勒屋里。
我搿歇辰光看见狗吓葛，唔倷么沙发门前坐勒嗨，我个脚么缩勒沙发浪，脚弗敢放下去。我外公就对我讲，倷脚放下去，唔倷弗会得咬你葛！
那么我放下去发现俚是朆咬我，跟我也蛮好，经常陪我孛相。登勒个房间里奔来奔去奔来奔去。哀个也是我对狗最早个记忆哉，过后当然也是送脱哉。名字叫宝宝，过后养个狗呢侪叫宝宝，也蛮有劲葛。
接下来也蛮有记忆个呢也叫宝宝，是一只黑狗……搿只黑狗那，总归，倷想狗黑，还生毛，当然啦也是搿种，伲屋里养个狗弗是搿种很好个品种啦，就是草狗搭搿种京巴杂交。
搿只黑狗呢我也蛮欢喜，应该讲过后也是送脱，我哭是哭的勒。弗牵牢俚个，自家出去自家会得转来葛。有一埭发现俚身浪向像煞被人家弄着个汤水，估计吃着点苦头，想想也蛮心痛。
那么过后也养过一只也是赭石颜色葛，也是叫宝宝，嘴巴黑葛，总归搿几只狗呢只只侪蛮欢喜葛，也是陪我一个童年个记忆啦屋里向。
搿歇辰光养狗呒不现在实梗应该讲娇贵啦。首先弗好困勒床浪个，那么勒嗨客堂间个台子底下帮俚厚厚叫弄一层布啦让俚就睏勒上头。俚也蛮自觉，总归睏勒搿搭葛。
要拆尿呢，训的蛮好个，要拆尿要纳亨会得抓门个。那么带俚出去，摒牢个，屋里拆仔要哈葛。
吃饭么搿歇辰光呒不狗粮，弗吃狗粮，侪是吃饭，拿肉汤捣捣，放点肉丝。我印象蛮深，狗呢总归欢喜拿肉丝吃光，那么饭么只吃一点点，肉丝好吃，狗么只要吃肉个呀。有辰光屋里有小骨头么也丢拨俚吃吃。有辰光么也喂俚一块肉吃吃，哀种么侪是无所谓葛。
所以狗呢过后我晓得，喂肉吃要有眼屎葛，眼屎也蛮多，我专门帮俚揩葛。我屋里向姆妈么也蛮欢喜搿两只狗个，侪蛮好葛，送脱么也呒不办法。
应该讲下来呢我弗会养狗，但别过对哀种动物呢我个人侪是蛮欢喜个。那么我上班个场化离开屋里比较远，也是一个人住，有辰光也会碰着狗葛。有种狗会得跟牢我跟到屋里门口的了，那么我就拨俚笃点物事吃。
那么有种狗作孽的了，搿种菜皮也吃个。那么我屋里正好有杏仁酥，桃酥，唔笃搿个也吃个。我想蛮好吃就吃吧，饼干也吃个，我自家么也吃不脱拨唔笃吃吃。吃仔唔笃也就走哉，过后定期总归夜里会得来葛。
那么旧年一个年呢，搿三只狗一只也朆来过，我也看见搿面有种人我也弗晓得是当地人还是外地人，拿搿种狗来杀。看得出勒搿面杀狗。所以我也懂哉，一个年搿点狗总归拨人家吃光哉，想想唔笃也蛮作孽葛，真个作孽。
应该讲狗是比较聪明比较通人性个物事，为啥人养狗最多？当然养猫也蛮多，养乌龟养鱼侪有。但是狗哀个物事就比较特殊，唔倷搭人个记忆搭人个互动会得很多。你想么养两条鱼么最多看唔笃游游泳阿是啦。
所以也希望大家珍惜自家养个物事，既然养就对俚笃负责任，覅抛弃唔笃，覅挥脱唔笃。
今朝个音乐呢，再用一埭哀个，下埭再换，再会。
【版权归作者所有，文字稿由苏白学堂整理推送】
词汇说明：
1. 作兴tsoq shin：可能
2. 物事meq zy：东西
3. 米仁mi gnin：「记音」薏仁
4. 学咙ghoq lon：「记音」喉咙
5. 写意sia i：舒服
6. 必必静piq piq zin：非常安静
7. 交交关关ciau ciau kue kue：非常，很多
8. 额骨头ngaq kueq deu：额头
9. 拖tha：耷拉着的样子
10. 吓haq：害怕
11. 唔倷n ne：他
12. 奔pen：跑
13. 客堂间khaq daon ke：中式房屋的客厅
14. 拆尿tshaq syu：撒尿
15. 摒牢pin lau：屏住
16. 哈ha：「记音」打
17. 揩kha：擦
18. 挥脱hue theq：扔掉
联系客服
