阿拉小辰光，社会物质供应实在呒没现在介丰富，交关物事侪是DIY——自家动手做个。记得埃个辰光比较吃香个有两样：
一样是矿石机。先到虬江路、中央商场淘零件。一只像现在卷筒纸芯子个磁鼓、一卷漆包铜线，几只电阻电容两极管，寻一块胶木板，钻好洞眼，乃末电烙铁蘸蘸松香焊啊焊啊……阿拉楼下亭子间小毛就会做。松香烊脱格味道一出来，小毛拉娘就会辣公用厨房间里，边像数落边像卖洋介告诉阿拉：“小毛又辣爬肚肠了。”矿石机实际浪就是一种简单个收音机。利用电磁转换原理搭仔信号放大电路，收听广播电台电波。为仔听得清爽，还要搭一根铜丝辣自来水管子浪做天线。我听过小毛做个矿石收音机，嗤啦嗤啦侪是交流声，真正电台难板听得到。难度还要高一眼个是做煤油炉。老早勿是家家人家侪有煤气个，更加覅讲电磁灶、微波炉了。赅只煤油炉老扎台型了！做煤油炉先要觅宝介觅交关相巧个马口铁罐头。大一眼扁扁个饼干听用来做底盘，也是摆煤油个油箱。挨下来是两三只口径各样格铁罐头做煤油炉格胆，最难触祭【吃】个是让灯芯火绒上升下降个传动装置。隔壁长脚爷叔做个煤油炉，外面油漆得邪气好看，就是烧个辰光灯芯勿好夹大小，一只火头用到底。拨人家笑仔长长远远。现在个DIY，阿拉老里八早白相过了。
