作者：王建运
推荐、指导：丁迪蒙
沪语改写、朗读：颜海雯
点击下方收听音频，时长10分05秒。
1843年11月上海正式开埠。从此，上海从一个勿起眼个海边县城，开始朝远东第一大都市跨进。随着申城西风日进，西式菜馆也随之增多，到了二十世纪初，法式、德式、俄式西菜馆勒该沪上已成为主流，所以旧上海各类西菜馆个数量之集中、规模之厐大，恐怕勒该旧中国也已经算得上是名列前茅了。
民国初，上海滩西餐馆里最有名是法式麦瑞（上世纪40年代停业），伊勿但在于风味正宗，还以传授西菜烹饪技术而著名，上海滩西菜馆个名厨十有八九出自伊个门下。德式西菜馆主要是来喜搭仔华府两家最最有名；俄式菜馆大多集中林森路一带（也就是今朝个淮海路一段），以罗宋西餐为主，价钿最便宜，相当于中式快餐类。上海西餐价钿最贵个当推国际饭店帮华懋饭店，排勒盖伊拉后面个依次是汇中饭店（今和平饭店）、礼查饭店、沙利饭店、都城饭店、马尔士饭店和义利饭店等，侪勒该盖南京路高头，侪是经营纯粹西洋风味西餐馆。
旧上海为半殖民地性质，东西文化相交也深融于沪上餐饮业，于是便派生出民国时期申城餐饮业奇观——中国式西餐。经营者既有洋人也有中国人，主要菜式品种有得蕃茄汤、牛尾汤、鲍鱼鸡丝汤、冬菇白汁鱼、咸猪脚、咖喱羊肉、吉利羊肉、炝牛肉、火腿蛋、咖喱鸡、蕃茄鸡饭、火腿冬菇鸡饭、铁排鹌鹑、五香鸽子等，搿种中西风味交融个菜馆勿仅吸引了洋人，也为中国人所喜好，一度风靡上海滩。中西结合菜馆，老底子上海主要有一品香、一家春番菜社、上海西菜社、大西洋西菜社、中央西菜社、东亚酒楼、印度加厘饭店、晋隆西菜社、新利查番菜社、凯福饭店、荣康中西菜社等。
当年上海高档个华懋、汇中、百老汇等西餐馆建筑富丽堂皇，所用餐具刀叉器皿更加是弹眼落睛，金光琤亮。每当华灯初上，坐勒里向凭窗品酒，欣赏一下过往行人或眺望黄浦江高头夕阳个余晖，倒也勿失为一个洋人怀念故乡个绝妙场所。
讲到沪上正宗个西式菜肴，以国人个口味实在呒啥值得称道个地方，至于都城、国际大牌西餐馆，常庄是沪上名媛小姐、商贾大亨出入交际首选之地，环顾左右个绮袖丹裳、云髻蛾眉，陪伴西装革履或一派中式着装个名人光临，搿辰光勒盖此地品尝所谓西式大菜，已经是醉翁之意勿在酒了。
当年地处静安寺路个大华西餐饭店，色香味倒是名扬一时，难怪当年蒋总统与夫人美龄结婚宴请宾客就挑选搿搭地方，伊拉厨房个掌厨是老板重金礼聘个一位罗马名庖，做出来个法国菜、意大利菜是超水准个。可惜搿家饭店开了呒没多少辰光，勿晓得啥道理突然歇业了，一部分场地后来改成了也是大名鼎鼎的美琪电影院。
旧上海还有一眼场面勿大、布置幽静个中小型西餐馆，也各有各个拿手菜，比如葛罗路（今嵩山路）个碧罗西餐店个铁扒比目鱼，忌司煎小牛肉，味道纯正可以讲全上海个西菜馆侪做勿出来。霞飞路（今淮海中路）有一叫DDS西点店，咖啡味道浓郁芬芳相当有名，伊个拿手菜是洋葱柠檬汁串烧羊肉，凡是北方梨园名角应约到上海登台，伊拉侪要到此地吃一顿串烧羊肉。
亚尔培路（今陕西南路）有一家纯法式叫红房子个西餐馆，伊拉店里个法国红酒原盅子鸡、羊肉卷饼、百合蒜泥焗鲜蛤蜊，侪是当时沪上只此一家个招牌菜。因店堂内个布置高贵典雅，并且老幽静个，所以当时上海名媛勒盖交际场合风头最健个像周淑苹、陈皓明、殷明珠、傅文豪、唐瑛、盛三等，侪是红房子西餐店个常客。陈是民国政府驻德大使陈蔗青个掌上明珠，周则是沪上邮票大王周今觉个爱女。有一日子，两家头勒盖跑马厅赌马，赌注就是但凡当日夜里向勒盖红房子就餐个仕女，由输脱个人出资奉送红酒原盅子鸡，结果输家陈小姐一下子买单近60份，绝对是风头出足。
旧上海风月场高头花事竞选如火如荼，啥个“花国总统”肖红、“富春楼六娘”小林黛玉等，一度曾红得来发紫，伊拉吃西菜经常叫南京路、虞洽卿路（今西藏中路）口个一家晋隆店外送，搿只饭店几乎成了伊拉个私人饭庄。晋隆还有一只时菜叫忌司炸蟹盖，就是拿蟹蒸熟剔出蟹膏搭仔蟹肉，放勒盖蟹盖里洒上一层厚厚个忌司粉，再放进烤箱烤熟了吃，勿但省脱了自家动手剥，而且蟹个鲜味完全保留了下来，欢喜吃蟹个老饕客可以大快朵颐。
西餐馆只有白颜色个洋醋，吃蟹蘸白醋实在大煞风景，于是晋隆个领班遇到阔客，就会得特意奉上所谓“特制私房高醋”，其实就是镇江香醋再兑点姜汁勒盖里向而已，迭能却赚了顾客勿少小费。据讲搿只炸蟹盖菜，还是勒盖袁世凯二公子袁克文当年亲自指导下头发明出来个呢。
（朗读者近照）
来源：“吳越小豬”微信公众号
联系客服
