沪语讲述：渺渺
作者：王建运
沪语改写：边秦翌
推荐：丁迪蒙
上海人称之为“小菜场”个地方，就是北方个菜市场或者农贸市场，此地倒勿是指荤素菜肴个大小之分，而是拿除脱主食之外个副食品统统叫做是“吃酒吃饭个小菜”，假使勒酒席浪要劝客人多吃点菜，就会得讲“多吃点小菜呀”。
上海自从开埠以来，天南海北人员汇集，慢慢叫变成功中国最大个移民城市。为了适应居民日常生活吃菜个需求，“小菜场”就应运而生了。一开始呒没啥个规模搭仔章法，各种小贩或者菜农，自家勒街头巷尾摆只摊头，像煞是搿歇个马路菜场。正是因为吃饭吃菜是“百姓开门七桩事”个首位，从上个世纪初，由国民政府搭仔私人老板按照居民集聚区域，划地块开设了专门卖菜个市场，从此上海市区个小菜场开始趋于正规化了。
上海勒开埠之前，只必过是江苏松江府下属个一个海滨小县城，老城厢区域面积只有3个平方公里，譬如，老底子南市老城厢一带有得叫外咸瓜街、面筋弄、火腿弄、豆市街咾啥，迭个就是城外个农民搭菜贩伊拉每日天挑菜进城，走街叫卖，也有一些菜贩选择街道个门面房卖菜、卖瓜、卖肉、卖禽蛋咾啥，后首来又出现了前店后工场个小作坊。乃末好唻，卖面筋集中个地方就叫面筋弄，卖腊肉肠个地方就叫火腿弄，大豆市场一条街就叫作豆市街，可以讲搿就是当时辰光菜场个雏形。
旧上海个小菜场荤素供应具备，规模比较大个，还专门有得山珍海味个摊位，而且全天营业。譬如，塘沽路及北京路菜场，每天要开到夜快头5、6点钟，其他规模小一眼个，大多数开到中浪或者下半日2、3点钟。供应个蔬菜大多数是由郊县农民提供个，量小勿成批。假使讲想要吃到新鲜蔬菜，一般勒早市7点钟左右进场，买个辰光选择面广、机会也多，但是价钿会得比较高。假使讲想买眼便宜货，搿就要勒上半日11点钟左右进场，迭个辰光差勿多要收市快了，菜贩也侪想快点收摊回去了，迭个辰光个价钿还勿到早市个三分之一。
旧上海个菜市场用秤，虽然国民政府明确规定只好用市秤，但是摊主常庄暗中取巧，自说自话个变更分量，勿大可靠，所以常庄可以看到，顾客会得自家带仔一把市秤，以防拨无良商贩愚弄。乃么好唻，当时辰光跑小菜场去买小菜个老爷叔老阿姨，差勿多每个人侪会得自家带一把秤来买小菜，搿也算旧上海菜市场个一只景观伐。菜市场里除脱肉类还价比较少之外，其他个菜侪好讨价还价个，尺度大约摸7折左右。还有，旧上海菜市场人员比较复杂，小偷咾啥常庄混勒人群里向，买卖双方需要看看周围个山水，处处当心，否则身浪向个物事一歇歇就飞脱了。
上了年纪个上海人讲起小菜场，侪会得想到虹口个三角地小菜场，迭个再是上海最早个正规小菜场。早期三角地菜场是由旧上海工部局投资建造个，所以伊个英文名是Honckem Market，就是虹口菜场个意思。迭只菜场是单层个木结构室内菜场，四周呒没围墙，人员进出搭货物运输侪邪气方便，菜场外头地方开阔，人流量也比较大。当年三角地菜场经营个副食品，可以讲囊括了所有个菜肴原料，蔬菜品种齐全，荤腥有天浪飞个、地浪走个、水里游个、山浪长个、沟里爬个咾啥，样样啥啥侪有，甚至还有来自全国各地风味个糟醉腌腊风等食品，像煞是只菜市场个“超级大世界”，每日天吸引来自本市各个地方个“买小菜”个人，其中包括一些饭庄酒楼个采购员，菜场里向一日到夜侪是闹哄哄个。（未完待续）
往期回顾：
联系客服
