今朝是吳越小豬
“老上海”吃西餐
作者：孔明珠
沪语改写：周红缨
朗读：沈珊明
推荐：丁迪蒙
点击下方收听音频，时长9分16秒。
怀旧已经勿是老年人个专利，拨年轻人明目张胆个抢得去了，怀旧个年代是越来越近。最近看到有人写老上海个西餐，仔细看，侪是我亲身经历过个事体，哪能就变成功老上海了呢？刚刚要发出老阿姨洞穿世事个笑声，突然刹车，提醒自家，80年代老上海，四十年一晃而过，搿句闲话好像已经老顺口了。
改革开放之前，上海西餐店营业随了时代个变化而跌宕起伏，到上个世纪70年代末纷纷复活，我埃个辰光勒所谓个“上只角”绍兴路出版社上班。隔壁办公室有一个“大师兄”是“资产”出身，住勒高尚地段，懂交关生活享受个事体，阿拉常庄勒休息个辰光听伊津津乐道描绘。讲到吃西餐，听众可以插嘴个只有自己屋里做土豆色拉，烧罗宋汤，而大师兄讲，勿对个，搿个算啥个西餐，俄国个家常菜，到了中国已经变得像啥样子，我带㑚到“蕾茜”去吃正宗英美式西餐，刀叉餐巾高脚酒杯，枝形吊灯，服务员西装领结，一只手摆了背后搭侬斟酒，侬享受过伐？埃个辰光有个刚刚分配得来个77届大学生，拼命鼓动阿拉一道去开洋荤，大家AA制。
蕾茜西餐社就勒离出版社老近个陕西南路浪向，平常辰光路过只有透过玻璃窗张张个份，传说当中个西餐规矩老大个，就怕踏进去勿会点菜，勿会拿刀叉出洋相，现在有大师兄领路，阿拉七八个同事下班之后组团，推推搡搡进了店门。大师兄显然做过功课，伊一口气帮大家侪点好了菜，每人一份汤一份色拉，再点了葡国鸡、炸鱼排、红焖小牛肉之类大家一道分了吃。红酒阿拉侪讲勿要吃，其实是担心太贵。大师兄讲，现在美国新进口个可口可乐可以试一试，来一瓶可口可乐，一瓶百事可乐。总算高脚酒杯呒没被服务员撤下去，可以享受到伊个西式标准服务。
虽然有大师兄保驾护航，大家对于雪白餐巾到底是放勒膝盖浪还是扣勒下巴下头吃勿准，或许应该压勒盘子底下？西餐刀拿右手，叉拿左手，葛末切好肉之后刀叉要不要调过来。还有调羹，大师兄说，舀汤要由里往外，迭个难度实在忒高，为啥啦？七嘴八舌向大师兄抱怨。大师兄满头大汗，拿食指放勒嘴唇皮浪向求大家勿要吵，讲起来么也是一群有文化个人，忒坍台了。等到一份葡国鸡上来，还呒没等到大师兄警告，大学生伸手推到台子当中去，手指拨碗烫得跳了起来。大师兄讲，葡国鸡是焗出来个㑚懂伐？啥个叫焗，就是超高温烤出来，奶油烧鸡盛勒碗里向，上头盖厚厚一层起司，进炉子焗好，里外温度侪超过一百度，用手碰要闯祸个。乃末吃可乐，啊呸，一个女生吃了一口穷叫是咳嗽药水啊，比咳嗽药水还要难吃，要死了要死了……第一次聚餐变成一场闹剧。第二天办公室算账大家掏钞票，价钿有点贵，空气当中飘浮了一层尴尬，大师兄邪气丧气，嘀嘀咕咕勿晓得勒讲点啥。
过了几个礼拜，大师兄屏勿牢透露秘密，老上海原工商界精英联合起来成立了协会，在上海恢复了几家老字号商店，其中有一家新利查西餐馆开勒广元路，请到以前个老师傅掌勺，服务员班底侪是资本家子女，大师兄个太太原来待业，现在已经当上了西餐馆女招待。哇，忒好了，阿拉再去吃！大师兄心无芥蒂，带了更加多个同事到了新利查。伊个太太长得娇小、漂亮，有点怕难为情，大多数服务员侪是新上岗，业务生疏。西餐店摆设规格勿高，味道却邪气勿错。店经理帮阿拉排了老长个台子，配好了经济实惠个西餐，80年代老上海，因为内部有人照应，阿拉用餐呒没上次介拘谨，大师兄再次当上指导员，搿顿洋荤开得侪老开心个。
80年代开始对外开放，上海人一时头浪迷信西餐，谈恋爱约会觉着吃咖啡比吃茶洋气，吃西餐比吃中餐高档。陕西路长乐路红房子西菜社个法式焗蛤蜊、牛尾汤，四川中路德大西餐馆个炸猪排，淮海中路襄阳公园旁边天鹅阁个龙虾意面，淮海中路上海西餐社个烤牛排侪是一心追求个美味。现在我想想“老上海”吃西餐，还记得阿拉年轻个胃，油光光个嘴唇搭仔闪闪发亮个眼睛，青春个笑曾经是迭能个恣意。
（本文作者）
（本文朗读者）
联系客服
