年年说台风,年年侪赛过狼来哉,朆壳张今年倒弗是卖卖野人头。
台风利奇马一上来就淹脱仔台州临海,半夜里宣州宁国也告急,现在望准山东跑,受灾个城市一只接仔一只。
天灾门前,人是实梗无力,希望大家侪能挺牢。
而每到该诸辰光,就想感谢伍子胥,搭伲苏州城选仔个好地方。
苏州 古城择址
古人建城,侪要看风水个,虽然讲风水该样物事一向有争议,但不过城市选址要考量周围个生态坏境总归是弗错个。
按照传统风水学个理论,城市最好要依山傍水个,但不过苏州城个位置像煞亦弗靠山亦弗临水,正好勒海一个大平原上头,该个亦是捺亨桩事体呢?
据传,苏州城最早是伍子胥奉吴王阖闾个命令,象天法地相土尝水而建。
伍子胥“相其阴阳之和,尝其水泉之味,审其土地之宜,观其草木之饶,然后营邑立城。”——《汉书·晁错传》卷四十九
苏州城虽然弗靠山临水,但不过北近长江,西有太湖,有“三江五湖”之利,水陆交通便当,边浪还有一大片水乡平原,腹地广阔。
民国《吴县志》·太湖全图
古城搭太湖当中有一排连牵个山隔开,太湖水就弗会直接冲击城区哉。而城区亦勒海丘陵到平原过渡个地带,地势比较高,赛过造勒拱起来个龟背形地形个最高处。实勒,碰着水氽个辰光,就有天然个泄洪条件哉。
苏州古城水利
虽然讲地势相对较高,但不过比起边浪个嘉兴、湖州、常州来讲还是矮着点。搿勒,另外一个城建主题就愈加重要哉——引水入城。
因为地属水乡泽国,苏州古早辰光水患频发,苏州城个历史也就是一部治水史。
勒海一开始选址个辰光,伍子胥就从古城独特个地理环境出发,以“水”为中心规划城市,“因天材,就地利”,引水入城,发展出独特个水陆双棋盘城市格局。
阖闾城平面示意图
苏州城一开始造个辰光开仔八只城门,东西南北四只方向各有水陆城门两对,但不过位置弗完全对称,作兴就是根据当时辰光古城内外的河道、湖荡走势设计,用于调节水利个。
古城里个河道主要是人工开挖个,到唐朝辰光就已经形成仔“大河三横四直,郡郭三百余巷”个规模。
所谓个“三横四直”讲个就是城里向个主要河道,特别是直河,可以沟通、调节横河个水,让整个城里向个水位、流速保持一致。
老法头有“以塘行水,以泾均水”个说法,该场个河道系统一脚保持到仔今朝。
唐代苏州城规划示意图
从南宋重建平江城起到解放以前,苏州古城主要就有进出水口各两只。
进水口:西北方向引枫江运河水进阊门第一横河;西南方向引胥江太湖水进盘门到第一直河。
出水口:东北方向从第一横河汇集北半城水出娄门进娄江入海;东南方向从第三横河汇集南半城水出葑门分流到娄江、吴淞江。
城里向个运河,除脱往来沟通以外,还能充当一只小型水库,旱时蓄水,涝时分洪。
吴中水利全书·苏州府水道总图
实勒明朝有云“故虽有泽国,而城中未尝有垫溺荡析之患。”苏州城一脚到现在,也确实朆捺亨碰着过严重个“内涝”问题。
苏州城隍庙里有一块清朝嘉庆年间立个《三横四直图碑》,就细细叫个描述仔苏州古城里个水系走向。
史载,苏州城从西汉到同治个两千多年辰光里,犯洪、潮只有七趟,唐朝以前五埭,宋朝两埭。而就算是98年个长江流域特大洪水,也朆对苏州古城造功成特别大个损失。
苏州城“面水而无浸润之害,而得水利之益”,着实是幸亏得古人个因势建城之功啊。
文 | 予安
版 | 予安
图片来自《苏州古城结构形态演化研究》
联系客服