题记：勒拉2016年08月06日礼拜六下半日，笔者曾经撰写过一篇上海故事呃文章——《闲话栀子花白兰花》，里向所讲呃内容就是上海人搭外婆侪都是邪气欢喜栀子花白兰花，自从笔者1998年开始工作嘞以后，每年只要到嘞入夏时节、还只要看到嘞有人勒拉叫卖栀子花搭白兰花，自会得去各买两朵栀子花搭白兰花送畀外婆，伊每趟仔看到嘞以后总归是交关开心，面孔上头乐开嘞花。由于嗰人从出生一直要到上小学一年级之前，几乎就是由外公外婆以及大娘舅领养大呃，因此搭伊拉之间呃感情是交关深呃，故而，今朝仔决定去撰写一篇搭外公有得关系呃文章，以此唻缅怀外公倪根生故去嘞十一年……
笔者呃忘年交友人顾建芳先生，曾经搭笔者勒拉一道嘎讪胡呃辰光，去讲过迭恁一段有关于生死方面呃閒话，伊就去讲道：“阎罗王要某嗰人三更半夜走，绝对覅会得让伊拖到五更天。人迭嗰一生必然要走呃，只畀过是辰光方面呃长搭短而已，其他方面是呒啥呃。还有交关重要呃一条就是——覅怪是阿里一种人，当伊第一天唻到迭嗰世界呃辰光，天气是哪恁样子呃，当伊要离开迭嗰世界呃辰光，迭嗰一天天气搭唻呃辰光是一色似样呃，绝对覅是迷信啊，每嗰人基本哴向侪是迭恁样子，假使侬覅大相信呃閒话，可以向周围熟悉呃亲朋好友证实一下，就明白吾讲呃迭句閒话，到底是对还是错嘞！”……
外公倪根生于2008年08月25日礼拜一弹老三了，享年89（虚）岁，比外婆晚走了六嗰号头，那一天下着大暴雨，雨量邪气大。
纵观外公倪根生一生是迭恁样子呃，伊是滴滴刮刮呃宁波人，伊母亲呃名字叫做：陆海妹，一共生育嘞三嗰伲子，一嗰囡鱼，囡鱼是屋里厢最最小呃小囡，小囡鱼就勒拉生小囡呃辰光，因为难产呃缘故，同样是老里八早弹老三嘞。外公是屋里厢呃老大，伊呃家庭是生活勒拉底层邪气普通呃老百姓。就勒拉民国时期时，由于战争呃原因家园畀毁，伊只好搭伊呃母亲大人、俩嗰兄弟搭小阿妹从宁波一路逃难到上海滩哴向讨生活，伊拉四嗰小囡是由母亲大人含辛茹苦养育大呃，上述迭些内容先是由外公告诉嘞家母，再由家母告诉畀嘞笔者。
当历史呃车轮走到民国时期呃辰光，宁波地区就有得从事三种营生呃人，第一种人就是——跑船出海呃船夫；第尼种人就是——做各种大小生意呃大小宁波老板；第三种人就是——宁波奉化地区呃裁缝师傅，勒拉最初呃辰光侪畀大家称之为“奉帮裁缝”，邪气有可恁宁波人“奉”字呃读音，搭“红”字呃读音是交关相近差大覅多呃，到嘞上海滩哴向以后，“奉帮裁缝”迭四嗰字，久而久之畀以讹传讹就演变变化成为嘞“红帮裁缝”，最正确叫法应为“奉帮裁缝”。
笔者因为从小到大是由外公带领大呃，本人通过长期观察就发觉嘞，纵观外公伊迭嗰一生，基本哴向是属于一嗰邪气沉默寡言呃人，是覅大愿意开口讲啥呃閒话呃，伊嗰人主要还是以看搭听为主，伊呃看搭听要远远多于自家开口讲閒话嘞，伊对尘世间呃任何人事物情侪是看得邪气透彻明白，可以讲是像小葱拌豆腐一样——一清二白（楚），伊只愿深深呃埋藏勒拉心里向，轻易覅肯开口讲出唻，有可恁今早伊邪气高兴呃辰光会得讲一眼，讲閒话基本哴向是简明扼要点到为止，侬假使再要伊多讲一眼，伊绝对覅会得再搭侬多讲点啥么事嘞。
外公生前曾对笔者讲过迭恁一段閒话，伊讲伊呃一生从事过三种行当。第一种行当就是：勒拉工厂里向做过车床加工工人；第尼种行当就是：跑船出海呃船夫，主要是去做打捞救援方面呃工作。伊还亲口对笔者讲过，伊之所以会得去从事迭嗰行当，是有得两嗰主要原因呃，第一种原因就是：勒拉某一天，伊一边勒拉做车床加工工作呃辰光，一边还勒拉忧心思虑哪恁可以去照顾好外婆张榴妹并养育好七嗰子女，【备注：外婆伊本人是一嗰呒得工作目不识丁呃家庭妇女。】覅小心就畀大拇指头压断忒嘞，虽然医院畀伊呃大拇指衔接好嘞，但畀过，勒拉上海是覅恁完完全全恢复健康、恢复好呃，只有去南方工作以后，侪有可恁去恢复好，所以国家就安排伊去广州打捞局做船员迭嗰行当，伊还讲到以为自家去嘞广州以后，恁畀大拇指治疗好，退休回到嘞上海以后侪发觉，还覅恁完完全全恢复，每当到嘞阴雨天，大拇指多少还会隐隐作痛。第尼种原因就是：还是搭伊呃祖上侪都是从事跑船迭呃行当，多多少少是有得关系呃。第三种行当就是：小娘舅倪林发顶替外公外公提前退休以后，家庭经济条件可以讲是邪气困难，政府为嘞帮助困难户，允许伊拉做做各类小生意。勒拉上嗰世纪八十年代初期到中期，就向政府申请批领过一张摆小水果摊头呃营业执照，摆过一嗰水果小摊头，只好通过买卖各种时令水果唻贴补家用。就勒拉掰搿辰光，笔者也是跟着大人一道去卖过各式各样呃水果呃。
伊继续讲道，伊搭外婆一共生育有八嗰子女，勒拉大娘舅倪榴发上头还生过一嗰男囡头，小囡生下唻就有得毛病，覅晓得啥呃原因，只要轻轻地去碰一碰小囡身哴向，迭嗰小囡呃身体里向就会冒出像油脂一类呃么事，由于生病外加医学科技覅是交关发达，呒过多久，顶多也就勒拉一年左右呃光景就死忒嘞。伊为嘞家庭，勒拉工厂里向做工人搭船员呃辰光，自家也是邪气努力呃学习、工作，经过自家覅间断呃学习搭努力，勒拉顶替退休之前，做到嘞家长呃级别，曾经还畀评为嘞优秀员工。【备注：外公讲过，广东人一律欢喜畀“船长”称之为“家长”，只因为“船长”就要像“家长”一样，无微不至呃去管理好一船船员。】嗰人还去过由国家开办呃扫盲班，是一嗰呒得啥文凭呃半文盲，覅管是繁体字，还是简体字，只要是常用呃，伊侪都恁认得，要是去侪写下唻，伊讲就覅唻三嘞，伊只会看是覅会写呃。
勒拉老底子、勒拉计划经济时期，国家为嘞人人侪有生活恁去做，覅允许有得一嗰下岗工人、有人呒工作做，曾颁发过一嗰关于顶替退休呃文件。讲只要是勒拉工作呃父母，达到嘞一定年龄，假使子女呒工作做，子女可以顶替父母去工作，父母可以提前退休。小娘舅倪林发顶替嘞外公工作，也去嘞广州打捞局工作，外公提前退嘞休。
外公勒拉摆水果摊头呃辰光，笔者尽管勒拉掰搿辰光，只有虚岁七八岁左右，也是帮过忙照看过摊头呃。还尽管勒拉掰搿辰光，有得四五爿水果摊头，同时勒拉竞争争夺客户资源，吾伲摊头生意做得顶顶好，究竟是啥呃原因呢？！只因为外公摆水果摊所采用呃方式方法就是——薄利多销，勒拉恁够保本呃基础上头，每卖出一斤时令水果，只去加价一角洋钿，覅像其他呃摊头心蛮黑呃，起码要去加价块把洋钿，还要短斤缺两以次充好。即便是迭恁样子，还覅恁保证水果小摊头恁赚到铜钿，也有得亏本呃辰光。记得有一趟勒拉卖新橙西瓜呃辰光，重量达到嘞36斤，依照长期卖水果摸索出唻呃经验，以为是只好西瓜，稍微恁赚一眼眼铜钿，呒想到西瓜开出唻以后，侪都起沙倒醸坏忒嘞，心里覅要提有得多少肉麻心痛啊，只好掼进嘞垃圾箱。
外公勒拉摆水果摊呃辰光，所居住呃房子是问私人借住呃平房，还搭建嘞一嗰二层木楼板房，水果摊头就摆勒拉老屋里厢呃弄堂口哴向。由于勒拉上嗰世纪八十年代中期市政动迁，一些老房子纷纷畀拆忒嘞，搬迁进嘞层高六层一楼四户人家呃新工房，自从搬迁到嘞新工房以后，摆水果摊头呃地方呒得嘞，从此就覅再摆水果摊头嘞。
实际哴向外公倪根生呃身体素质是邪气推板呃，主要由两嗰原因造成嘞伊呃身体素质是邪气推板呃。第一嗰原因就是：搭家庭遗传基因呃因素是有关系呃，伊搭伊俩嗰兄弟到嘞老年以后，僎都有得老慢支支气管炎毛病，据说是由伊呃祖辈遗传畀嘞伊呃，伊呃祖辈也同样有得老慢支支气管炎呃；第尼嗰原因就是：勒拉年轻呃辰光，外公邪气欢喜喫香烟搭老酒，一天起码要喫忒一两包左右呃香烟，而且所喫呃香烟品质是交关推扳呃，价钿也是顶顶便宜呃，由于自家经济条件邪气有限、邪气少呃，只恁去喫喫一些诸如劳动牌、大生产牌之类呃香烟，老酒也只好去喫喫一些顶顶推板呃土烧，迭种老酒呃酒精含量是交关高呃，香烟几乎是从覅去间断过，日积月累日常时久久而久之，从而造成嘞伊呃身体覅好嘞，老慢支支气管炎越唻越严重，每天还要覅定时呃去使用缓解老慢支支气管炎呃喷雾剂，勒拉最最结棍呃辰光还要到附近医院去就医看毛病，当有嘞毛病毛病严重以后，开始滴酒覅沾，一根香烟也覅去触碰。也就是勒拉搬迁到嘞新工房以后、勒拉后末唻廿多年呃日脚里向，伊基本哴向只恁够躺勒拉眠床上头。
一直躺勒拉眠床上头，多多少少也是有得厌气呃辰光，外公为嘞防止厌气无聊，基本哴向就只恁搭电视机为伴，伊所看呃电视节目，还是以各类时事新闻为主，其他类别呃电视节目，伊几乎是覅大会得去看呃。偶尔也会去看看戏曲频道，由于伊长期勒拉广州工作呃原因，最最欢喜看呃戏曲节目就是——各类广东戏曲搭各类广东民乐，每趟仔只要是看（听）到嘞各类广东戏曲搭各类广东民乐以后，伊总是眯开眼笑乐开嘞花。假使今早仔，伊感觉到有一眼眼吃力撒度以后，就会得关忒电视机睏忒一歇歇，等到觉睏醒嘞以后，仍旧会得去开电视机看看各类时事新闻。笔者刚刚开始拥有手机呃辰光是勒拉1999年，勒拉掰搿辰光，手机侪都是普通手机，还覅是智能手机噢，虽然是迭恁样子，但是恁下载保存短辰光呃唻电铃声，下载过一嗰时长勒拉一分四十秒左右呃广东民乐“彩云追月”，每趟仔去外公屋里厢白相，侪会得反反复复播放畀伊听，记得有一趟大约摸连续放嘞二十分钟左右，伊从头到尾开心得覅得了，面孔上头也洋溢着开心笑容。
医生也对外公讲过，一直躺勒拉眠床上头覅动，对身体是覅大好呃，恁动动还是要去动动呃。伊尽管自家身体覅是顶顶好、尽管伊呃动作、动手搭走路，因为自家身体覅是顶顶好原因，要比正常呃人家慢得交关多，但畀过，只要是勒拉身体还可以、允许动动呃情况下头，自家大小便、刷牙齿、擦面孔、汏脚搭汏浴，还是会得亲自去做呃，基本哴向是覅大肯让外婆搭子女帮忙呃，只有勒拉哮喘发得交关严重呃辰光，侪肯让子女去帮一下忙，尽管勒拉掰搿辰光，屋里厢已经配备嘞洗衣机，假使讲伊自家觉着身体邪气好呃情况下头，还假使只有得一两件外衣，就覅用洗衣机，自家会得亲自去汏自家呃外衣。
外公迭嗰人好喫而覅好穿，伊对于自家呃穿着打扮覅是邪气讲究呃，只要衣裳呒得破损坏忒呃地方，伊始终会得穿勒拉身哴向，今早仔还恁去记得，伊有得一件蓝颜色中山装，虽然呒得坏忒呃地方，但是衣裳已经畀汏成嘞蓝白颜色、勒拉领口稍微有一眼眼起毛嘞，伊就是覅舍得掼忒，仍旧是穿勒拉身哴向。尽管是迭恁样子，但凡是每一嗰看到过伊本人呃人，伊畀任何一嗰人呃感觉侪都是——迭嗰老爷叔始终是干干净净清清爽爽呃，始终看覅到伊有邋里邋遢呃地方噢。对于喫各类小菜伊本人倒是蛮讲究呃，伊绝对是一嗰老饕客，小菜到底是好还是坏，只要是让伊喫一小口，伊就晓得嘞。伊还对笔者讲过，勒拉力所恁及呃范围里向，喫小菜绝对覅恁去马马虎虎，恁喫点好呃小菜，绝对覅会得去喫推板呃小菜，只有喫嘞好呃小菜，自家呃身体侪恁够健康，拥有健康呃身体，既可以去让寿命活得长一眼眼，还可以去减少减轻对子女呃麻烦，与此同时还是全家呃福气。比方讲：伊欢喜喫黄鳝，伊认为喫黄鳝就要喫野生呃，家养呃伊就覅要喫、觉着覅大灵光嘞，大娘舅倪榴发就会得每间隔一两嗰礼拜买黄鳝畀伊喫。大娘舅刚刚开始去买黄鳝呃辰光，覅懂得野生搭家养之间呃区别，买回唻烧好嘞以后，外公仅仅是喫嘞一小口，就再也覅要去喫嘞，还对大娘舅讲覅会得去买黄鳝、覅正宗，正宗黄鳝应该哪恁去买……
覅管每一嗰家庭呃经济条件是交关好还是邪气推板，一年到头每家每户呃家庭聚会搭聚餐自然是少覅忒呃。勒拉老底子、勒拉国家还身处勒拉计划经济呃年代里向，即便是国家跨入到嘞市场经济时代里向，多数情况是待勒拉自家屋里厢，去动手买汏烧烧烧喫喫呃，只有碰着嘞交关重要呃事体以后，侪会得去好一眼、有得品牌呃饭店去喫喫呃。只要是外公外婆呃屋里厢有得嘞家庭大聚餐会、还只要是待勒拉屋里厢自家去动手买汏烧烧烧喫喫呃，出于对于长辈呃尊敬搭礼貌，【备注：外公搭外婆呃尊敬。】每趟仔侪都会得让外公坐嘞圆台面上头喫，但畀过，伊拉始终就覅肯上圆台面喫。外公要小辈另外去盛几只小菜摆勒拉靠窗口头呃两只“夜壶箱”上头，独自一嗰人喫。【备注：“夜壶箱”，是江浙一带家中放夜壶（晚上小便用呃便壶）呃矮柜子。后唻，与此外形相近呃床头柜畀叫做“夜壶箱”，但畀过放夜壶呃功恁从此就呒有嘞。夜壶也就逐渐逐步呃畀“痰盂罐”搭“马桶”所代替嘞。】伊对大家是迭恁样子唻讲道呃，曰：“吾本人之所以要迭恁样子去做，就是因为吾本人是一嗰有得毛病、生毛病呃生病人，要是搭大家待勒拉一道喫喫饭，勿单单会得影响到大家呃食欲，还极有可恁畀覅好呃毛病传染畀嘞大家，迭恁样子去做邪气覅好呃！”……
迭嗰两只夜壶箱，除忒是畀外公当做餐桌去使用以外，里向还放置嘞外公外婆每天必须要喫呃各类药瓶（品），外加一本工作记事本本子，【备注：记事本迭桩事体是等到外公故去以后笔者侪发觉晓得呃。】记事本到底是派啥呃用场啊？！里向主要所记录呃内容就是：几几年几月几号礼拜几，有啥人唻看过外公搭外婆嘞，唻看呃人又畀嘞俩嗰老人多少铜钿搭么事，而且还是要等到客人走忒嘞以后，伊侪会得去记录在案，并且只有是畀过嘞铜钿搭各类么事以后，侪会得去记录在案。等到曾经唻看过伊拉俩嗰老人呃客人，【备注：即便是自家子女、以及子女屋里厢呃小辈，俩嗰老人侪都认为是亲眷+客人。】屋里厢有嘞邪气重要呃事体以后，伊拉俩嗰老人还要想方设法去还情还忒，外公外婆始终侪是迭恁样子认为呃，畀俩嗰老人铜钿搭各类么事，既覅管是有得多少，也覅管是畀得多，还是畀得交关少，侪都是对俩嗰老人尊敬、尊重+客气，但畀过，自家绝对覅恁畀对俩嗰老人呃尊敬、尊重+客气，是理所应当呃、去权当做一辈子呃福气，勿单单是迭恁样子呃，伊拉俩嗰老人还认为，畀老人铜钿搭各类么事，并覅是应当应分呃。即使有客人（亲眷）空手唻看伊拉俩嗰老人，呒畀过铜钿搭么事，伊拉也是邪气开心呃，也覅会得去斤斤计较唻人呒畀过一眼铜钿搭么事，还会得经常性对唻呃人讲道：“侬唻看看吾伲俩嗰老人已经交关开心嘞，覅畀铜钿搭么事无所谓呃，下趟仔想着要唻看吾伲，空手唻就好嘞，赚一眼铜钿银子是覅容易啊，就覅要去破费嘞！”……
就勒拉2018年08月05日礼拜日呃夜快头，笔者曾经去撰写过一段关于“教养”方面呃短文，全文内容是迭恁样子呃，笔者撰写道：“教养”和高学历之间，未必存在必然的联系，学历高的人，未必表示其人有很好的教养，往往那些学历不怎么高的人，反而会体现出很好的教养。但凡缺少教养的人，是不会存有谦卑、谦让之心的，对待别人的态度，多多少少也是有一些目中无人目空一切的，不单单是这样，其人也是自视甚高的，总认为周遭的人都远不如他或她……
虽然外公搭外婆伊拉一生是呒得啥呃学历搭文凭呃，外婆几乎可以讲是一嗰目不识丁呃家庭妇女，外公只是一嗰初通文字呃半文盲，勒拉俩嗰老人呃身哴向，勿单单有着邪气丰富呃生活阅历搭见识，勒拉俗常生活当中，还有着交关良好呃品行搭教养，总归是润物细无声呃做畀嘞吾伲看看，伊拉呃一言一行侪都教育滋润着吾伲！……
谨以此文，唻纪念缅怀已经故去嘞十一年呃外公倪根生……
【备注：①文章为作者原创；②外公外婆和大舅舅的照片均是翻拍的；③各种水果和各类文字动图图片均来源于网络上：④感谢原创图片。】
联系客服
