作者：杨忠明
沪语改写、讲述：郭健
上海路边浪向绿化带里七色花开，但是我总归觉着少脱了一样小辰光常庄看到个传统牵牛花，就是老底子弄堂里向夏秋季节常庄看得到个一种爬藤个牵牛花——颜色有得白个、蓝个、绯红个、桃红个、浅紫个、莹蓝个、玫红个，花瓣边缘也有得邪气多个变化，深秋个辰光结出来个种子，“黑丑、白丑”可以做药，来年春天再种下去，会得开出来漂亮个喇叭花。古人云：“秋赏菊，冬扶梅，春种海棠，夏养牵牛。”每天早浪向四五点钟，太阳还呒没出来唻，露水中个牵牛花就已经开花了；到了中浪向，太阳光直别别个照勒海，迭个辰光牵牛花就开始凋谢了。葛末，为啥道理牵牛花开得辰光介短呢？原来啊，牵牛花个花瓣又薄又大，花里向水分又邪气多，辣豁豁个太阳照勒海，花就慢慢叫个萎缩了。假使齐巧花是开勒阴头里，葛末有个花朵到了下半日还开勒海来。记得有一首关于牵牛花个旧诗：“绿蔓如藤不用栽，淡青花绕竹篱开。披衣向晓还堪爱，忽见蜻蜓带露来。”
初秋个清晨，我走勒上海南市个小马路浪，寻找老上海个痕迹，旧货摊头堆勒海个破皮箱长板凳、旧灯罩坏闹钟、留声机盐钵斗，还有一只老底子宁波阿娘欢喜个朱漆脚盆……弯到老弄堂最最里向，看到几间旧门面个房子，木门浪向铁钉个锈迹像煞是穿越了岁月尘埃个积淀，一眼斑斑驳驳个朱红色个板壁像煞是勒勒告诉阿拉搿搭经历过个百年沧桑。突然之间，抬头看到一垛残破个砖墙，边浪向爬勒海一根根细细个枝蔓，高头开满了鲜花，花色娇艳，勒勒霞光搭仔清风当中摇曳生姿，血血红、淡青色个花朵争奇斗艳，还有交关花苞像煞是一支支个红蜡烛指牢仔天空，让人眼门前一亮，噢……久违了呀，搿就是我想要寻找个旧时个记忆——老上海人家个牵牛花！老底子个牵牛花特别招人欢喜，花形空灵多姿，色彩莹澈清亮，富有诗意，假使讲拿伊画下来也邪气漂亮。虽然搿歇个街心花园里向也有得一种趴勒地浪向生长个“矮脚牵牛”，迭种花原产南美阿根廷，花冠像只喇叭，有得红、白、粉几种颜色，必过花色有眼浑浊，也缺少了阿拉老上海爬藤牵牛花特有个神韵搭仔朴实感。实际浪，牵牛花是属于旋花科，而矮脚牵牛花呢，是属于茄科，两种花是勿一样个品种。
听人家讲，京剧表演艺术大师梅兰芳也养过交交关关色彩鲜艳个牵牛花，而且梅先生总归是抢勒花开之前先到宅院当中锻炼身段。有一趟，国画大家齐白石到梅兰芳屋里去白相，看到伊拉屋里种仔像碗搿能介大个牵牛花之后，就开始创作牵牛花个国画，后首来齐白石先生个作品当中出现了大量个红花墨叶画法个牵牛花，章法奇崛，线条老辣，用墨浓淡枯湿变幻无常，墨色留白，反差强烈，一支支牵牛花苞灿烂得来，好比是明艳个朝霞，花勒勒墨叶老蔓个映衬下头，真个是一种绝妙个视觉享受。
石库门天井里平民化个牵牛花带拨上海人一种特别个亲切感，拨阿拉留下来了欢乐搭仔永恒个记忆。我注意到上海还有一种野生个牵牛花，花色粉白带眼淡青，叶子小悠悠个，花朵有眼像阿拉常庄看到个牵牛花个缩小版，虽然勿是邪气亮丽，但是也照样清清爽爽，一簇簇个散勒乱砖头、杂草、野树当中顽强个生长，风霜、雨雪、烈日也阻挡勿了伊年年开花，生生勿息。我更加赞赏搿能介个牵牛花。我想，做人，大概也要有眼野生牵牛花个精神伐？
朗读者
往期回顾：
图：杨忠明 / 编辑：渺渺
联系客服
