想踏“脚踏车”
我伲上海人常庄拿自行车称之为“脚踏车”。近年来,我头脑里时常会有搿个念头:想踏“脚踏车”!
顺根让我坐勒座垫浪,伊左手帮我扶笼头、右手护着座垫,嘴浪向高喊:“踏、踏、拼命踏!”我照此办理,用足力气朝前踏,顺根扶着车子跟着奔,由于我心急慌忙,只要顺根一放手,呒没几步,我就会掼倒(摔倒),弄得满脸油污。停车后顺根帮我总结经验,搁着还是我胆子小,勿夠勇敢,于是讲:“我扶牢仔笼头,侬只管坐稳拼命朝前踏,踏得越快、车子越稳。”
我照仔顺根嗰办法试勒几趟,果然越踏越稳。看到车子走得很顺,伊突然放手,让我独自踏。我一看到伊放手,心里有点慌,笼头抖老抖,我立刻扳正,乃么就更加扶得当心。踏仔几圈,然后一眼一眼放慢速度,顺根奔之上来扶我一把,停下车来。搿能几趟一来,蛮有成就感,信心十足,越学越有味道。后来照搿能又租车学仔两趟。
1953年9月,我家搬到控江二村,二哥用分期付款的方式花248元(读“块”)买了一辆日本富士牌脚踏车。伊是个脚煞车,车子比较结辊(扎实),呒没书包架子,后轮叶子瓣上可以坐人,所以号称“霸王车”。
当时我刚学会踏车,兴趣十分高涨,就向二哥提出试试新车子,二哥晓得我已经学会了,很爽气就将车子推出门让我踏。初踏霸王车,勿一息就学会脚煞车的操作,踏着搁得十分爽快。1954年陝西南路文化广场办春季音乐会,我想踏着新车子去听。二哥二话没说,一口同意。想是用248元钞票买来的新车子,二哥搿能大度支持我,心里十分感动。我常庄想到二哥对我伲弟妹的照顾,永远忘记勿脱伊嗰手足情深!
从此,我一生中经常以脚踏车为伴,完成各椿远近距离的任务。读小学辰光,礼拜六下半天,我常庒踏仔脚踏车去军工路翔殷路一个小学里,为许老师交换图书;我也去龙华医院探望住院治疗的大哥;去西郊公园后头部队医院为岳父续药;三年困难时期到龙华镇上吃山芋粥……搿些事体全靠搿种交通工具。所以,我对脚踏车🚴一往情深。
好多年之前,社会上出现交关颜色的脚踏车,其中黄颜色居多,大家称伊“小黄车”。看到排列整齐的小黄车,我心就热起来,虽然已是垂暮之年,也想上去推一部踏踏。当今,地铁四通八达,我伲老百姓出门,再有一部小黄车连接,真是绝配!搿能便当,从前辰光做梦也勿曾想到过。
我阿妹住勒彭浦新村,我常庄会去看望,伊拉屋里离开地铁站有一千多公尺,走搿点路还要拎点水果、点心老啥,搿是真生活!现在,地铁下车踏仔一部小黄车,搿没几花便当?多年前北京有家公司勒上海街上摆出交关小黄车,我赶紧让外孙帮我在手机上开一个户头,预交租车费一百元。可是勿晓得哪能,搿家公司收仔钞票呒没开下去,交关人吃了一个闷棍,想想祘了吧,总勿见得为了搿个一百元再买仔火车票去北京讨帐?三年疫情开始后,踏脚踏车的念头更加息搁!
近来,我又常庄想起了小黄车,走过我家大楼门口排列整齐的小黄车,我朝伊看看,伊好像勒跟我招手。心想,有场时踏仔小黄车到近横头兜一圈,买点蔬菜、水果老啥,几花便当?我拿搿个想法与小囡(孩子)商量,想勿到女儿、女婿一再“横搭头”!女儿讲:“耄耋之年踏车子,反应跟勿上,容易闯祸!”女婿讲:“现在的岁数骨质疏松普遍存在,万一跌仔一跤,骨折就寻上门来,我劝爸爸放弃搿个念头!”屋里其他小囡一律搿种态度。仔细想想小囡讲法也有道理,老人应该听伊拉嗰!我的踏 “脚踏车”嗰想法只能旁边摆一摆了。
脚踏车啊脚踏车🚴,如今是只能看着侬招手,我是勿能踏哉……
2023.12.07 于全日空“上海-东京-纽约”航班上
“言话”基本解释:说话,谈话。南朝宋·刘义庆《世说新语·赏誉》“天锡见其风神清令,言话如流。”宋·苏轼《归去来集字》诗之三“言话审无倦,心怀良独安。”此与今日上海话中“言话”的用法是一致的。
“闲话”基本解释:指闲谈;背后议论他人是非的话;不满意的话,有关私人的谣言、传闻、幕后消息等。见陆游《雪意》诗:“闲话更端茶灶熟。”
图片:网络 | 编辑:渺渺
联系客服