沪语朗读：周恋云
作者 ：周力
沪语改写：荣梅
朗读：周恋云
搿些年来，普通闲话对上海闲话个影响邪气大，年轻个一代上海人越来越勿愿意或者勿能够再用上海闲话交流，即使想讲上海话，也是“洋泾浜”兮兮个。交关生动搭仔鲜活个上海方言逐渐退出了历史舞台，只有勒特殊语境下头再能够拨人提起。但普通闲话搭上海闲话个交流绝勿是单向个，上海闲话对普通闲话个影响也是客观存在个。今朝讲只例子：普通闲话当中经常用到个一个词“穿帮”，就来自上海闲话（江南方言），而且是由上海闲话转到普通闲话个过程中发生了变异，成为了一个约定俗成个错别字。
“阿有坏个棕绷修伐？阿有啥坏个藤绷修伐？”老上海个大街小巷，总归有交关走街串巷个叫卖声，修棕绷、藤绷也是其中之一。现在个居家，卧具多数是西式个“席梦思”、弹簧床，甚至深个乳胶床、水床咾啥。老底子个床无非是两种：条件推板眼个睏木板床，条件好眼个呢，睏棕绷或者藤绷。棕绷搭仔藤绷，顾名思义是由棕丝搭仔藤丝编结而成个，先用硬木做成框架，勿用洋钉而纯粹是榫卯结构，师傅巧手一双有乾坤，经过锯、刨、划墨线、打眼、凿孔等等传统手艺固定框架，再拉棕丝，一根根穿梭编织，像编结也像织布，直到做成功一张结构牢固、质地优良、弹性十足个棕绷床。棕绷搭仔藤绷，好像棕绷用得更加多一眼。
师傅个手艺再高，棕绷个质量再好末，也敌勿过调皮小囡个两只脚。凡是睏过棕绷个小囡，呒没人没勒上跳过个。交关年数以后，“蹦床”成为了奥运会项目，中外运动员侪勒一张网状个“床”浪向蹦跳翻跃，勒空中白相出交关花头，看见搿一幕，我总归会得想起小辰光个场景。棕绷虽然有弹性，但终究呒没奥运会浪用个蹦床结实，三跳两跳，棕绷就要穿了。搿个，就是“穿绷”一词个由来。
绷得邪气紧个床浪穿了只洞，当然是勿适意个。“穿绷”成为一种状态，豁边了，兜勿牢了。因此，就有了伊眼“阿有坏个棕绷修伐？阿有坏个藤绷修伐？”个师傅沿街叫喊，提醒大家去看看自家屋里个卧具，是否有穿绷个。一旦穿绷了，修理个方法也老简单，考究眼个还是用棕丝，一般性就用尼龙绳子，穿一穿，补一补，仍旧是一张弹性老好个床。假使勿拨重视，小洞变成功大洞，整张床就要塌下去了。
“绷”，勒普通闲话当中个发音是beng，搭“帮”（bang）有区别个。勒上海闲话当中，搿两个字也是有眼区别个，但外乡人听起来音差勿多。勿睏棕绷个北方人常庄听见上海人讲“穿绷”、“穿绷”，望文生义就造出了“穿帮”迭个普通闲话词语来。常庄拨用勒影视剧当中。譬如，抗战题材电视剧里向，八路军士兵端仔把AK47个自动步枪；或者是勒勾心斗角个宫廷剧里向，皇帝个案头浪老明显个摆了只华为手机，搿眼就叫“穿帮”镜头。
辰光长了，上海人也忘记脱“穿帮”就是“穿绷”。大家已经侪勿睏棕绷了，勿用介警醒，可以高枕无忧了。勿要讲小囡，大人也可以勒席梦思高头随便跳、随便蹦，覅再担心穿啥个绷了。马路浪喊“阿有坏个棕绷修伐？阿有坏个藤绷修伐”个老师傅，也老里八早就消失了。
往期回顾：
图：网络 / 编辑：渺渺
联系客服
