沪语朗读：王震
最奢侈的空间
作者：李大伟
来源：夜光杯
沪语改写：郭莉
朗读：王震
推荐：丁迪蒙
1997年以前，上海人生存常态就是螺丝壳里做道场。卧室兼餐厅，还兼卫生间，要是啥人家还兼做书房个，葛末马上就晓得，主人是只书踱头，有种“吃力勿讨好”个爱好，上海言话叫做：做人一眼也勿实惠！
97年之后，上海推出商品房市场，乃末，买房子！买房子！迭个意念多年来坚定勿移，置换房子就成了我个生存常态。迭个要归功于我欢喜买书、看书。凡是有床个地方，我一定要有间书房，搿是我对书表示个致敬。
读上海史，晓得从前上海顶有铜钿个，勿是企业家，也勿是银行家，偏生是房地产大亨。外国人有沙逊、哈同；中国人就是徐润、程谨轩咾啥。
哪能会得搿能？我翻翻经济学个书，乃末晓得：钞票可以复制，土地是随便哪能也呒没办法复制个。所以我对书是感恩勿尽，因为伊让只书踱头“袋袋里向有铜钿、屋里向有米粮；腹有诗书身无病、门无债主心无忧”。让我自家脱离了窘境俗世，也勿必再为五斗米折腰。
一个男人，开心买点书，安心读点书，放心睏只觉，迭个赛过“三心蚊香”，也好算品牌男人了。哈哈！
我个屋里向，卧室里就是张眠床，厨房里向呢？就是镬子碗盏，但是我书房里向个物事，就要复杂得多了。
首先，书房里假使只有书搭仔书橱，搿就是书商个库房。书房应该是寄托灵魂个地方，可以“书言志”。我每趟搭自家个新书房配对联，侪要动足脑筋。配副“一等人忠臣孝子，两件事读书耕田”？忒平常了，显勿出我个虔诚。搿副对联假使眉心配匾末就应该是“耕读人家”，葛末，挂勒进门个大厅，作为家训更加合适。但是迭只物事板定要挂勒深宅大院里，门厅高大，院子里可以种树；要是去挂勒公寓个厅里向，就好比是灯笼挂勒蜂窠里，大头小妖怪，勿灵个。
“精神到处文章老，学问深处义气平”，搿句言话对我迭个老“愤青”倒有一针见血个警示作用，挂勒书房里也般配，但又好像勿大冷僻，显勿出我个学问。不过，真个假使去挂“斗酒纵观廿四史，炉香静对十三经”，葛末，又显得吹得野豁豁了，真是勿大好意思个。人家厾拨侬一本《春秋》，侬假样头翻脱几页，其实呢，断句也勿晓得哪能介断，省省伐！想想还是选副老实点个，不过也有眼冷僻个：“漫研竹露裁唐句，细嚼梅花读汉书”。《汉书》还算是读得懂个。眉心匾是：“一身藏”，意思为“万人如海一身藏”，书房就是闹市里向个归隐竹篱庵。
我个生活轨迹邪气清爽：“上半日书房，下半日茶坊，夜到头K房”，生活导图也是迭能跟伊相配个：“上半日读书人，下半日生意人，夜到头白相人”，其实“夜到头”是讲戏话，为了搭前头两句凑足顺口溜，我夜里向一般还是坐勒书房里，老朋友一道吃吃茶，谈谈大家侪感兴趣个话题，七牵八扯，可以风月无边，“不足为外人道也”。乃末书房就成了“四知堂”：天知、地知、你知、我知。“四知堂”这块厚木匾，两旁边顶顶合适个绝配就是“相见亦无事，不来常思君”，书房也就成了客厅哉。
书房四边，朝北是窗门，临窗是只老大个写字台，是越南黄花梨木个好货！写字台浪摆只端溪砚台，还有一只笔架，腊月里向呢，再配盆水仙，亭亭玉立，淡雅清香，真有眼暗香袭人个意思。窗台浪摆盆耐阴个文竹，伊个针叶细密得像竹篾片，平常辰光静若处子，要是稍微有眼风来，文竹婆娑欲舞，上下扇动，生意盎然。
三面墙壁，朴素无华，就是石灰白！彰显我书生本色。左右两侧是书橱。书房家生是我屋里向最贵个了。九十年代，越南黄花梨比酸枝木还便宜，但是花纹比酸枝木好看，当时，我从稀缺性角度感觉伊个价值会得迅速上升。果然，当初三十万一套人家用来抵债个书房家具：书橱、写字台，还有配套个卧榻、圆鼓桌、博古架，据说现在值了两千万。摆勒我有点轧个书房里，发带点辛辣味个的香气，幽幽个，迭个阿就是所谓书香人家呢？
我小辰光想去当兵，因为近视眼，只好算数。大学毕业以后又想投笔从戎，因为超龄，只好放弃。乃末，我是拿一辈子个爱好侪塞到了书房里。书房是可以做大头梦个地方，是可以“关起门来做皇帝”个地方，是可以与世俗外界隔绝个地方，是可以胡思乱想，赛过一只让自己独隐于市个胶囊。我总算可以躲勒书房里，做一个长勿大个老顽童。
往期回顾：
图片来自网络
联系客服
