刘芳华-吃食堂 来自麦唐作 00:00 08:30
作者：谢其章
来源：文汇报笔会2019.5.14
改编：郭莉
朗读：刘芳华
推荐：丁迪蒙
图片来自网络
[由于公众号平台赞赏功能规则有变化，如想打赏，可长按打赏码（页面下方倒数第2个二维码），多谢朋友们对“麦唐作”的支持！]
“吃食堂”是只老名词。我还勒上班个辰光，早饭勒屋里向吃，吃中饭吃夜饭個辰光，同事道里会得问：“带饭了伐？呒没带末，就一道吃食堂伐。”一般单位個食堂，大一眼个早、中、夜三顿侪开饭，小单位呢，有個只管中飯、夜饭，有个只管中饭一顿。现在再讲起“吃食堂”，心里倒是有仔交关感慨。
要是拿小学辰光也算上来，我搿辈子除脫仔下乡插队八年，可以讲是“吃食堂”吃了五十年。
我个小学也是有食堂个，不过只是拨老师、员工吃饭个。欸歇辰光侪是“就近入学”，学生屋里向离学堂老近，大部分学生侪回轉去吃饭。极个别路远个同学，也勿好去“吃食堂”，不过可以从屋里带饭，上课之前交拨食堂，代侬加热。我班级里个体育委员，每天带个侪是馒头，装勒一只小小个布头袋袋里，加热一蒸，麦香透过布头袋袋散出来，我竟然到现在还记得迭个特别个香味道。我是住勒北京个南方人，一日三顿侪是米饭，早浪向吃个也是泡饭，所以小学辰光对馒头是邪气向往个。
前一抢中学同学聚会，讲起当年种种好白相事体：啥人家有铜钿啥人家穷咾；啥人个爷娘是做啥事体个咾；啥人家是独门独院，啥人家是七十二家房客咾。我就插了一句：啥人勒学堂里“吃食堂”個，啥人个家境就勿推板。言话一出，大部分同学倒是侪认可了，勿同意个同学听了只“一角洋钿个故事”，也侪点头认可了。
现在真是到了大家对一角洋钿侪可以忽略不计个日脚了，找零头麻烦，一只铅角子落勒地浪，侪懒得弯腰去拾。但是我对迭个一角洋钿，是有永不磨灭个深刻记忆个，就像张中行讲过个：“伤哉贫也”。
中学辰光，我老想勒学堂里吃中饭，可惜我一顿也呒没吃过学堂里个食堂，倒是勒食堂劳动过。1964年10月26号日记搿能写：“今天下午是劳动课，我和三个同学去食堂帮厨。劳动完了，看看那一堆白菜、肉和咸菜、肉丸子，心里真有说不出的快活。”
实质浪，就是我吃勿起食堂，食堂饭票是啥样子，一眼印象也呒没。吃食堂侪是家境宽裕个同学，伊拉来读书、放学回去，侪是踏仔弹眼落睛个脚踏车，脚浪着个是回力牌球鞋。我中学三年，难板有搿能几趟，懒得回去吃饭，侪是从屋里带饭出来，带个是米饭搭仔炒洋山芋，我偷偷叫加了一勺白糖。要么就是煠白菜。当然，更多辰光是来回走三十几分钟，到屋里向吃饭去。
比带饭更加奢侈个，是到外头个小摊头买来吃，搿种事体是更加少了。我先要跟姆妈讨钞票，姆妈总归拨我一角二分，再加四两粮票，迭个就齐巧够买两只北京个“大火烧”，乃末我会得开心一整天。
教阿拉英文个“TC赵”，老欢喜跟同学一道勒学堂边头个一家小吃店里吃中饭个。“TC赵”一般侪是出二兩角兩分，四两粮票，买两只大火烧加一碗北京个“炸豆腐”，搿能干湿搭配，热彤彤個，简单实惠。有辰光，“TC赵”吃眼别样物事，再加一碗炸豆腐，两角洋钿四两粮票，反正一角一碗个“炸豆腐”是板要吃个。
中学三年，我从来呒没吃过香气四溢个炸豆腐，因为我总归缺迭个一角洋钿。
中学毕业，下乡插队。勒勒知青集体户里，头两个号头有生产队派人搭阿拉烧饭，两个号头一过，知青就要自家烧饭，还有啥个“食堂”好吃！不过倒也勿好讲整整八年，一点食堂影子也呒没，只不过是自家呒没“吃食堂”个资格。譬如讲公社食堂，我就曾经跟一位“插兄”一道，勒勒里向买过两只馒头，搿馒头实在是难吃得来，当地农村个饮食习惯本来也勿是会得蒸馒头个，但是搿只食堂也就吃过迭个一趟。
另外一只“吃食堂”记忆，是勒“出民工”个工地浪，有一只民工食堂。啥叫“出民工”呢？就是修公路、修水库搿种工程，由各個生产队抽调农民或者知青参加，工分按生产队标准记，迭个就叫做“出民工”。出民工，换了一只环境，做勿足三十天，也搭侬记三百工分，一天十分是最高分了，所以邪气佮算。工地浪有两种勿一样个食堂，一只是干部食堂，另外一只就是民工食堂。
回到北京之后，上班一直做到退休，“吃食堂”总归离勿开。我吃过本单位食堂，有常时也勒别人家個单位食堂吃饭，当然是朋友付个饭钿。我自家个单位，每個礼拜三上半日雷打勿动，板是全体大会，食堂大师傅也必须全体参加，所以周三食堂個中饭，用勿着猜個，定规是面条，省事体呀。搿种省事体烧出来个面条，想想也勿会得好吃個。所以到了礼拜三中浪，吃食堂個人少脱仔交关，大家侪各想各个吃饭花头去了。
伊歇辰光，工鈿就是几十只洋，发下来個第一桩事体，就是马上买好十块洋钿饭票，乃末，一个号头个日脚就踏实了。
阿拉最近还发过：
【麦唐作】即“麦小姐”和“唐厂长”的作品，是以沪语（语音口音偏上海市区音；文本表达参照钱乃荣《上海话大词典》及《上海话小词典》）为主打的原创方言专栏。文体、形式自由不羁，力求“做得开心，听得满意”。
“麦唐作”又取“卖糖粥”之谐音，愿为众友献上一份带着生活回甘的“地气美食”。
【申情申音】本栏目以沪语朗读为主打，文字来源可原创，也可选取其他老师的优秀文章进行适度改编（尽量取得原作者的授意，如暂未能及时联络得上，也将尊重其原文著作）。
申音悠悠，好文共赏。
联系客服
